Мыекъопэ къэралыгъо технологическэ университетым профессиональнэ гъэхьазырыгъэным ипрограммэу «Къэралыгъо ыкIи муниципальнэ гъэIорышIэныр. Адыгеим и ЛIыхъужъхэр» зыфиIорэр щылъагъэкIуатэ. Непэ ащ иятIонэрэ едзыгъоу «Экономикэр ыкIи финансхэр» зыфиIорэр рагъэжьагъ, экономическэ процессхэм, финансовэ политикэм, къэралыгъо ыкIи муниципальнэ гъэIорышIэным ястратегическэ хэхъоныгъэ нахь куоу хэлажьэхэрэм арагъэшIэныр Iофтхьабзэм ипшъэрылъ.

ШIуфэс псалъэкIэ къэзэрэугъоигъэхэмэ закъыфагъэзагъ Адыгэ Республикэм и ЛIышъхьэ иадминистрацие ипащэу Владимир Свеженец, научнэ IофшIэнымкIэ ыкIи инновационнэ хэхъоныгъэмкIэ МКъТУ-м ипроректорэу Татьяна Овсянниковам, Адыгэ Республикэм и Къэралыгъо Совет-Хасэм итхьаматэ игуадзэу Цэй Эдуард, Къыблэ-Урысые институтым икъутамэу РАНХиГС-м ипащэу Алексей Барановым.

Непэ десэу хэлажьэрэмэ аратыгъэхэр къэралыгъо экономическэ политикэм, Урысыем дунэе экономикэм чIыпIэу щиубытырэм, хэгъэгум иэкономическэ суверенитет зэтегъэпсыхьэгъэным афэгъэхьыгъагъэх. Командэмэ язэхэщэнхэм, зэфэхьысыжьхэр шIыгъэнхэм афэгъэхьыгъэ Iофтхьабзэхэри зэрахьагъэх.

ХэушъхьафыкIыгъэ дзэ операцием хэлэжьагъэхэм япрофессиональнэ ухьазырыныгъэ фэгъэхьыгъэ программэр 2025-рэ илъэсым ишышъхьэIу мазэ къыщыублагъэу МКъТУ-м щагъэцакIэ, ащ къыхэлажьэх Урысые Федерацием и Президент дэжь щыIэ народнэ хъызмэтым иакадемие ыкIи  Къыблэ-Урысые институтым икъутамэу РАНХиГС-р.

Практическэ десэхэмэ афэшъхьафэу программэм къыделъытэх культурнэ, спортивнэ ыкIи командэ-зэхэщэн Iофтхьабзэхэр. Очнэ едзыгъо пэпчъ ушэтынхэр атыжьых, зэфэхьысыжьхэр афашIыжьых.

Апэрэ едзыгъом хэлэжьагъэмэ языгъэхьазырыныгъэ дэгъоу рагъэкIокIыгъ, процент 80-р къагъэлъэгъуагъ. Федеральнэ программэу «ЛIыхъужъхэм яуахътэ» иэкспертнэ совет уасэу Адыгэ Республикэм къыфишIыгъэмкIэ Урысыем ишъолъыр 35-мэ Адыгеир ахэхьагъ, егъэджэнымкIэ анахь балл инхэр къыхьыгъэх (балл 9,3-рэ 10-м щыщэу), джащ фэдэу топ-20-м хэлажьэрэ пчъагъэхэмкIэ ахэфагъ.