Банкэу «Центр-инвест» зыфиIорэм зэхищэрэ зэнэкъокъоу «Стипендие Iушыр» зыфиIорэм гъэ къэс Мыекъопэ къэралыгъо технологическэ университетым истудентхэр хэлажьэх.

Мыгъэ текIоныгъэр нэбгырэ 12-мэ къыдахыгъ:

• Анна Горковенкэр — мэкъу-мэщ технологиехэм яфакультет.

ИIофшIагъэ итемэр: непэрэ уахътэм диштэрэ бзылъфыгъэ щыгъыным ибренд гъэпсыгъэныр ыкIи урыс культурнэ кодым ипкъыгъохэр къызхэщырэ аксессуархэр гъусэ фэшIыгъэныр. Проектым къытыщтыгъэ щыгъын зэкIэлъыкIохэр ыкIи аксессуархэр, дизайным хабзэм щыщ нэшанэхэр хэтыгъэх: идыкIыгъэхэр, тхыпхъэхэр, декоративнэ-прикладной искусствэм щыщ пкъыгъохэр, джащ фэдэу урыс пшысэмэ ыкIи тхыдэмэ къахэхыгъэ персонажхэр къыщытыгъэнхэр. Ижъырэ дыкIэр зэрагъэфедагъэм щыгъын пэпчъ хэушъхьафыкIыгъэу ешIы, непэрэ уахътэм диштэрэ дизайнэу рахьылIэрэм ар егъэкIэрэкIэжьы, Iэрыфэгъоу, нэмыкIмэ афэмыдэу, ежь инэшанэ къыхэщэу мэхъу.

• Даур Бэла — Медицинскэ институт.

ИIофшIагъэ итемэр: «Глютен зыхэмылъ хьалыгъур зыщагъажъэрэ хьалыгъу гъэжъапIэ цIыкIум игъэпсын, аэрированием итехнологие рахьылIэзэ». Проектыр зыфытегъэпсыхьагъэр хьалыгъу гъэжъэпIэ цIыкIухэу аэрированиер рахьылIэзэ технологие гъэшIэгъонымкIэ хьалыгъур къэзышIыхэрэр ары, шъоущыгъу уз ыкIи целиакие зиIэ цIыфхэмкIэ IофыгъошIоу щыт.

• Вероника Мажаринар — экономикэмрэ гъэIорышIэнымрэ яфакультет. ИIофшIагъэ итемэр: «Адыгеир зыдашт». Проектым къегъэлъагъо зэкIэлъыкIорэ открыткэхэу Адыгэ Республикэм ичIыпIэ дахэхэр ыкIи шIагъохэр къизыIотыкIыхэрэр. IофшIагъэм хэушъхьафыкIыгъэу хэлъыр искусственнэ интеллектым итехнологиехэр зэрагъэфедэхэрэр ары. АхэмкIэ видеоматериалхэр ыкIи сурэтхэр агъэпсых, ахэмэ псэ къапэкIэ телефоным икамерэ зафэбгъазэкIэ. Ащ фэдэ сувенирхэм яшIуагъэкIэ зекIомэ тиреспубликэ фэгъэхьыгъэ гукъэкIыжь фабэхэр къафэнэщтых.

• Алена Бударинар — Медицинскэ институт.

ИIофшIагъэ итемэр: «ЭКО фреш». Проектэу «ЭКО фреш» зыцIэр автоматизированнэ кафе цIыкIухэу апшъэрэ еджапIэмэ апае агъэхьазырхэрэр, ахэр студентмэ афытегъэпсыхьагъэх, ахэмэ апае салатхэр, сэндвичхэр ыкIи смузихэу Адыгеим ифермерхэм къагъэхьазырхэрэр апагъохыщтых. Проектыр фастфудыр псынкIэу гъэхьазырыгъэнымрэ шхыныгъо тэрэзхэу экологичнэ къэмланэмэ адэлъхэмрэ къыделъытэх. Дэгъу дэдэу еджэрэмэ апае фэгъэкIотэнхэр ашIыщтых, искусственнэ интеллектым итехнологиехэр агъэфедэщтых. Студентмэ япсауныгъэ нахьышIу шIыгъэным проектыр дэлажьэ. 

• Иныхъу Джанета — экономикэмрэ юриспруденциемрэ яинформационнэ системэхэм яфакультет.

ИIофшIагъэ итемэр: «VR-Атлас человеческого тела „Анатомиум“» зыфиIорэр ары. Проектым цIыфым ипкъышъол интерактивнэ VR-атлас шIыкIэмкIэ гъэпсыгъэу къеты, ар студент-медикхэм, кIэлэеджакIохэм ыкIи цIыфым иорганизмэ зэзыгъашIэ зышIоигъомэ зэкIэмэ  афытегъэпсыхьагъ. Платформэм иммерсивнэ гъэсэныгъэ опыт къеты, зыгъэфедэхэрэр пкъышъолым зекIоу щэкIох, органхэмрэ системэмрэ ащ тетэу зэрагъашIэ, виртуальнэ «операциехэри» ашIых.

• Дэргушэо Хьазрэт — экономикэмрэ юриспруденциемрэ яинформационнэ системэхэм яфакультет.

ИIофшIагъэ итемэр: «Smart Boxing Trainer» (Боксерскэ тренер Iуш). Проектыр мобильнэ приложениеу гъэпсыгъэ ыкIи къырахьакIэу щыт (гущыIэм пае, датчик зыхэт Iэбыцоу), ахэмкIэ боксерым тренировкэ зэришIырэ шIыкIэр джы дэдэм егъэунэфы, кIуачIэу тыригъэкIодагъэр, огъум хилъхьагъэр, ипсынкIагъэ, кIэшIыкIыжьыр пчъагъэу зэрэхъурэр, нэмыкIхэри къелъытэх. Огъухэм яонтэгъугъэ зэфехьысыжьы, калориехэр къелъытэ ыкIи фэшъхьаф физиологическэ лъэныкъохэр. Ащ тетэу тренировкэ хэушъхьафыкIыгъэ спортсменым фыхехы, тренерымкIи а Iофтхьабзэхэр Iэрыфэгъухэу щытых.

• Самуил Образцов — экономикэмрэ юриспруденциемрэ яинформационнэ системэхэм яфакультет.

ИIофшIагъэ итемэр: проектэу «Клубок». Проектыр мобильнэ приложениеу навигационнэ сервисхэу 2ГИС-м ыкIи платформэу «Госуслуги» зыфиIорэм афэдэхэм яфункционалхэр зэрепхых, студентмэ нахь къазэрэшъхьэпэщтым елъытыгъэу агъэпсых. Приложением ишIуагъэкIэ апшъэрэ еджапIэм иаудиториехэмрэ нэмыкI объектхэмрэ азыфагу гъогу афешIы, къыуегъашIэ пыутэу щэджэгъуашхэ зыщыпшIын плъэкIыщтыр, уищыкIэгъэ документхэр зыщыбгъотыщтхэр, нэмыкIхэр. Приложением джащ фэдэу интеллектуальнэ IэпыIэгъоу ИИ-р зылъапсэр хэт, зыгъэфедэрэмэ яупчIэмэ джэуап къаретыжьы, апшъэрэ еджапIэм фэгъэхьыгъэ информациер IэкIэлъ.

• Никита Шустовыр — экономикэмрэ гъэIорышIэнымрэ яфакультет.

ИIофшIагъэ итемэр: «Мыекъуапэ щыпсэурэ кIэлэцIыкIухэу илъэси 3-7 зыныбжьыхэм апае футбольнэ секциехэр зэхэщэгъэнхэр». Проектыр кIэлэцIыкIу футболым хэхъоныгъэ егъэшIыгъэным фытегъэпсыхьагъ, ар Урысыем испортивнэ культурэ иIахьэу щыт. КIэлэцIыкIу футболым физическэу цIыкIухэм ахегъахъо, команднэ зэхэтыкIэм фепIух. IэкIыб ыкIи инновационнэ хэгъэгу методикэхэр зэхагъэуцохэзэ тренер IэпэIасэмэ тренировкэхэр цIыкIумэ арагъэшIыныр проектым къыделъытэ.

• Дарья Хорольцевар — Медицинскэ институт.

ИIофшIагъэ итемэр: «Разработка рецептуры крема для проблемной кожи ног» зыцIэр ары. Лъэдакъэм игъушъагъэ, ащ гумэкIыгъоу къыхэкIыхэрэр непэрэ мафэм анахь гумэкIыгъоу псауныгъэм ылъэныкъокIэ щыIэхэм ащыщ, ар цIыфым ищыIэкIэ-псэукIэ, Iофэу ышIэрэм къахэкIы. Проектым ипшъэрылъ шъхьаIэр — кремым ирецептурэ шъхьаIэу лъакъом ышъоу фыкъуагъэм зишIуагъэ къекIыщтыр зэхэгъэуцогъэныр ары. Ащ ишIуагъэкIэ шъор нахь къабзэ хъущт, фыкъуагъэхэр кIыжьыщтых. Кремыр илъэсым исыд фэдэрэ лъэхъани бгъэфедэшъущт.

• Илья Орлов — экономикэмрэ гъэIорышIэнымрэ яфакультет.

ИIофшIагъэ итемэр: «SkyPost Адыгея». Проектэу «SkyPost Адыгея» зыфиIорэр — сервисэу дронкIэ къыпфащэжьыныр ары, ащ псынкIэу, щынэгъончъэу логистикэр егъэпсы, цIыфхэмкIи республикэм  ит организациехэмкIи Iэрыфэгъу. Автономнэ технологиехэр ыкIи быбынхэмкIэ гъэIорышIэнхэр агъэфедэх, ащ пае искусственнэ интеллектыр Iофым къыхагъэлажьэ. Сервисыр унэе IофшIакIохэм, бизнес цIыкIум, IэзапIэхэм, интернет-тучанхэм ыкIи къэралыгъо структурэхэм къашъхьэпэщт.

• Елизавета Текучевар — технологическэ факультет.

ИIофшIагъэ итемэр: «Разработка технологии производства индивидуального рациона питания функционального назначения для военнослужащих» зыфиIорэр ары. Непэрэ уахътэм къулыкъу зыхьырэ дзэкIолIхэм физическэ ыкIи психологическэ ухьазырныгъэ дэгъу къагъэлъэгъон фае. Ар къыдалъыти, хэушъхьафыкIыгъэ шхыныгъохэр агъэхьазырыгъэх, шъхьадж физическэ кIуачIэу ыгъэкIодыгъэм елъытыгъэу ахэр гъэпсыгъэх, белокхэмкIэ, витаминхэмкIэ, минералхэмкIэ баих ыкIи энергетическэ осэшхо яIэу щытых.

• Мэрэтыкъо Бэла — Медицинскэ институт.

ИIофшIагъэ итемэр: телеграмм-ботэу «Пшъэшъэжъыем ипсауныгъэ — лъэпкъым ипсауныгъ». Проектыр фытегъэпсыхьагъ бзылъфыгъэхэм япсауныгъэ фэгъэхьыгъэ игъэкIотыгъэ къэбарыр аIэкIэгъэхьэгъэным. Телеграм-ботым нэкIубгъохэу гинекологием, эндокринологием, психологием ыкIи фэшъхьафхэу япсауныгъэкIэ къашъхьэпэщтхэр итыщтых. Проектым ишIуагъэкIэ упчIэхэр птышъущтых ыкIи джэуапхэр врачмэ къыщыуатыжьыщтых.

Тистудентмэ гъэхъэгъэшхохэр ашIыгъэх, тыгу къыддеIэу тафэгушIо! ТекIоныгъакIэхэр джыри къыдахынхэу, япрофессиональнэ пшъэрылъхэр къадэхъунхэу тафэлъаIо!