2025-рэ илъэсым Адыгеим гъэсэныгъэ Iофтхьабзэ 600-м ехъу щырагъэкIокIыгъ, ахэмэ Урысые обществэу «ШIэныгъэр» якIэщэкIуагъ, Адыгэ Республикэм и Правительствэ яIэпыIэгъугъ. Лекциехэм, викторинэхэм, тематическэ кинокъэгъэлъэгъонхэм, интеллектуальнэ джэгукIэхэм шъолъырым щыпсэурэ нэбгырэ мин 19-м ехъу ахэлэжьагъэх. Обществэу «ШIэныгъэм» ишъолъыр отделение Мыекъопэ къэралыгъо технологическэ университетым щэлажьэ, МКъТУ-м иректорэу Къуижъ Саидэ ащ ишъолъыр лIыкIоу щыт.

Урысые обществэу «ШIэныгъэм» икъутамэу Адыгеим щыIэм ипащэу Галина Измайловам къызэриIотагъэмкIэ, гъэсэныгъэ IофшIэнышхо тишъолъыр блэкIыгъэ илъэсым щагъэцэкIагъ: «Шъолъырым игъэсэныгъэ организациехэм тырягъусэу, лекторскэ сообществэм, гъэсэныгъэмрэ шIэныгъэмрэкIэ Адыгэ Республикэм и Министерствэ тиIэпыIэгъоу 2025-рэ илъэсым хэхъоныгъэхэр тшIыгъэх, гъэсэныгъэ проект пчъагъэхэр дгъэцэкIагъэх. Апэрэу нахьыжъхэр, Iоф зышIэрэ ныбжьыкIэхэр ыкIи сабый зиIэ унагъохэр зыхэлэжьэгъэхэ Iофтхьабзэхэр редгъэкIокIыгъэх».

Адыгеим щыпсэухэрэр урысые зэнэкъокъухэу ыкIи акъылыгъэ зыхэлъ зэнэкъокъухэу Обществэу «ШIэныгъэм» зэхищэрэмэ чанэу ахэлэжьагъэх. Ащ дакIоу, ежьхэм яджэгукIэ модельхэр, джэгуалъэхэр зэхагъэуцуагъэх, ахэр зэнэкъокъоу «Джэгуалъэ гупсэр» зыфиIорэм къыщагъэлъэгъуагъэх, гъэсэныгъэ IэпэIэсэныгъэ IофшIэным шъхьадэкIыгъэ Iофыгъоу ахэр щытыгъэх, ащ дакIоу проектэу «ШIэныгъэр.Лекторыр» зыфиIорэм изещакIоу щытышъущтхэмэ еплъыгъэх, республикэм икIэлэегъаджэхэр профессиональнэ IэпэIэсэныгъэмкIэ зэнэкъокъоу «Урысыем ианахь кIэлэегъэджэ-библиотекарь дэгъу» зыфиIорэм зыщаушэтыгъ.

Ны-ты сообществэм шъолъырым чанэу щыдэлэжьагъэх. ГущыIэм пае, ны-ты комитетым ипроектэу шъолъырым къыгъэлъэгъуагъэр ны-ты сообществэхэм язэнэкъокъу иятIонэрэ едзыгъо щытекIуагъ ыкIи ахъщэ шIухьафтын ащ игъэцэкIэн пэIуагъэхьанэу къаратыгъ.

— «Шъолъыр къутамэм ыпэ рапшIэу ынаIэ зытыригъэтырэр проектхэу гъэсэныгъэ-пIуныгъэм, патриотическэу ныбжьыкIэхэр гъэсэгъэнхэм афэгъэхьыгъэхэм, уахътэм диштэхэрэр ары, — къыддэгощагъ Обществэу «ШIэныгъэм» ишъолъыр отделение ипащэу, Мыекъопэ къэралыгъо технологическэ университетым иректорэу Къуижъ Саидэ, — Тэ типшъэрылъыр – шIэныгъэхэр яттын закъор арэп, ныбжьыкIэ лIэужым хэхъоныгъэ тапэкIэ ышIыным пае гукъыдэчъ зэрядгъэгъотыщт шIыкIэми тыфэбанэ».

Ащ фэшъхьафэу, Адыгэ Республикэм еджэпIэ литературнэ клубхэм язэхэщэн IофшIэным хэлажьэу ыублагъ. «ЕджэкIо программэхэр» зыфиIорэ проектым ишIуагъэкIэ ахэр еджэпIэ организациехэм къащызэIуахых, проектыр зыгъэцакIэрэр Обществэу «ШIэныгъэр» ары, гъэсэныгъэмкIэ УФ-м и Министерствэ иIэпыIэгъу, Президентэу Владимир Путиным иунашъо игъэцэкIэн къыделъытэ. Непэрэ мафэм ехъулIэу шъолъырым ащ фэдэ клуби 4 къыщызэIуахыгъ, художественнэ литературэм еджэх, произведениехэр зэхафы, шIэныгъэхэмкIэ зауплъэкIужьы.

Урысые обществэу «ШIэныгъэм» ипроектмэ янахьыбэрэр лъэпкъ проектэу «НыбжьыкIэхэр ыкIи кIэлэцIыкIухэр» зыфиIорэм елъытыгъэу агъэцакIэх. Илъэсым къыкIоцI мыщ фэдэ проектхэм апылъыгъэх: «ШIэныгъэр.Лекториер», «ШIэныгъэр», «ЛIыхъужъхэр», «ШIэныгъэр.Спортыр», «ШIэныгъэр.Премиер», «ШIэныгъэр.Лекторыр».

«ШIэныгъэр» — хэгъэгумкIэ анахь гъэсэныгъэ организацие инэу щыт, гъэ къэс Iофтхьабзэ шъэ пчъагъэ Урысыем иныбжьыкIэхэм апае регъэкIокIы: культурэм, искусствэм, наукэм, тарихъым алъэныкъокIэ лекцие мин пчагъэ зэлъашIэрэ цIыфмэ къаты. Лектормэ нэбгырэ мин 32-м ехъу зэращэлIагъ, лекцие мин 200-м ехъу УФ-м исубъект 89-мэ къащатыгъ. Сыхьат 8100-рэ гъэсэныгъэ контентэу темэ зэфэшъхьафхэмкIэ зэхащагъэх: наукэм, технологием, космосым, культурэм ыкIи искусствэм, тарихъым, медицинэм, спортым алъэныкъокIэ ыкIи нэмыкIхэмкIэ. Онлайн-трансляциехэу «ШIэныгъэм» иIофтхьабзэхэр къызщатыгъэхэм гъэсэныгъэ видеоконтентхэм нэбгырэ млрд. 2,5-м ехъурэр яплъыгъэх. Къэбар игъэкIотыгъэр мы темэмкIэ ижъугъотэщт мы — сайым ыкIи социальнэ хъытыухэм: ВКонтакте, Telegram.