Мыекъопэ къэралыгъо технологическэ университетым илабораторие пилот зэрымыс авиационнэ комплексыкIэу щы къыратыгъ, ахэр къэзышIыгъэхэр компаниеу «Геоскан». Лъэпкъ проектэу «Пилот зэрымыс авиационнэ системэхэр» зыфиIорэм къыдыхэлъытагъэу ахэр къэкIуагъэх — федеральнэ проектэу, хэгъэгум къыщашIырэ беспилотникмэ къакIэлъэIунхэм тегъэпсыхьагъэу ар щыт.

Джы МКъТУ-м истудентхэмрэ икIэлэегъаджэхэмрэ техникакIэр агъэпсэолъэн алъэкIыщт, ар игъэкIотыгъэу геодезием, кадастрэм, псэолъэшIыным ыкIи мэз хъызмэтым къащэшъхьапэ. Специалистхэм ягъэхьазырынкIэ ар лъэубэкъу шIагъу, непэрэ экономимкэм ипшъэрылъхэр зыгъэцэкIэшъурэ техникэу щыт.

Комплексэу «Геоскан 201 Геодезия» — шъолъыр инхэм ыкIи чыжьэу щыIэ объектхэм сурэт атепхынымкIэ Iэрыфэгъу: гъогухэм, трубэхэм, мэкъу-мэщ Iахьхэм. Ащ псынкIэу ортофотопланхэр къешIых, чIыпIэхэр ышъхьагъкIэ къеплъыхызэ уегъэлъэгъу.

«Геоскан 401 Лидар» — егъэпсышъух чIыпIэм ицифрэ модельхэр. ГъогукIэхэм япроектированиекIэ ахэмэ анахь дэгъу щыIэп, мэз хъызмэтми, чъыг шъхьапэмэ ачIэгъкIэ щыIэхэри зэзыгъашIэ зышIоигъохэмэ, инфраструктурэр зэтырагъэпсыхьэмэ, нэмыкI IофхэмкIэ къашъхьапэх.

«Геоскан Gemini» — сыд фэдэрэ лъэныкъомкIи агъэлажьэ, зытетым тетэу къетыжьых. Сантиметрэ заул ныIэп нахьыбэрэмкIэ зэрэхэукъорэр, джащ пае ар кадастрэ IофшIэнхэм, джащ фэдэу маркшейдерием, унэхэм ятрехмернэ модельхэм ыкIи ландшафтхэм ащагъэфедэ.

Дронэу къаратыгъэхэр егъэджэн процессым иIахь шъыпкъэу хъущтых. Студентмэ теорие закъор арэп зэрагъэшIэщтыр, ЧIыгум ипэIудзыгъэ зондированием итехнологиехэм ащыгъозэщтых, ежь-ежьырэу агъэбыбышъущтых, проектыкIэхэр агъэхьазырынхэ амали агъотыщт. МКъТУ-м къычIитIупщырэмэ IофшIэным ибэдзэр предложениехэр нахь псынкIэу къапагъохыщтых, илъэс къэс ащ фэдэ специалистхэм къакIэлъэIурэр нахьыбэ мэхъу.

Лъэпкъ проектым ишIуагъэкIэ университетым джы непэрэ уахътэм диштэрэ техникакIэр ыгъотыгъ, экономикэм иотраслэ зэфэшъхьафхэмкIэ кадрэхэм ягъэхьазырынкIэ ар IэпыIэгъушIу хъущт: псэолъэшIыным, мэкъу-мэщым къащыублагъэу экологием ыкIи къэлэ гъэпсыным анэсыжьэу.