ЕджапIэм учIэсызэ студенческэ щыIакIэр зыфэдэр зэхэпшIэн плъэкIыщта, ащ улъыIэсышъущта? Ары, ащ фэдэ амал щыI. Урысые акциеу «Студенчествэм екIурэ лъэубэкъу» зыфиIорэм ащ фэдэ шIухьафтын кIэлэеджакIомэ къафишIыгъ, ар Апэрэхэм я Движение къыдыхэлъытагъэу ыкIи урысые студенчествэм и Мафэ тефэу агъэцэкIагъ.

МКъТУ-м икъутамэ истудентхэм-амбассадорхэм гъэсэныгъэ зэIукIэхэр сэнэхьатым икъыхэхын фэгъэхьыгъэхэу Тэхъутэмыкъое районым иеджэпIэ организациехэм ащырагъэкIокIыгъэх, кIэлэеджакIохэр студенческэ щыIэкIэ шъыпкъэм нэIуасэ фашIыгъэх, колледжым ыкIи университетым ащеджэнхэмкIэ амалэу щыIэхэр арагъэлъэгъугъэх.

Ахэмэ яплощадкэу хъугъэ гурыт еджапIэу № 3-у пос. Яблоновскэм дэтыр. Студентхэу-амбассадорхэу Кирилл Большовымрэ Владимир Рудьрэ егъэджэнымкIэ опытэу яIэр, апэрэ гъэхъагъэхэр, проектхэр ыкIи студенческэ щыIакIэр зыфэдэр кIэлэеджакIомэ къафаIотагъ. КIэлакIэмэ упчIэхэр зэхэщакIомэ аратыгъэх, анахьэу апшъэрэ еджапIэм узэрэчIэхьащт шIыкIэр ары зыгъэгумэкIыщтыгъэхэр, егъэджэн процессыр зэрэкIорэр, нэмыкIхэр. ЗэкIэ упчIэу аратыгъэмэ джэупхэр къаратыжьыгъэх.

Поселкэу Инэм дэт гурыт еджапIэу №6-м иапшъэрэ я 9-11-рэ классмэ ащеджэхэрэмэ афаIотагъ МКъТу-р непэрэ уахътэм диштэрэ гъэсэныгъэ учреждениеу зэрэщытыр — гурыт гъэсэныгъэм къыщыублагъэу профессиональнэм ыкIи апшъэрэм нэс егъэджэн процессыр зэкIэлъыкIоу зэрэщыкIорэр. Анахьэу анаIэ зытырагъэтырэр студентхэр научнэ проектхэм, зэнэкъокъухэм ыкIи грантовэ программэхэм зэрахэлажьэхэрэм, джащ фэдэу еджэным фэшъхьафхэу — гуфакIом, спортым, творчествэм, общественнэ IофшIэным алъэныкъокIэ амалышIухэр зэрагъэгъотыхэрэр къафыхагъэщыгъ.

Акциеу «Студенчествэм екIурэ лъэубэкъу» зыфиIорэр Адыгэ республикэ гимназием щеджэрэ кIэлэеджакIохэу я 5-рэ классым исхэм апае зэхащэгъагъ. КIэлэеджакIохэр нэIуасэ фэхъугъэх МКъТУ-м илечебнэ факультет истуденткэу, Урысые движениеу «ГуфакIохэр-медикхэр» зыфиIорэм апэрэ IэпыIэгъу ягъэгъотыгъэнымкIэ иинструкторэу Джанета Башировам. Ащ къафиIотагъ медицинэ сэнэхьатхэр зыфэдэхэр, гуфэкIо IофшIэнымрэ сэнэхьатымрэ зэрэзэпхыгъэ шIыкIэхэр.

Я 9-рэ классым щеджэрэмэ апае МКъТУ-м чIыгу гъэпсынымкIэ икафедрэ идоцентэу, экономикэ шIэныгъэхэмкIэ кандидатэу Ирина Селивановар лекцие къеджагъ, ар сэнэхьатым, апшъэрэ еджапIэу къыхахыщтыр зэрэнахьышIур, студенческэ щыIакIэм шIуагъэу пылъхэр еджакIомэ афиIотагъэх.

Акциеу «Студенчествэм екIурэ лъэубэкъу» зыфиIорэм къыгъэлъэгъуагъ: студенчествэр чIэхьэгъум ыпэкIэ къежьэ. Анахь шъхьаIэр — уицыхьэ зытелъыжьыныр, пшъэрылъыр гъэуцугъэныр ыкIи уинеущрэ мафэ уфэкIоныр. ОГЭ-м ыкIи ЕГЭ –м шъуапхырыкIых — студенческэ щыIакIэр къышъуажэ!