Адыгэ Республикэм ит гъэсэныгъэ организациехэм зэпхыныгъэу адыряIэм елъытыгъэу, Мыекъопэ къэралыгъо технологическэ университетым мэкъу-мэщ классхэм зэрадэлэжьэрэр кIымэфэ уахътэм лъегъэкIуатэ.

Проектым ипшъэрылъыр — агропромышленнэ комплексым пае зэпымыоу кадрэхэм ягъэхьазырын системэр зэтегъэпсыхьэгъэныр ары, ащ пае еджапIэхэм, колледжхэм, профильнэ апшъэрэ еджапIэхэм ыкIи IофшIэн къэзытыхэрэм Iоф адашIэ. Программэм къыделъытэ профессиональнэ гъэсэныгъэм ыпэ ишъыхэзэ Iофхэр зэшIуахынхэр, кIэлэеджакIохэм зэхашIэу янеущрэ сэнэхьатэу мэкъу-мэщым епхыгъэщтыр къыхягъэхыгъэныр.

Непэ яхьэкIагъэхэр Шэуджэн районым игурыт еджапIэу №5-м ыкIи Красногвардейскэ районым и Гимназиеу № 1-м якIэлэеджакIохэр ары (я 9-
рэ ыкIи я 11-рэ классхэм арысхэр).

 КIэлэеджакIомэ апае игъэкIотыгъэ программэ агъэхьазырыгъ:
· Лэжьыгъэхэм яагротехнологие;
· Былымхъуным пылъ Iофхэр, Iусхэм яухьазырын;
· Биотехнологиехэр ыкIи гъомлэпхъэ производствэр;
· Агроинженериер ыкIи къэкIырэмэ ахашIыкIырэ шхыныгъохэр;
· IэрышI акъылыр ыкIи БПЛА-р;
· Къэгъагъэ къэгъэкIыныр ыкIи флористическэ мастерскоир;
· Химиер ыкIи химическэ технологиехэр мэкъу-мэщым зэрэрахьылIэхэрэр.

Анахьэу практическэ опытым анаIэ тырагъэты: кIэлэеджакIомэ МКъТУ-м илабораториехэр ыкIи егъэджэпIэ корпусхэр къакIуахьых, непэрэ технологиехэм ыкIи научнэ оборудованиехэм нэIуасэ
зафашIы, агроном ыкIи инженер ныбжьыкIэхэм яроль ехьэх.

Агротехнологическэ классхэм Адыгэ Респбликэм ит еджэпIэ зэфшъхьафхэр зэрепхых: Мыекъопэ, Кощхьаблэ, Красногвардейскэ, Джаджэ, Тэхъутэмыкъое районхэр ыкIи къалэу Мыекъуапэ.

 — КIэлэеджакIомэ шIэныгъэ зыщагъотыщт чIыпIэр къафыхэтэхы, мэкъу-мэщым епхыгъэ наукэм ыкIи инновациехэм ащытэгъэгъуазэх. Программэр 2026-рэ илъэсым ищылэ мазэ ыкIэм нэс лъыгъэкIотэгъэщт, — къыхагъэщы зэхэщакIохэм.

ЕджапIэмэ якIэлэегъаджэхэмкIэ проектэу «Агротехнологическэ классхэм» ягъэцэкIэн Iофыгъошхоу щыт, методическэ семинархэр ыкIи зэхэгущыIэжь-зэхэсыгъохэр къыдалъытэх, яопыткIэ зэхъожьых, яIэпэIэсэныгъэ хагъахъо.