Непэ къызыхъугъэ мэфэкI мафэр хегъэунэфыкIы Мыекъопэ къэралыгъо технологическэ университетым конституционнэ гъэпсынымкIэ, къэралыгъо ыкIи муниципальнэ гъэIорышIэнымкIэ икафедрэ ипрофессорэу, философие шIэныгъэхэмкIэ докторэу, социальнэ технологиехэм ыкIи шъолъыр (муниципальнэ) гъэIорышIэкIо практикэхэм я Академие итхьаматэу Азащыкъ Геннадий Хьасанбый ыкъом.

Геннадий Хьасанбый ыкъом Адыгэ къэралыгъо кIэлэегъэджэ институтым тарихъымрэ правэмрэ яфакультет къыухыгъ. Ипрофессиональнэ IофшIэн 1988-рэ илъэсым тарихъым, обществоведением ыкIи советскэ правэм якIэлэегъаджэу Мыекъуапэ дэт гурыт еджапIэу №19-м щыригъэжьагъ. 1994-м Мыекъопэ къэралыгъо технологическэ институтым (джырэкIэ МКъТУ) кIэлэегъэджэ шъхьаIэу, гуманитарнэ дисциплинэхэм якафедрэ ипащэ иIэнатIэ ыгъэцакIэу IофшIэныр щеублэ. Апшъэрэ еджапIэр зыщагъэпсырэ, зыщыуцурэ лъэхъаным егъэджэн пособиехэм ятхынкIэ иIахьышхо ащ къэкIуагъ, университетым игъэсэныгъэ программэмэ лицензионнэ экспертизэ акIуным Iоф дишIагъ. 1997-рэ илъэсым ащ кандидатскэ диссертациер къыухъумагъ, темэу иIагъэр: «Адыгеир Хэгъэгу зэошхом илъэхъан», зыщиухъумагъэр Московскэ къэралыгъо педагогическэ университетыр ары. 2005-рэ илъэсым Геннадий докторскэ диссертациер дэгъу дэдэу къыухъумагъ, темэу иIагъэр: «Социокультурная среда и специфика регионального управления». 1997-м къыщегъэжьагъэу 2006-рэ илъэсым нэс МКъТУ-м философиемрэ социологиемрэ якафедрэ ипащагъ, 2006-рэ илъэсым итыгъэгъазэ мазэ къыщыублагъэу 2013-м нэс — къэралыгъо ыкIи муниципальнэ гъэIорышIэным.

Профессорэу Азащыкъ Геннадий чанэу научнэ, гъэсэныгъэ ыкIи общественнэ IофшIэнхэм ахэлажьэ. 1999-рэ илъэсым къыщегъэжьагъэу докторэу, социальнэ технологиехэм ыкIи шъолъыр (муниципальнэ) гъэIорышIэкIо практикэхэм я Академие апэ член-корреспондентэу, ащ ыуж Адыгэ республикэ отделением итхьаматэу щытыгъ, 2006-рэ илъэсым къыщыублагъэу — АН СТиМС-м иакадемик. Илъэс зэфэшъхьафхэм социологическэ ушэтын инхэм ягъэцэкIэн Iофхэм ахэлэжьагъ, ащкIэ гъусэгъоу иIагъэх РАН-м социологиемкIэ и Институт, РУДН-м социологиемкIэ икафедрэ. Научнэ-практическэ конференцие зэфэшъхьафхэм язэхэщэкIуагъ, научнэ тхылъмэ пшъэдэкIыжьыр зыхьырэ редакторэу яIагъ. Научнэ тхыгъи 100-м нахьыбэу къыхаутыгъэмэ яавтор, ахэмэ монографиехэу ыкIи егъэджэн пособиехэу гъэсэныгъэмрэ шIэныгъэмрэкIэ УФ-м и Министерствэ къытыгъэ фитыныгъэм елъытыгъэу къыдэкIыгъэхэр боу ахэтых. Научнэ пэщэныгъэ адызэрихьэзэ шIэныгъэхэмкIэ кадидатхэу нэбгыри 5 ыгъэхьазырыгъ, аспирантхэу ыкIи соискательхэу нэбгыри 3-мэ яIэшъхьэтет. Научнэ IофшIэным дакIоу Геннадий Хьасанбый ыкъом кIэлэегъэджэ Iофым чанэу пылъ, къэралыгъо ыкIи муниципальнэ гъэIорышIэнымкIэ, социальнэ гъэIорышIэнымкIэ, таможеннэ IофымкIэ, лъэпкъ зэфыщытыкIэхэмкIэ ыкIи непэрэ уахътэм диштэрэ гъэIорышIэнымкIэ курсхэм къяджэ. Бакалавриатым ыкIи магистратурэм студентхэр зэрэщырагъаджэрэ егъэджэн-методическэ тхыгъэхэр ыгъэхьазырыгъэх ыкIи къыдигъэкIыгъэх.

Азащыкъ Геннадий къэралыгъо, ведомственнэ ыкIи общественнэ бгъэхалъхьэхэр боу къыфагъэшъошагъэх: М.В. Ломоносовым иорден (2007); ЩытхъуцIэу «Адыгэ Республикэм наукэмкIэ изаслуженнэ IофышI» (2008); Адыгэ Республикэм и Къэралыгъо Совет-Хасэм и Щытхъу тхылъ; медалэу «300 лет Михаилу Васильевичу Ломоносову». 2013-рэ илъэсым ветеранскэ движением, къыткIэхъухьэрэ лIэужхэр патриотическэу пIугъэнхэм иIахьышхо зэрахэлъым ыкIи научнэ-кIэлэегъэджэ IофшIэным чанэу зэрэхэлэжьагъэм афэшI Адыгэ Республикэм и Къэралыгъо Совет-Хасэм и Щытхъу тамыгъэу «Закон. Долг. Честь» зыфиIорэр къыфагъэшъошагъ. 2015-рэ илъэсым заом иветеранхэм (пенсионерхэм), IофшIэным, уIэшыгъэ кIуачIэхэм ыкIи ухъумэкIо органхэм я Урысые общественнэ организацие иапшъэрэ бгъэхалъхьэу Щытхъу тамыгъэр къыфагъэшъошагъ. ГъэсэныгъэмкIэ УФ-м и Министерствэ и Щытхъу тхылъ (2003), гъэсэныгъэмрэ шIэныгъэмрэкIэ УФ-м и Министерствэ и Щытхъу тхылъхэр (2007, 2013) къыратыгъэх. 2021-рэ илъэсым щытхъуцIэу «IофшIэным иветеран» зыфиIорэр къыфаусыгъ. Дзэ-патриотическэ ыкIи гуфэкIо IофшIэным чанэу зэрэхэлажьэрэм, ныбжьыкIэхэр патриотическэу зэрипIухэрэм афэшI, Iофтхьабзэхэу экскурсионнэ тематическэ мэшIокоу «Сила в правде» (2024); Адыгэ шъолъыр отделениеу ВПП «Единая Россия» зыфиIорэм иIэм гуфэкIо IофшIэнэу ащигъэцэкIагъэхэм апае (2025) къалэу Мыекъуапэ иадминистрацие и Щытхъу тхылъхэмрэ Рэзэныгъэ тхылъхэмрэ бэрэ къыратыгъэх.

Геннадий Хьасанбый ыкъом иIофшIэн чIыпIэшхо щаубыты патриотическэ ыкIи общественнэ Iофхэм. 2017-рэ илъэсым МКъТУ-м хэхьэрэ Политехническэ колледжым юнармейскэ отрядэу «Фишт» зыфиIорэр къыщызэIуихыгъ. Ар ветеранскэ движением, къалэу Мыекъуапэ и Общественнэ палатэ, ветеранхэм якъэлэ совет, ныбжьыкIэ ыкIи патриотическэ Iофтхьабзэхэм чанэу ахэлажьэ.

Лъытэныгъэ зыфэтшIырэ Геннадий Хьасанбый ыкъор!

Мыекъопэ къэралыгъо технологическэ университетым иIофшIэкIо куп агу къадеIэу уимэфэкI мафэмкIэ къыпфэгушIох! Илъэсыбэхэм къакIоцI Iофэу пшIагъэм, научнэ гъэхъагъэу пшIыгъэхэм, университетым хэхъоныгъэ егъэшIыгъэным уиIахьышхоу хэлъым, ныбжьыкIэхэмэ ягъэсэныгъэ ыкIи патриотическэ уасэ зиIэхэр зэрэбгъэпытэхэрэм афэшI шъхьэкIэфэныгъэр къэблэжьыгъ. Тэ лъэшэу тыпфэраз МКъТУ-м иуцун ыкIи хэхъоныгъэхэр ышIынхэм уиIахь зэрэхэплъхьагъэм, уисэнэхьат узэрэфэшъыпкъэм, пшъэдэкIыжьэу пхьырэр зэрэзэхапшIэрэм ыкIи уишIэныгъэхэмкIэ ныбжьыкIэхэм уазэрэдэгуащэрэм апае. Тыгу къыддеIэу тыпфэлъаIо псауныгъэ пытэ уиIэнэу, научнэ гъэхъэгъакIэхэр пшIынхэу, уигухэлъхэр къыбдэхъунхэу, уиунагъо, зэкIэ уигупсэхэм уадэтхъэжьэу ущыIэнэу! Мафэ къэс Iофэу бгъэцакIэрэм гукъыдэчъ къыперэхь, шIоу щыIэр упэкIэ ренэу къэрэкI!