МКъТУ-м икъутамэу поселкэу Яблоновскэм дэтым чIыдагъэ IофымкIэ ыкIи чIыгу гъэпсынымкIэ икафедрэ непэрэ технологиехэр промышленностым ыкIи агропромышленнэ комплексым зэрэщагъэфедэхэрэм афэгъэхьыгъэ Iэнэ хъурае щыкIуагъ.

Iэнэ хъураем хэлэжьагъэх кIэлэегъаджэхэмрэ студентхэмрэ, хьакIэу яIагъ университетым къычIитIупщыгъэу, джырэкIэ кадастровэ инженерэу, Темыр Кавказым ишъолъырхэм ащылажьэрэ Григорий Кощиенкэр.

Григорий Павел ыкъор практическэ кейсхэу ежь ипрофессиональнэ IофшIэн къыхэкIыгъэхэмкIэ къадэгощагъ, хъурэ-шIэхэрэр студентмэ зытетым тетэу къафиIотагъ. Анахьэу ашIогъэшIэгъоныгъэр технологиеу лазернэ сканированиеу SLAM зыцIэм иIэр ары. А инновационнэ методикэм амал къеты топографэ-геодезическэ IофшIэнхэм атекIодэрэ уахътэр ыгъэкIэкIынэу, нахь дэгъоу зэтыригъэпсыхьанэу, ащ фэшI геодезистмэ дэгъукIэ зэдаштагъ. ЗэIукIэм щызэзэгъыгъэх студентмэ производственнэ практикэр аригъэхьынэу, ежь ышъхьэкIэ а Iофым къыхэлэжьэнэу Григорий Павел ыкъом унашъо зыфишIыжьыгъ.

НыбжьыкIэ ушэтакIохэри къыхагъэщыгъэх, проектнэ-гъэсэныгъэ интенсивэу «Траектория роста» зыфиIорэм щытекIогъэ командэу «ЧIыдэгъэ Iофым» фэгъэзагъэу еджэхэрэр хэхьагъэх: Валерия Лебедевар, Савелий Шакировыр, Артем Сорокиныр ыкIи Кирилл Цветноир, научнэ пащэу яIэр доцентэу Дмитрий Бебко. Ахэмэ къагъэлъэгъуагъ яIофшIагъэу чIыдагъэмэ шIой къутафэхэр зэрэхагъэкIыжьыхэрэ шIыкIэр. Ушэтыныр бэмэ агу рихьыгъ, ащ фэгъэхьыгъэ зэхэгущыIэжьыр гъэшIэгъонэу кIуагъэ, студентхэм отраслым игумэкIыгъохэм ядэгъэзыжьын зэрашIогъэшIэгъоныр къахэщыгъ.

Анахьэу агу рихьыгъэр студентэу «ЧIыгу гъэпсыныр ыкIи кадастрэр» зыфиIорэм феджэрэ студентэу Иван Жуковым къышIыгъэ джэпсалъэр ары. Ащ къыIотагъ Северскэ районым  чIыгу Iахьхэр зэращащэхэрэр ыкIи зэращащэфыхэрэр, ащ пае электроннэ шIыкIэр зэрагъэфедэрэр. Иван къыхигъэщыгъ, профессиональнэ пшъэрылъхэм уанэсынымкIэ спортивнэ ухьазырыныгъэми ишIуагъэ къэкIо, ежьыр тхэквондо спорт лъэпкъымкIэ  мастер хъунымкIэ кандидатэу щыт.

Доцентэу Бебко Дмитрий Анатолий ыкъом идоклад къыщыхигъэщыгъ чIыдагъэр заукъэбзырэ ужым зэрагъэфедэжьырэр. КъыдэгъэкIыжьыгъэным итехнологие къыгъэлъэгъуагъ. Ахэмэ Урысые Федерацием патентхэр къащыпалъхьагъэх, Краснодар краим чIыдагъэр къызщыдагъэкIыжьрэ заводэу итхэм къащэшъхьапэх.

ЧIыдагъэ Iэмэ-псымэхэр зэрагъэцэкIэжьырэмрэ зэрадэлажьэхэрэмрэ афэгъэхьыгъэ упчIэхэм къатегущыIагъ доцентэу Величко Евгений Иван ыкъор, ар вибрационнэ диагностикэу подшипниковэ зэпышIапIэмэ арахьылIэхэрэм къатегущыIагъ. Фыкъуагъэу промышленнэ объектхэм атехъухьэхэрэмэ анаIэ тыраригъэдзагъ, Краснодар краим чIыдагъэр зыщызэхагъэчъырэ станциеу иIэхэр ащ пае щысэу къыхьыгъэх.

ЧIыгу-мылъку зэфыщытыкIэхэм хэбзэгъэуцугъэу арахьылIэхэрэмэ къатегущыIагъ доцентэу Щербатов Игорь Виктор ыкъор. 2026-рэ илъэсым ищылэ мазэ и 1-м къыщыублагъэу УФ-м ыкIи Краснодар краим ихэбзэгъэуцугъэхэу кIуачIэ зиIэ хъущтхэм ягугъу ащ къышIыгъ, ахэмэ адиштэу чIыгу Iахьэу аIахыжьыщтхэр ыкIи ахэмэ яушъхьагъухэр къыриIотыкIыгъэх.

Зэхэсыгъор гъэшIэгъонэу, зэхэгущыIэжь шапхъэм илъэу кIуагъэ: хэлэжьагъэмэ упчIабэхэр атыгъэх, яшIошIхэмкIэ зэхъожьыгъэх, технологиеу зигугъу ашIыгъэхэр Iофым шIэхэу зэрэхагъэхьащтхэм атегущыIагъэх.