Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо иIагъ, ащ тхьаматагъор щызэрихьагъ МКъТУ-м иректорэу Къуижъ Саидэ.

Хабзэ зэрэхъугъэу, профессорскэ-кIэлэегъэджэ купым щыщхэу зимэфэкIыгъэхэм ыпэ рапшIэу афэгушIуагъэх, ащ ыуж повесткэм хэт упчIэмэ язэхэфын фежьагъэх.

Iофыгъоу «Политехническэ колледжым профессиональнэ ухьызырыныгъэу СПО программэмкIэ къагъэлъагъорэм идэгъугъэ уасэ зэрэфашIырэ системэр гъэпсыгъэныр» зыфиIорэм тегущыIагъэх, ащ фэгъэхьыгъэ джэпсалъэ къышIыгъ колледжым ипащэу ХъутIыжъ Заурбэч. Докладым къызэрэщыхигъэщыгъэмкIэ, джырэкIэ щыIэ системэу программэм идэгъугъэ уасэ фэзышIырэм, кIэлэеджакIомэ яшIэныгъэхэр зыфэдэхэр зыушэтырэм, экономикэм исектор лъэныкъо диштэу зэрэгъэпсыгъэм уагъэрэзэнэу щыт. Ау, ащ дакIоу IофшIэныр нахьышIу шIыгъэнымкIэ лъэныкъо ыкIи пшъэрылъ шъхьаIэхэр къыгъэнэфагъэх. Ахэмэ ащыщых — егъэджэнымкIэ шапхъэу щыIэхэр, интерактивнэ методхэр гъэлъэшыгъэнхэр, апэрэ курсым къычIахьэхэрэр хэгъэгъозэгъэнхэм фэгъэхьыгъэ IофшIэным егугъугъэныр, джащ фэдэу  медицинскэ сэнэхьатхэм афеджэхэрэр апэрэ аккредитациехэм афэгъэхьазырыгъэнхэр.

Гъэсэныгъэ программэу бакалавриатым шъхьафит уасэ фэшIыгъэным, ар экономикэм ыкIи гъэIорышIэным яфакультет зэрэщагъэцакIэрэм къытегущыIагъ деканэу Ешыгоо Светланэ. УпчIэм зытегущыIэхэм ыуж Мыекъопэ къэралыгъо технологическэ университетым ишIэныгъэлэжьхэм ясовет унашъо ышIыгъ:  шъуашэу ыкIи шIыкIэу уасэ гъэсэныгъэ процессым фэшIыгъэнымкIэ щыIэхэм зягъэушъомбгъугъэныр, ащкIэ егъэджэным пае шIуагъэ къэзытырэ ыкIи къэзымытырэ лъэныкъохэр къыхэгъэщыгъэнхэр, егъэджэным идэгъугъэ къэIэтыгъэныр; УФ-м и Президент ыкIи УФ-м и Правительствэ ястипендиехэр къэзыхьыгъэхэм Iоф адэшIэгъэныр, сэнаущыгъэ зыхэлъ анахь студент дэгъухэр шIэныгъэ-ушэтын IофшIэным хэщэгъэнхэр, грантхэм якъыдэхын, федеральнэ ыкIи дунэе зэнэкъокъухэм ахэгъэлэжьэгъэнхэр.

НыбжьыкIэ политикэмкIэ ыкIи гъэсэкIо IофшIэнымкIэ МКъТУ-м ипроректорэу БрантIэ Мурат 2025-рэ илъэсым IофшIэнэу агъэцэкIагъэм зэфэхьысыжьхэр къыфишIыгъэх. Ащ къызэрэхигъэщыгъэмкIэ гъэсэкIо IофшIэныр МКъТУ-м системэ гъэнэфагъэ хэлъэу щагъэцакIэ, лъэныкъуабэ къызэдаубыты: гражданскэ-патриотическэ пIуныгъэм, деструктивнэ зекIуакIэм пэшIорыгъэшъэу идэгъэзыжьын,  студенческэ зыгъэIорышIэжьыным, гуфэкIо ыкIи социальнэ чаныгъэ къахэфэным Iоф адашIэ. Илъэсым къыкIоцI ныбжьыкIэ политикэмкIэ гъэIорышIапIэм Iофтхьабзэ зэфэшъхьафыбэ экстремизмэм, терроризмэм апэшIуекIогъэнхэм афэгъэхьыгъэхэу, джащ фэдэу зэмызэгъыныгъэ къахэзылъхьэрэ  идеологием ебэныгъэным, студентхэм яинформационнэ щынэгъончъагъэ къызэлъызыубытырэ зэхахьэ пчъагъэ рагъэкIокIыгъ. IофшIэнымкIэ мэхьанэшхо иIэу щыт университетым ипсихологическэ къулыкъу, еджэхэрэр зыгъэгумэкIырэ упчIэхэр ащ рахьылIэх, джэуапэгъу къафэхъух, ежьхэми студентхэр хэгъэгъозэгъэнхэм афэгъэхьыгъэ Iофтхьабзэхэр щырагъэкIокIых. Анахьэу анаIэ зытырагъэтыщтыгъэр патриотическэ пIуныгъэр, культурнэ-зыгъэпсэфыгъо ыкIи гъэсэныгъэ Iофтхьабзэхэр ары. Университетым акцие зэфэшъхьафхэр ыкIи мэфэкI концертхэр щызэхащагъэх, команднэ IофшIэныр зыщагъэлъэшырэ шапхъэхэри къыщыхахыгъэх, студентхэр студенческэ щыIакIэм хащагъэх. ГъэсэкIо IофшIэнэу 2025-рэ илъэсым зэхащагъэхэм яшIуагъэкIэ, ныбжьыкIэмэ зызыдагъэзэщт лъэныкъо шъхьаIэхэр къафыхахыгъэх, ясоциальнэ чаныгъэ агъэлъэшыгъ.

ШIэныгъэлэжьхэм ясовет нормативнэ ыкIи зэхэщэкIо упчIэхэм ахаплъагъэх ыкIи унашъохэр ыштагъэх. Мыекъопэ къэралыгъо технологическэ университетым узэрэчIэхьащтым пылъ шэпхъакIэхэр советым ыгъэнэфагъэх, гъэсэныгъэ лъэныкъохэу  бакалавриатым, специалитетым ыкIи магистратурэм  2026-2027-рэ еджэгъу илъэсым ателъытагъэу, джащ фэдэу бюджетнэ чIыпIэу щыIэщтхэм яконтрольнэ цифрэхэр мы программэхэмкIэ. Ащ фэшъхьафэу шIэныгъэлэжьхэм ясовет научнэ ыкIи научнэ-кIэлэегъэджэ кадрэхэр аспирантурэм щыгъэхьазырыгъэнхэмкIэ 2026-2027-рэ еджэгъу илъэсым щеджэщтхэр зэрэчIэхьащтхэ шапхъэхэр ыкIи ателъытэгъэ контрольнэ цифрэхэр аштагъэх.  

Зэхэсыгъом икIэухым шIэныгъэлэжьхэм ясовет хэтхэм зэдырагъэштагъ шIэныгъэлэжь цIэ лъапIэу профессорыр Хъоткъо Зуретэ фэгъэшъошэгъэным — гъомлапхъэхэм ятехнологиехэм ыкIи шхыныгъохэм ягъэхьазырынкIэ кафедрэм ипащэ, техническэ шIэныгъэхэмкIэ докторым, доцентым.

Унашъоу агъэнэфагъэхэр зэкIэ Мыекъопэ къэралыгъо технологическэ университетм хэхъоныгъэхэр егъэшIыгъэнхэм, игъэсэныгъэ, научнэ ыкIи ипIуныгъэ IофшIэн афытегъэпсыхьагъэх.