Нэмыц-фашист техакIохэр Мыекъуапэ дафыжьыхи, шъхьафит зашIыжьыгъэр илъэс 83-рэ зэрэхъугъэм фэгъэхьыгъэ зэхахьэ мемориал Гупчэм щыкIуагъ, ащ къэгъагъэхэр кIаралъхьагъэх. Торжественнэ зэхахьэм хэлэжьагъэх: Адыгеим и ЛIышъхьэу КъумпIыл Мурат, АР-м и Къэралыгъо Совет-Хасэ идепутатхэр, АР-м иминистрэхэм я Кабинет хэтхэр, къэлэ администрацием ыкIи ухъумэкIо органхэм ялIыкIохэр, джащ фэдэу Мыекъопэ къэралыгъо технологическэ университетым икIэлэегъаджэхэр ыкIи истудентхэр.

Къэзэрэугъоигъэхэр зы такъикъэ Мыекъуапэ иухъумакIохэм, джащ фэдэу Хэгъэгу зэошхом илъэхъан тихэгъэгу къагъэгъунэзэ псэемыблэжьэу зэуагъэхэм ыкIи хэкIодагъэхэм апае шъыгъуагъэх. Ащ ыуж ЕгъэшIэрэ машIом къэгъагъэхэр кIаралъхьагъэх.

Шъугу къэтэгъэкIыжьы, 1942-рэ илъэсым ишышъхьэIу мазэ къыщыублагъэу 1943-рэ илъэсым ищылэ мазэ и 29-м нэс Мыекъуапэ нэмыц техакIомэ аIыгъыгъ. Къэлэдэс нэбгырэ мини 4 ыкIи советскэ дзэкIолI мини 10 нэмыц техакIомэ якIодылIагъэх. Пыим зэрарышхо къафихьыгъ къэлэ псэупIэхэм, промышленнэ ыкIи социальнэ инфраструктурэм, ау цIыфхэр къырагъэуцолIэнхэ алъэкIыгъэп — партизанэу бэ хэхьажьыгъагъэр, дзэ операциемэ ахэлажьэхэзэ текIоныгъэр къагъэблэгъагъ. Хы ШIуцIэмкIэ къэкIырэ дзэ купхэу шъхьафит операцием хэлэжьагъэхэм яшIуагъэкIэ, Мыекъуапэ 1943-рэ илъэсым ищылэ мазэ и 29-м нэмыцхэр дафыжьыгъэх, я 46-рэ дзэ частьхэр ары Адыгеим икъэлэ шъхьаIэ пыир щызэхэзыкъутагъэр.

Адыгеим и ЛIышъхьэу КъумпIыл Муратэ къыхигъэщыгъ: «Мыекъуапэ щыпсэухэрэмэ къиныбэ ащэчыгъэми, зыкъатыгъэп, ахэмэ япсэемыблэжьыгъэрэ ялIыхъужъыгъэрэ, шIулъэгъуныгъэу ячIыгу гупсэ фыряIэмрэ щысэ шIагъо бэмэ афэхъугъ. А лъэхъаным къалэм щыпсэущтыгъэмэ, ахэмэ ябэнэныгъэ шъхьэкIэфэныгъэ афэтшIызэ тшъхьэ афэтэуфэ. Мыекъуапэ шъхьафит зышIыжьыгъэмэ яшIэжь тэгъэлъапIэ».