Федеральнэ программэу «Къулыкъу ахьызэ егъэджэгъэнхэр» зыфиIорэм къыдыхэлъытагъэу Мыекъопэ къэралыгъо технологическэ университетым илечебнэ факультет истудентмэ социальнэ мэхьанэ зиIэ проектыр агъэцэкIагъ: республикэ сымэджэщым щагъэхъужьхэрэмэ апае лекцие зэкIэлъыкIомэ къяджагъэх.

Егъэджэн-производственнэ практикэм ипащэу Шъэокъуе Нуриет ары Iофтхьабзэм кIэщакIо фэхъугъэр.

Акцием апэрэ курсым щеджэхэрэр хэлэжьагъэх. Медик ныбжьыкIэхэмкIэ сымэджэщым мыщ фэдэу Iофтхьэбзэ инкIэ чIэхьанхэр апэрэу щытыгъ —теоретическэ шIэныгъэхэр практикэм къыщагъэлъэгъонхэмкIэ, цIыфхэм гъэсэныгъэ ягъэгъотыгъэным ылъэныкъокIэ коммуникативнэ амалэу яIэхэр къагъэлъэгъонхэмкIэ амалышIу агъотыгъ.

Студентмэ сымэджэщым иотделении 10 фэдиз къакIухьагъ, къащыгущыIагъэх ыкIи информационнэ материалхэр агощыгъэх. Сымаджэу щагъэхъужьрэмэ узым зэребэныщтхэр ыкIи псауныгъэм икъэухъумэн пае ашIэн фаехэр зэрытхагъэхэ тематическэ буклетхэр аратыгъэх.

ЗэIукIэгъухэм пэшIорыгъэшъэу зэбэнынхэ алъэкIыщт Iофыгъо шъхьаIэхэм ащытегущыIагъэх: пщэр мыхъунхэм, гу-лъынтфэ узхэм, шъоущыгъу узым, ВИЧ-инфекциехэм, нэмыкIхэм апэшIуекIонхэм…

Буклетмэ игъэкIотыгъэу къащаIуатэ хроническэ узхэр къызхэкIыхэрэр, псауныгъэр гъэпытэгъэным пае къызэрыкIо шIыкIэу щыIэхэр, специалистмэ уафытеон ыкIи уякIолIэн зэрэплъэкIыщт информациер.

Проектым ишIуагъэкIэ къадэхъугъэр:

• Сымаджэмэ апае — социальнэ мэхьанэ зиIэ узмэ апэшIуекIогъэнымкIэ къэбархэм ащыгъозагъэх, врач хъущтхэм яунашъохэр зэхахыгъэх.

• Студентмэ апае — практическэ опытэу зэIухыгъэ къэгущыIэнымкIэ ыкIи зэдэгущыIэгъумкIэ къадэхъухэрэр, IэпэIэсэныгъэу агъотырэр.

• Университетымрэ сымэджэщхэмрэ апай — зэныбджэгъугъэ зэпхыныгъэхэр гъэпытэгъэнхэр ыкIи медицинскэ практикэ шъыпкъэр гъэсэныгъэм щыгъэфедэгъэныр.

Мы акциер — ар зы щысэу программэу «Къулыкъу ахьызэ егъэджэгъэнхэр» зыфиIорэр егъэджэн процессым зэрэхэщагъэр къэзыгъэлъагъорэу щыт. Врач хъущтхэмкIэ социальнэ мэхьанэу медицинэм иIэр зэхягъэшIэгъэныр, гъэсэныгъэ IофшIэным хэхъоныгъэ фэшIыгъэныр, сымаджэмэ занкIэу адэгъэлэжьэгъэнхэр къыделъытэ.

Рэзэныгъэ гущыIэхэр апэтэгъохы республикэ сымэджэщым иадминистрацие хэтхэм, ахэр тистудентмэ къазэрэдэлажьэхэрэм апае — пшъэдэкIыжь ахьызэ гъэсэныгъэ IофшIэным къызэрэхэлажьэхэрэм афэшI. Лечебнэ факультетым мыщ фэдэ гукъэкIхэр тапэкIи щагъэцэкIэнхэр япшъэрылъ, гъэсэныгъэ процессым исистемэ Iахь ашIыщтых.