Мыекъопэ къэралыгъо технологическэ университетым Урысые научнэ-практическэ конференциеу «Туристскэ-рекреационнэ сферэм инвестициехэр къещэлIэгъэнхэмкIэ упчIэ шъхьаIэхэр» зыфиIорэр щыкIуагъ.

Урысыем ит апшъэрэ еджапIэхэр, шIэныгъэ еджапIэхэр, туризмэм, экономикэм ыкIи гъэIорышIэным афэгъэзэгъэ экспертхэр ыкIи ныбжьыкIэ ушэтакIохэр Iофтхьабзэм хэлэжьагъэх. Хэлажьэрэмэ анахьэу анаIэ зытырадзэрэр — инвестиционнэ стратегиехэм, цифрэ инновациехэм, къэралыгъо IэпыIэгъум ыкIи культурнэ кIэным япхыгъэ упчIэхэр ары, ахэмэ туризмэм хэхъоныгъэ арагъэшIыщт.

Мыекъопэ къэралыгъо технологическэ университетыр научнэ Iофтхьабзэм изэхэщэкIуагъ ыкIи анахь площадкэ шъхьаIэуи щытыгъ. ЗэхэщакIо гъусэгъоу иIагъэхэр: физическэ культурэмкIэ Пшызэ къэралыгъо университетыр, Пшызэ къэралыгъо технологическэ университетыр, спортымрэ туризмэмрэкIэ Московскэ къэралыгъо университетыр, Темыр-Кавказскэ федеральнэ университетыр, джащ фэдэу Нижнетагильскэ къэралыгъо социальнэ-педагогическэ институтыр (къутамэр) РГППУ.

Конференциер шъолъырымкIэ научнэ хъугъэ-шIэгъэшхуагъ, ушэтакIохэу Мыекъуапэ, Краснодар, Москва, Налщыкъ, Шъачэ, Ростов-на-Дону ыкIи Нижний Тагил ащыщхэр зэфищагъэх. Iофтхьабзэм шапхъэу иIэм амал къытыщтыгъэ туризмэм иинвестиционнэ политикэ итеоретическэ лъэныкъохэм афэдэу практическэ кейсхэу туристскэ шъолъырхэм ахэзгъахъохэрэми атегущыIэшъунхэу.

Туристскэ-рекреационнэ сферэм хэхъоныгъэхэр егъэшIыгъэнхэм афэгъэхьыгъэ инвестиционнэ стратегиехэм апэрэ секцием щыхэплъагъэх. Секциием изещакIоу, экономикэ шIэныгъэхэмкIэ кандидатэу, маркетингым, сервисым ыкIи туризмэм якафедрэ ипащэу ыкIи доцентэу КъумпIыл Анжеликэ идоклад къыщыхигъэщыгъэх социальнэ-экономическэ шIуагъэу инвестициеу туристскэ инфраструктурэм халъхьагъэмэ къатыхэрэр. Секцием хэлажьэрэмэ анаIэ тырадзагъ инвестиционнэ амалэу «тыжьын» туризмэм къытырэм ыкIи wellness-лъэныкъом, промышленнэ, мэкъу-мэщ шъолъырхэм яредевелопментэу рекреационнэ проектхэмкIэ агъэпсыхэрэм, туризмэм пае инфраструктурэм хэхъоныгъэу рагъэшIырэм, джащ фэдэу инвестиционнэ проектхэу санаторнэ-курортнэ сферэм фэгъэхьыгъэхэм апае агъэпсыхэрэм. Шъхьафэу инвестиционнэ Iалъмэкъым ыкIи туристскэ-рекреационнэ предприятиехэм федэу къатыхэрэмэ атегущыIагъэх.

Секциеу инновациехэм ыкIи технологиехэм афэгъэхьыгъагъэр туристскэ отраслым ицифрэ трансформацие фэгъэхьыгъагъ, инвестициехэр къезыщалIэхэрэмэ яIофыгъо шъхьаIэу щытым. ЗещакIоу Елена Панинэр ягъусэу секцием хэлажьэрэмэ шъолъырым инвестициехэр хэлъхьэгъэнхэмкIэ цифровизацием мэхьанэу иIэм, цифрэ гидхэр хэщэгъэнхэм, акъылыгъэ зыхэлъ туристскэ дестинациехэм ыкIи ахэр гъэIорышIэгъэнхэм афэшI шIэгъэн фаехэм атегущыIагъэх. IэрышI интеллектым шIуагъэу мы IофымкIэ къытырэм, аналитикэр зэрагъэпсырэм, ащкIэ туристскэ-рекреационнэ комплексхэм яэкономическэ зыпкъитыныгъэ зэрагъэзафэрэм ягугъу ашIыгъ. Къушъхьэ туризмэм хэхъоныгъэхэр егъэшIыгъэнхэм, инвестициехэр зыфэдэ къэмыхъугъэ чIыопс шъолъырхэм къящэлIэгъэнхэм апае ашIэщтхэм ягупшысагъэх.

Ящэнэрэ секциеу туристскэ-рекреационнэ сферэм иинвестиционнэ IофшIэн къэралыгъо IэпыIэгъу етыгъэным шIыкIэхэр къыфэгъотыгъэнхэм афэгъэхьыгъагъ. Хэлэжьагъэмэ къэралыгъо IэпыIэгъум мультипликативнэ шIуагъэу къытыщтым, спортивнэ ыкIи культурнэ Iофтхьабзэ инхэу шъолъыр экономикэм хэзгъэхъощтхэм, джащ фэдэу хэушъхьафыкIыгъэ финансовэ амалхэу инвестициехэм апае щыIэхэм атегущыIагъэх. Шъхьафэу инклюзивнэ ыкIи унэгъо туризмэм, къэлэ туризмэм ишIуагъэкIэ Iэрыфэгъу щыIакIэ къэлэдэсмэ яIэ зэрэхъурэм ыкIи фэшъхьафхэм ягугъу ашIыгъ.

Культурнэ кIэным фэгъэхьыгъэ секцием шъолъырым инвестициехэр къещэлIэгъэнхэм а лъэныкъор зэрэхэлажьэрэр къыщыхагъэщыгъ. Непэрэ шIыкIэу щыIэхэр агъэфедэзэ культурнэ кIэныр цифрэм тещэгъэным, культурнэ кодым шъолъырымкIэ мэхьанэу иIэм ыкIи туристскэ-краеведческэ IофшIэнымрэ гушъхьэ лэжьыгъэмрэ къызэраухъумэщтхэм атегущыIагъэх. Анахьэу анаIэ тырадзагъ туризмэм щылэжьэщт специалистмэ япрофессиональнэ амалхэм ыкIи ныбжьыкIэхэр а Iофым къещэлIэгъэнхэм.

Конференцием икIэух секцие зэрищэлIагъэх шIэныгъэлэжь ныбжьыкIэхэр ыкIи магистрантхэр, IэкIоцI туризмэм хэхъоныгъэ егъэшIыгъэнымкIэ ушэтын IофшIагъэхэр къэзгъэлъэгъуагъэхэр. Докладмэ шъолъырым ибренд-менеджментым, постпандемическэ зэхъокIыныгъэхэу туризмэм хэхъухьэхэрэм, хьакIэщ бизнесыр цифрэм тещэгъэным, IэрышI интеллектыр гъэфедэгъэным афэгъэхьыгъагъэх.

Зэфэхьысыжьхэр пшIыхэмэ, Урысые научнэ-практическэ конференциеу «Туристскэ-рекреационнэ сферэм инвестициехэр къещэлIэгъэнхэмкIэ упчIэ шъхьаIэхэр» зыфиIоу МКъТУ-м щыкIуагъэм шIуагъэ къытыным ущыгугъунэу щыт, научнэ гукъэкIхэмкIэ опытхэмкIэ ащ щызэхъожьыгъэх. Докладэу къыщашIыгъэмэ къагъэлъэгъуагъ узэхэтэу туризмэм инвестициехэр къещэлIэгъэнхэ Iофым укъекIуалIэмэ пшъэрылъыр зэрагъэцэкIэщтыр, экономическэ, технологическэ, социальнэ ыкIи культурнэ лъэныкъохэри ащ зэрипхыщтых.