Урысыем федеральнэ проектэу «Медицинэ кадрэхэр» зыфиIорэр щагъэцакIэ, ар цIыфхэм медицинэ IэпыIэгъу игъом ягъэгъотыгъэным ыкIи псауныгъэм икъэухъумэн системэ медицинэ кадрэхэм зэращыкIэрэм кIэух фэшIыгъэным афэгъэхьыгъ.

Проектыр хахьэ лъэпкъ проектэу «Тэрэзэу агъэзекIорэ ыкIи агъэкIыхьэрэ щыIэныгъэр» зыфиIорэм, УФ-м и Президент и Унашъоу «Урысые Федерацием лъэпкъ ыкIи стратегическэ пшъэрылъэу иIэхэр» зыцIэм къыдыхэлъытагъ. Урысыем щыпсэурэ цIыфхэм медицинэ IэпыIэгъоу арагъэкIырэм идэгъугъэ къэIэтыгъэныр, медицинэ организациехэм ащылажьэрэ медицинэ кадрэхэр зэтегъэпсыхьэгъэнхэр пшъэрылъэу дыряIэмэ ащыщых.

Iофыгъо шъхьаIэхэр:

— апэрэ медикэ-санитарнэ IэпыIэгъу зыщарагъэгъотырэ организациехэр икъу фэдизэу медицинэ кадрэхэмкIэ зэтегъэпсыхьэгъэнхэр;

— псауныгъэм икъэухъумэн системэ щылэжьэщт специалист ныбжьыкIэмэ IэпэIэсэныгъэ ин ягъэгъотыгъэныр;

— медицинэ IофышIэхэм зэпамыгъаоу яIэпэIэсэныгъэ хагъэхъонымкIэ амалышIухэр афэшIыгъэнхэр, джащ фэдэу пэIудзыгъэ гъэсэныгъэ технологиехэр къызфагъэфедэхэзэ ар агъэцэкIэныр;

— специалистхэм шъхьафит уасэ зафашIырэм, аккредитациер закIурэ ужым профессиональнэ IофшIэныр агъэцэкIэнымкIэ фитныгъэ ятыгъэныр.

Проектыр анахьэу зыфытегъэпсыхьагъэр практическэ лъэныкъор ары: апшъэрэ гъэсэныгъэ зыщызэрагъэгъотырэ медицинэ еджапIэхэм студентхэр яунэе IэзапIэмэ ащырагъаджэх, джащ фэдэу федеральнэхэм ыкIи яшъолъырхэм арыт медицинскэ ыкIи научнэ организациехэм. ГущыIэм пае, Мыекъопэ къэралыгъо технологическэ университетым хэхьэрэ Медицинскэ институтым истудентмэ чанэу практикэр ащахьы хэгъэгум ит медицинскэ учреждениехэу пэрытныгъэ зыIыгъхэм — 2025-рэ илъэсым игъэмэфэ мазэхэм студенти 8-мэ егъэджэн практикэр гражданскэ авиацием иклиническэ сымэджэщ Гупчэ истационар щахьыгъ, пащэу яIагъэр медицинэ шIэныгъэхэмкIэ докторэу, уролог-онкологэу, врач шъхьаIэм игуадзэу ПщыхьакIэ Ахьмэд. Джыри студенти 2-мэ Москва дэт кIэлэцIыкIу хирургиемкIэ ыкIи травматологиемкIэ НИИ-м (докторэу Л. М. Рошалым иклиник) ыкIи «НИИ скорой помощи имени Н. В. Склифосовского и НМИЦ нейрохирургии имени академика Н. Н. Бурденко» зыфиIохэрэм практикэр ащахьыгъ.

Ахэмэ афэшъхьафэу, проектым къыдыхэлъытагъэу къычIатIупщыхэрэмэ IофшIэпIэ чIыпIэ арагъэгъотыным пае шIыкIэхэр къагъотых, ащ шъолъыр медицинскэ гъэсэныгъэ кластерхэр колледжхэр ягъусэхэу къыхагъэлажьэх, специалист ныбжьыкIэхэр сэнэхьатым хащэх, кадрэ дефицитыр нахь макIэ ащашIы къэралыгъо медицинскэ организациехэм. Ащ фэдэ щысэу къэпхьын плъэкIыщт гурыт гъэсэныгъэу «ПрофиМед» зыфиIорэмкIэ гъэсэныгъэ кластерэу Iоныгъом и 2-м 2024-рэ илъэсым Мыекъопэ къэралыгъо технологическэ университетым хэхьэрэ Политехническэ колледжым къыщызэIуахыгъэр. Кластерыр непэрэ уахътэм диштэрэ материальнэ-техническэ базэ дэгъукIэ зэтегъэпсыхьагъ: хэушъхьафыкIыгъэ лабораториехэр ыкIи еджэпIэ кабинетхэу симуляционнэ Iэмэ-псымэхэр зычIэтхэр, студентмэ ахэмэ защагъасэ, IэпыIэгъу зэрарагъэкIыщтыр, цифрэ технологиехэр медицинэм зэрэрахьылIэхэрэм защагъэгъуазэ.

Федеральнэ проектэу «Медицинэ кадрэхэр» — ар системэ зыхэлъэу, псауныгъэм игъэпытэн ыкIи IэпэIэсэныгъэ зиIэ кадрэхэр хэгъэгум фегъэджэгъэнхэм якIурэ лъэубэкъу.