Мыекъопэ къэралыгъо технологическэ университетым икъутамэу Яблоновскэм дэтым илабораторие эксперимент гъэшIэгъон щырагъэжьагъ, къэкIырэмэ къашъхьэпэщт Iофтхьабзэу ар щыт.

Научнэ студенческэ кружокэу чIыдэгъэ IофымкIэ ыкIи чIыгу гъэпсынымкIэ кафедрэм иIэм изичэзыу зэхэсыгъоу «Инновациер   промышленностым ешIылIэгъэныр» зыфиIорэр рагъэкIокIыгъ, студентхэмрэ, ахэмэ япащэу, доцентэу Дмитрия Бебкорэ озоным къэкIыхэрэмкIэ ишIуагъэу къакIорэр зыфэдэр аушэтыгъ.

— Озон — ар  Iэзэгъу лъэш, ащ физикэ-химическэ амалэу къытыхэрэмэ организмэ псаухэр зэрахъокIы. КъэкIыхэрэмкIэ ар биостимулятор мэхъу, культурэмэ лэжьыгъэу къатырэр ыгъэбэгъошъущт, — къыIотагъ Дмитрий Анатолий ыкъом.

Экспериментым ипшъэрылъыр — озоныр зэрахьылIэгъэ коцыр пэшIорыгъэшъэу къыдэгъэкIыгъэныр, зэгъэшIэгъэныр ащ ишIуагъэу къакIорэр, зэрэхигъахъорэр. ЗэрагъэунэфырэмкIэ къэкIыхэрэр къэзыухъумэрэ механизмэхэр ащ къегъэпIэжъгъэих, узхэм нахь апэшIуекIошъухэу ешIых, лэжьыгъэу къахьыжьырэр проценти 5-10-кIэ нахьыбэ хъунэу мэгугъэх.

Студентхэр зыхэт командитIу экспериментым хэлажьэх: МКъТУ-м икъутамэу Яблоновскэм щыIэм истудентхэр — Кирилл Цветной, Валерия Лебедевар ыкIи Савелий Шакировыр, джащ фэдэу Пшызэ къэралыгъо мэкъу-мэщ университетым истудентхэр: — Владислав Гребневыр ыкIи Вадим Мазепиныр. Ахэмэ чылапхъэхэр тIоу агощыгъэх:

· Экспериментальнэр: коцым ичылапхъэхэу озоныр хэушъхьафыкIыгъэ камерэм зыщырахьылIагъэхэр.

· УплъэкIугъэныр: чылапхъэхэу зи зэрамышIэфыгъэхэр.

Чылапхъэ купитIури зэфэдэу апхъыгъагъэх — чIыгури зэфэдагъ, ом изытетыгъи  температурэри зыгъэх. КъэкIыхэфэ нэс студентхэр ахэмэ алъыплъэщтых ыкIи озоным шIуагъэу къытырэмкIэ зэфэхьысыжьхэр ашIыщтых.

Студенческэ научнэ обществэу МКъТУ-м иIэм ипащэу Ирина Селивановар ныбжьыкIэ ушэтакIомэ яIофшIэн хэлэжьагъ. Научнэ IофшIэнэу университетым ыгъэцакIэрэм ар къытегущыIагъ,  экспериментымкIэ ягухэлъхэр къадэхъунхэу къафэлъэIуагъэх.

Зэфэхьысыжьхэм шъукъяжэх ыкIи МКъТУ-м и Студенческэ научнэ обществэ шъукъыхахьэх!