Хабзэ зэрэхъугъэу Мыекъопэ къэралыгъо технологическэ университетым зипсауныгъэ фыкъуагъэ зиIэ студентмэ апае илъэсыкIэ щае ешъоныр щызэхащагъ. Автомобильнэ транспортымкIэ кафедрэм ипащэу, апшъэрэ еджапIэм итьютормэ якомандэ иIэшъхьэтетэу Наталья Машининар ары Iофтхьабзэр зэхэзыщагъэр, егъэджэн IофшIэнымкIэ проректорэу Людмила Задорожнаяр яIэпыIэгъугъ.

Пстэуми апэу Людмила Иван ыпхъум къэзэрэугъоигъэхэм ИлъэсыкIэ мэфэкI мафэу къэблагъэрэмкIэ афэгушIуагъ, сессиер дэгъоу атынэу, ягухэлъхэр зэкIэ къадэхъунхэу ыкIи мамыр щыIакIэ яIэнэу афэлъэIуагъ. Джащ фэдэу студентмэ афэгушIуагъ ныбжьыкIэ политикэмкIэ ыкIи гъэсэкIо IофшIэнымкIэ гъэIорышIакIом ипащэу Ирина Ширинар.

МэфэкI Iофтхьабзэм ыгу ригъэхъыкIыгъэхэмкIэ къыддэгощагъ МКъТУ-м ипресс-къулыкъу иIофышIэу Николай Соколовыр, ари гуфэбагъэ зыхэлъыгъэ Iофтхьабзэм хэлэжьагъ:

— Сэ мы мэфэкI Iофтхьабзэм фэбагъэ къыситыгъ. Щае ешъоным ыкIыб дэтыгъэх сэнаущыгъэ зыхэлъхэр, гущыIэ къодыекIэ ахэмэ уакъытегущыIэшъущтэп, ахэр плъэгъунхэ ыкIи зэхэпшIэнхэ фае. Нэбгырэ пэпчъ шIухьафтын къодыеп къыздихьыгъэр, шъхьадж итарихъ щыщ пычыгъом щигъэгъозагъэх. Анахьэу тыгу къинэжьыгъ Вероника Монисовар. Ащ сурэтхэр зыхэт мэфэпчъэу итьюторэу Наталья Шумафэ ыпхъум фэгъэхьыгъэу къыгъэхьазырыгъэр къыздихьыгъ — гум нэсырэ IофшIагъ. Мэфэпчъым ишIынкIэ Вероникэ сервисэу Flyvi ыгъэфедагъ, ащ къызэрэтегущыIэрэмкIэ нэфагъэ хэхъоныгъэхэр зэришIыхэрэр. Коллажым иIэпэIэсэныгъэкIэ Вероникэ къыдэIэпыIэ Евгений Кутилкиныр — ар МКъТУ-м истудент, ащ иIофшIагъи дгъэшIэгъуагъэ: наукэмкIэ Шведскэ королевскэ академием къыгъахьыгъэ тубусэу плакатхэр зытетхэр, Нобелевскэ премиехэр химиемкIэ, физикэмкIэ ыкIи экономикэмкIэ зыгъэнафэрэм. Дунэе наукэм тенэсыгъэм фэдагъ. Гуфэбагъэ хэлъэу пхъэм хэшIыкIыгъэ шыхэр къэтэплъыхьэх — къихьащт илъэсым итамыгъэ, ахэр къыщагъэх Андрей Жаровым. Сэ (Николай Соколовым), университетым сыкъычIитIупщыгъ ыкIи а дэдэм Iоф щысэшIэ, сиеджэнрэ сиIофшIэнырэ опытэу сагъэгъотыгъэмкIэ кIэлакIэмэ садэгощагъ, укъэуцу зэрэмыхъущтыр, къыбдэхъугъэм хэбгъахъозэ щыIэныгъэм ущылъыкIотэн зэрэфаер къафэсIотагъ. МэфэкIым хэтыгъэх орэдхэр, зэнэкъокъухэр, гушIогъо такъикъхэр — зэкIэри гум къикIэу, дахэу рекIокIыгъэх. Джыри зэ згъэунэфыгъэ: сэнаущыгъэ зыхэлъмэ зыкъызэIуахыным пае унаIэ атебгъэтын, гуфэбагъэкIэ уапэгъокIын фае.