Непэрэ лъэхъаным, къэбарыкIэхэр етIупщыгъоу мафэ къэс нахьыбэу къызщатыхэрэм, хэушъхьафыкIыгъэ литературэ дэгъур къыхэхыгъуае щэхъу. Анахьэу инженернэ-техническэ сэнэхьатхэм арылэжьэщтхэмкIэ ар гумэкIыгъоу щыт. А гумэкIыгъор дегъэзыжьы Мыекъопэ къэралыгъо технологическэ университетым ипроектэу «Профессиональнэ тхылъ мэкIаер» зыфиIорэм, ятIонэрэ илъэс хъугъэу ар университетым щагъэцакIэ.

Проектым зыдэлажьэхэрэм къыщыублагъэу  видеоролик 21-рэ  щыIэ хъугъэ (https://vk.com/video/playlist/I87930078_7), джыри ролики 4-мэ Iоф адашIэ. ГукъэкIым игъэпсын дэлажьэрэр псэолъэшIынымкIэ ыкIи общепрофессиональнэ дисциплинэхэмкIэ кафедрэм идоцентэу Оксана Борсук.

Проектым чанэу студент 30 дэлажьэ  — очникхэри, заочникхэри ахэтых — технологическэ ыкIи экологическэ факультетхэм, джащ фэдэу экономикэм ыкIи гъэIорышIэным яфакультет ахэр ащеджэх. Сэнэхьатэу зэлъиубытхэрэр: «ПсэолъэшIыныр»; «МашIо щынэгъончъэр»; «ПсэупIэ-коммунальнэ хъызмэтым исервис ыкIи игъэIорышIапIэ».

Проектыр егъэджэн процессым хэщагъэу гъэпсыгъэ, мыщ фэдэ дисциплинэхэр зэрагъэшIэнымкIэ адэIэпыIэ:

— «Псыр аIэкIэгъэхьэгъэныр ыкIи псым иищэн гидравликэр алъапсэу»;

— «Унэхэр ыкIи псэуалъэхэр машIом ымыштэнхэу гъэпсыгъэнхэр»;

— «ПсэупIэ-коммунальнэ хъызмэтым исервис итехникэрэ итехнологиехэмрэ».

Проектым игъэцэкIэнкIэ социальнэ гъусэгъумэ мэхьанэ яIэу щыт — МКъТУ-м инаучнэ-техническэ тхылъеджапIэр; Адыгэ Республикэм и Лъэпкъ тхылъеджапIэр; Адыгэ республикэ ныбжьыкIэ тхылъеджапIэр.

ГумэкIыгъуищэу информационнэ Iофыгъохэм япхыгъэхэм япшъэрылъхэр проектым егъэцакIэх:

1. Урысыем тхылъым иеджэн нахь макIэ зэрэщыхъугъэр — литературнэ хабзэ ин зыхэлъ хэгъэгум.

2. КъэбарыкIэхэр зыщыбэ уахътэм, хэушъхьафыкIыгъэ литературэ дэгъур  къыхэхыгъэным икъиныгъохэр.

3. ХэушъхьафыкIыгъэ научнэ-техническэ литературэм фэгъэхьыгъэ видеороликхэр интернетым зэримытхэр.

Пшъэрылъ шъхьаIэр  — МКъТУ-м къыгъэлъэгъогъэ видеоролик зэкIэлъыкIохэр  научнэ-техническэ ыкIи художественнэ литературэу инженернэ-техническэ сэнэхьатхэм афэгъэхьыгъэхэр гъэпсыгъэнхэр. Пшъэрылъ шъхьаIэхэр:

— «Профессиональнэ тхылъ мэкIаер» гъэпсыгъэныр — литературэу зыщыкIэхэрэр къагъотыным пае роликхэм ягъэхьазырын;

— уахътэу специалистмэ ящыкIагъэр гъэкIэкIыгъэныр;

— МКъТУ-м иинженернэ сэнэхьатхэм зэрэщыфагъэхьазырхэрэр ягъэшIэгъэныр;

— сэнэхьатэу къыхахыщтымкIэ абитуриентмэ адеIэгъэныр.

Мы Iофтхьабзэм зэрэщыкIэхэрэм проектыр къыхэкIыгъ. Десэу къаратыгъэр зэрагъэшIэным пае тхылъеджапIэм хэушъхьафыкIыгъэ техническэ литературэр зычIамыгъуатэр ары ашъхьэ ар  къызихьагъэр.

Процессыр агъэпсынкIэным пае студентмэ литературэр атырагощагъ, зыр зеджэкIэ, адрэм къыфиIотэжьынэу щытыгъ. Ащ ишIуагъэкIэ уахътэр агъэкIэкIыгъ, тхылъыр къызтегущыIэрэм щыгъозэнхэмкIэ студентми амал агъотыгъ.  Джащ тетэу тематическэ журналхэм ыкIи тхылъхэм я видеообзорхэр къаугупшысыгъэх, ахэмкIэ  студентхэмрэ абитуриентхэмрэ профессиональнэ литературэр зэхаугуфыкIын алъэкIыщт.

Проектым игъэцэкIэн: гъусэгъухэр яIэпыIэгъухэу тхылъхэмрэ журналхэмрэ къыхахых:

— Адыгэ Республикэм и Лъэпкъ тхылъеджапIэ итехническэ отдел (Нина Плотнерчук).

— МКъТУ-м инаучнэ-техническэ тхылъеджапIэр (Саида Дубининар, Юлия Азоян, Наталья Вьюновар).

— Еджэныр ыкIи литературэм ианалитическэ зэхэфын (Лъэцэр Амина, Денис Колтуновыр, Кристина Функ).

— Видеороликмэ апае сценариехэр тхыгъэнхэр (Лъэцэр Амина, Кристина Функ).

— Съемкэр, монтажыр, видеороликым макъэ кIэлъхьэгъэныр, социальнэ хъытыум игъэхьэгъэныр (Кристина Функ, Денис Колтунов).

Проектым хэхъоныгъэхэр егъэшIыгъэнхэр: проектым тематикэр ыушъомбгъугъ, художественнэ литературэр хигъэхьагъ, сэнэхьатэу «ПсэолъэшIыныр», «МэшIогъэкIуасэр» ыкIи «ЖКХ-м иинженерыр» зыфиIохэрэмэ афэгъэхьыгъэхэр хэтыщтых.

Мы еджэгъу илъэсым купэу ПБ-41-м истудентэу Азим Агаевым кIэлэцIыкIу литературэм пае обзорыр къыгъэхьазырыгъ — тхылъхэу «КIэлэцIыкIу энциклопедиер. МашIо щынэгъончъэныр».

Проектым дунэе мэхьанэ иIэ хъугъэ: IэкIыб студентхэми IофшIэныр агъэцакIэ. ГущыIэм пае, Иорданием щыщ студентэу Айман Абджелалил лъэныкъоу «ПсэолъэшIыным» щеджэ, псы ищэным фэгъэхьыгъэ тхылъхэм къатегущыIэрэ роликхэр арапыбзэкIэ къыгъэхьазырыгъэх. Ащ ишIуагъэкIэ гъэсэныгъэ контентыр нахь цIыфыбэмэ алъэгъун алъэкIыщт.

Джащ тетэу, гъэсэныгъэ проектэу «Профессиональнэ тхылъ мэкIаем» къэбарыкIэхэр мафэ къэс нахьыбэ зэрэхъухэрэм япхыгъэ гумэкIыгъохэм ядэгъэзыжьын закъоп пшъэрылъэу ыгъэцакIэрэр, ащ къегъэлъагъо гъэсэныгъэ гукъэкIыр, академическэ пхъэшагъэр ыкIи социальнэ мэхьанэ зиIэ  инновационнэ екIолIакIэр шIэныгъэр зэгъэгъотыгъэным зэрэфэIорышIэрэр. Проектым къегъэлъагъо къулыкъу ахьызэ егъэджэгъэнхэ шIыкIэм зыкъызэригъэшъыпкъэжьырэр, апшъэрэ еджапIэхэр, тхылъеджапIэхэр ыкIи профессиональнэ сообществэр зэрэзэрипхыхэрэр.