Мы тхьамафэу блэкIыгъэм Мыекъопэ къэралыгъо технологическэ университетыр Урысыем ыкIи IэкIыб хэгъэгухэм янаучнэ сообществэ игупчэ хъугъэ. А I-рэ Дунэе научнэ-практическэ конференциеу «ГЪЭСЭНЫГЪЭР – НАУКЭР – ТЕХНОЛОГИЕХЭР» зыфиIоу университетым щыкIуагъэм секционнэ зэхэсыгъо 30-м ехъу, Iэнэ хъураехэр, научнэ зэхэгущыIэжьхэр хэтыгъэх, ахэмэ медицинэм, аграрнэ технологиехэм, экологием, техникэм, экономикэм, правэм ыкIи гуманитарнэ шIэныгъэхэм алъэныкъохэр зэлъаубытыгъэх.

Мамыку ыкIи гинекологием якафедрэ ипащэу, профессорэу Виктория Попандопуло яIэшъхьэтетэу секциемэ ахэлажьэхэрэр бзылъфыгъэхэу сабый къызфэхъун зылъэкIыщтхэм япсауныгъэ зэлъытыгъэмэ атегущыIагъэх. Анахьэу анаIэ зытырадзагъэр сабый зыхэмыкIырэ бзылъфыгъэхэм IэпыIэгъу афэхъурэ репродуктивнэ технологиехэу арахьылIэхэрэр ары, джащ фэдэу кесеревымкIэ абзэхэрэм япчъагъэ Адыгэ Республикэм зэрэщыхъурэм фэгъэхьыгъэ ушэтынэу ашIыгъэхэми ашъхьэ къырахыгъ. Врачмэ пшъэдэкIыжьэу ахьырэм фэгъэхьыгъэ секцием медикэ-фитныгъэ лъэныкъори щызэхафыгъ.

Госпитальнэ хирургием икафедрэ изэхэсыгъоу медицинэ шIэныгъэхэмкIэ кандидатэу, доцентэу Болэкъо Махьмудэ зэрищагъэм инновационнэ технологиехэмкIэ сымаджэхэу хирургическэ екIолIакIэ зищыкIагъэхэр зэрагъэхъужьыхэрэм ащытегущыIагъэх. Докладэу къашIырэмэ къакIэлъыкIоу зэхэгущыIэжьыщтыгъэх, клиническэ кейсхэм зэфэхьысыжьхэр афашIыгъэх.

Iэнэ хъураеу «Физиологиеу гъунапкъэ зимыIэр» зыфиIорэр физиологиемкIэ ыкIи патологиемкIэ кафедрэм щызэхащагъ физиологическэ шIэныгъэмэ апылъхэр хэлэжьагъэх. Я 2-рэ курсым щеджэхэрэр физиологиемкIэ ыкIи патологиемкIэ кафедрэм идоцентэу ГъукIэлI Асият яIэшъхьэтетэу зэхэгущыIэжьыгъэх, фундаментальнэ медикэ-биологическэ ушэтынхэр зарашIогъэшIэгъоныр къагъэлъэгъуагъ.

ФизиологиемкIэ ыкIи патологиемкIэ кафедрэм идоцентэу, медицинэ шIэныгъэхэмкIэ кандидатэу Цуамэкъо Асе яIэшъхьэтетэу клиническэ морфологием, псауныгъэм икъэухъумэн, методикэр зэрарагъахьыщытым ыкIи нэмыкIыбэхэм ягугъу ашIыгъ. Анахьэу агу рихьыгъэр докладэу «Влияние агрессивных и неагрессивных средств для обработки рук на бактерицидную активность кожи» зыфиIорэр ары, ушэтынхэу Роспотребнадзорым имикробиологическэ лабораторие щашIыгъэхэр ыкIи метаболическэ шIуагъэу микробиотмэ къатырэр ащ къыщыраIотыкIыгъэх.

Секциеу «Интеграция фундаментальных знаний в клиническую практику» зыфиIорэр медицинэ шIэныгъэхэмкIэ докторэу, профессорэу Виктория Мясниковар яIэшъхьэтетэу зэращагъ, научнэ докладыбэ къыщашIыгъ, непэрэ уахътэм имедицинскэ ушэтынхэм лъэныкъоу клиническэ IофшIэным къыщыдалъытэхэрэр къыраIотыкIыгъэх. 

Информационнэ щынэгъончъэнымкIэ ыкIи прикладной информатикэмкIэ кафедрэу экономикэм ыкIи юриспруденцием яинформационнэ системэхэм яфакультет хахьэрэм иIофышIэхэм ясекционнэ зэхэсыгъоу «Современные информационные технологии актуальные вопросы и инновации» зыфиIорэр зэхащагъ, ар зезыщагъэр деканэу Дэргушэо Асят ыкIи «Технологическэ стекыр: беспилотнэ транспортыр, искусственнэ интеллектыр, киберфизическэ системэр ыкIи киберщынэгъончъэр» рагъэкIокIыгъ,  кафедрэм ипащэу Цундышк Вячеслав яIэшъхьэтетэу ар кIуагъэ. Зэхэсыгъом къыдыхэлъытагъэу докладхэр факультетым ипрофессорскэ-кIэлэегъэджэ куп хэтхэм къашIыгъэх. ПэIудзыгъэ шIыкIэмкIэ ащ иIофшIэн къыхэлэжьагъ техническэ шIэныгъэхэмкIэ докторэу, профессорэу Николай Лябах (Германиер). Хэлажьэрэмэ ядокладхэр пилот зэрымыс транспортмэ ыкIи искусственнэ интеллектыр щыIэкIэ-псэукIэм зэрэхэлажьэрэм, информационнэ щынэгъончъэным ягумэкIыгъохэм, цифрэ зэтIуазэхэм афэгъэхьыгъагъэх.

Юридическэ секциеу юридическэ шIэныгъэхэмкIэ кандидатэу, доцентэу Елена Курбановар зиIэшъхьэтетыгъэм конституционнэ, уголовнэ, административнэ ыкIи IофшIэн фитныгъэм алъэныкъохэмкIэ ушэтынхэм къагъэлъэгъуагъэхэм атегущыIагъэх. Хэбзэгъэуцугъэм итрансформацие, коррупцием пэшIуекIогъэным, псауныгъэм икъэухъумэнкIэ цIыфхэм яфитныгъэхэм япхыгъэ Iофыгъохэр къыщаIэтыгъэх. Зэхэсыгъом изэфэхьысыжьхэм ялъытыгъэу зэдэIугъэхэ докладхэмкIэ научнэ IофшIагъэхэр къыхаутынхэу рахъухьагъ.

Мэкъу-мэщ продукцием ипроизводствэ технологиехэм якафедрэ секциитIу зэхищагъ: «Непэрэ уахътэм диштэрэ технологиехэу мэкъу-мэщым щагъэфедэхэрэр» (пащэр — кафедрэм иIэшъхьэтетэу, мэкъу-мэщ шIэныгъэмкIэ докторэу Мамсыр Нурбый) ыкIи «ЧIыгу лэжьыным ыкIи былым Iыгъыным афэгъэхьыгъэ шIыкIэ-екIолIакIэхэр» зыфиIорэр, (пащэр — доцентэу Юрий Чумаченко) хэлэжьагъэх Таджикистан, Узбекистан ыкIи Абхъазым ащыщхэр. Секциемэ яIофшIэн агротехническэ приемхэм ыкIи селекциехэм афэгъэхьыгъагъ, гъомлэпхъэ щынэгъончъэныр къэзгъэпсыхэрэм; инновационнэ екIолIакIэхэу щаим икъэгъэкIынкIэ агъэфедэхэрэм; коцым ыкIи джэнч лъэпкъхэм ялэжьыгъэхэр зэрагъэбагъохэрэм, шъоущыгъу зыхашIыкIрэ гыныплъым иIэкIыб селекциехэм; огъу лъэхъаным чIыгум имикробиологическэ зытет къызэтегъэнэжьыгъэным ыкIи нэмыкIхэм.

Химием ыкIи ФХМИ-м якафедрэрэ мэкъу-мэщ технологиехэм яфакультетрэ якIэлэегъаджэхэм докладхэр секциитIумэ язэхэсыгъохэм къащашIыгъэх — «Фундаментальнэ ыкIи прикладной ушэтынхэр химием ешIылIэгъэнхэр» ыкIи «Экологические аспекты безопасности объектов антропогенной среды» зыфиIорэмрэ. УпчIэ шъхьаIэхэу фундаментальнэ ыкIи прикладной ушэтынхэу тыкъэзыуцухьэрэ дунаим ихимие фэгъэхьыгъэу щыIэхэм ахэр къатегущыIагъэх, узэрэлъыплъэн плъэкIыщт шIыкIэхэр, ащ епхыгъэ гумэкIыгъохэр, цIыфым ихъызмэт-производственнэ IофшIэн биосферэм иягъэу ригъэкIырэр зыфэдизыр ыкIи нэмыкIхэр къыраIотыкIыгъэх.

Гъомлэпхъэ технологиехэм ыкIи шхыныгъохэм ягъэхьазырын якафедрэ ипащэу, техническэ шIэныгъэхэмкIэ докторэу Хъоткъо Зурет секциеу «Инновационные технологии переработки сельскохозяйственной продукции и производство пищевых продуктов функционального назначения» зыфиIорэм изэхэсыгъо зэрищагъ. Ушэтынэу къагъэлъэгъуагъэмэ темэ зэфэшъхьафыбэ зэлъаубытыгъ — хэушъхьафыкIыгъэ гъомлапхъэмэ къащегъэжьагъэу лактозэ зыхэмылъ щэмэ анэсыжьхэу. Секцием хэлажьэрэмэ анахьэу къыхагъэщыгъэр кIымэфэ проектнэ еджапIэу «Полярис-Адыгея» зыфиIорэр ары — станицэу Дондуковскэм дэт колледжым мэкъу-мэщым фэгъэзагъэу щырагъаджэхэрэм. КIэлэеджакIомэ япроектхэр мыщ фэдэ лъэныкъохэмкIэ къатыгъэх: пектинэр зыхэлъ пластинэхэу жэ кIоцIыр къызытIасхъэкIэ агъэфедэхэрэр; тэджэпсыр зыхэмылъ хьалыгъур; нэIум Iуалъхьэрэ нэгурыхъоу пектиныр зыхэлъхэр; алкоголь зыхэмылъэу, ау пектиныр къызэбэкIырэ щаехэр; гидрофильнэ суппозиториехэм апае лъапсэ хъунэу къаугупшысыгъэхэр.

Мэкъу-мэщ технологиехэм яфакультет секционнэ зэхэсыгъоу «Цифрэ технологиехэр чIыгу гъэпсыным ыкIи кадастрэ IофшIэным зэрэщагъэфедэхэр» зыфиIорэр щыкIуагъ, чIыгу гъэпсыным икафедрэ испециалистхэу профессорэу Iэшъынэ Юныс зиIэшъхьэтетхэр зэрипхыгъэх. ЗытегущыIагъэхэр — непэрэ уахътэм диштэрэ цифрэ шIыкIэхэр, чIыгу гъэпсыным ипроцесс нахь къэзгъэпсынкIэхэрэр, кадастрэ IофшIэнхэр нахь тэрэзэу зэзгъэзафэхэрэр, чIыгу зэфыщытыкIэхэр нахь нафэ къэзышIыхэрэр. Геоинформационнэ системэр зэрэрахьылIэрэм фэгъэхьыгъэ опытэу яIэмкIэ зэхъожьыгъэх. Пилот зэрымыс быбырэ аппаратхэр (БПЛА) аэрофотосъёмкэмкIэ зэрагъэфедэхэрэр, чIыгу Iахьхэр гъэIорышIэнхэм ылъэныкъокIэ яшIуагъэу къакIорэм анаIэ тырадзагъ.

Гъомлэпхъэ производствэм итехнологиехэм, машинэхэм ыкIи Iэмэ-псымэхэм якафедрэ ипащэу, профессорэу, техническэ шIэныгъэхэмкIэ докторэу Сихъу Хьазрэт яIэшъхьэтетэу Iэнэ хъураеу «Повышение функциональности продуктов питания через использование инновационных ингредиентов технологий, технологического оборудования в агропромышленном комплексе и пищевой промышленности» зыфиIорэр рагъэкIокIыгъ. Iэнэ хъураем ипшъэрылъыр — практикэ анахь дэгъухэр къыхэгъэщыгъэнхэр, шIыкIэхэр къэгъотыгъэнхэр, производствэмкIэ IэпыIэгъу хъущт предложениехэр къэхьыгъэнхэр.

Секциеу «Современные технологии и оборудование для оптимизации переработки растительного сырья и вторичных отходов, направленные на улучшение качества продукции и повышение энергоэффективности в пищевой промышленности» зыфиIорэр зэхэзыщагъэр техническэ шIэныгъэхэмкIэ кандидатэу, гъомлэпхъэ производствэм итехнологиехэм, машинэхэм ыкIи Iэмэ-псымэхэм якафедрэ идоцентэу Ольга Мариненкэр ары. Хэхъоныгъэхэр зыщашIырэ уахътэм ыкIи экологием ылъэныкъохэр къызщыдалъытэрэм инновационнэ технологическэ шIыкIэ-амалхэм  анахьэу анаIэ тырадзэ, пыдзафэхэр нахь макIэ шIыгъэнхэм ягупшысэх.

Секциеу «Современные аспекты таможенного дела и товароведения» зыфиIорэм  изэхэсыгъо стандартизацием, метрологием ыкIи товарнэ экспертизэм икафедрэ щыкIуагъ, профессорскэ-кIэлэегъэджэ купэу кафедрэм щылажьэхэрэр хэлэжьагъэх. Секцием ипэщагъэр экономикэ шIэныгъэхэмкIэ кандидатэу Мыгу Ирин. Зэхэсыгъом Iофыгъуабэ къыщаIэтыгъ, ахэр нахьыбэрэмкIэ таможеннэ сферэм ыкIи товароведческэ экспертизэм афэгъэхьыгъагъэх, зэхъокIыныгъэхэм ялъэхъан, цифрэ трансформацием ахэр зэрезэгъыхэрэм атегущыIагъэх. Анахьэу къыхагъэщыгъэхэр непэрэ уахътэм диштэрэ технологиехэр — искусственнэ интеллектыр, блокчейныр, аналитикэр — ахэмэ чIыпIэу таможеннэ уплъэкIунхэм ащаубытырэр, товармэ яидентификацие нахь тефэу къыхэгъэщыгъэным ыкIи дунэе бэдзэрым ищынэгъончъагъэ зэрэхэлажьэхэрэр къыкIагъэтхъыгъэх.

Секциеу «Современные формы развития креативной отрасли России» зыфиIорэм изэхэсыгъо джащ фэдэу стандартизацием, метрологием ыкIи товарнэ экспертизэм икафедрэ щыкIуагъ, профессорскэ-кIэлэегъэджэ купэу кафедрэм щылажьэхэрэр, дэн производствэм Iоф щызышIэхэрэр ащи  хэлэжьагъэх. Дэн производствэм епхыгъэ хъызмэтшIэпIэ цIыкIухэм экономикэм шIуагъэу къыфахьырэм игугъу зэхэсыгъом къыщашIыгъ. Секцием изэхэсыгъо промышленность псынкIэм хэхьэрэ предприятиемэ япащэмэ докладхэр къыщашIыгъэх: ООО «Людмила», ООО «Дом быта», ГУК «Театральное объединение РА» зыфиIохэрэм.

ПсэолъэшI ыкIи общепрофессиональнэ дисциплинэхэм якафедрэ секциеу «Промышленные сооружения в городской инфраструктуре» зыцIэ зэхэсыгъо щыкIуагъ, ащ иIэшъхьэтетыгъэр кафедрэм икIэлэегъэджэ шъхьаIэу Саенко Н.Н. Джащ фэдэу секцием изэхэсыгъо кафедрэм щылажьэрэ кIэлэегъаджэхэр хэлэжьагъэх. УпчIэу къыщаIэтыгъэмэ ащыщыгъэх къэлэ архитектурэр промышленостым зыкъызщиIэтырэ лъэхъаным къызэрэзэтенэжьырэм е зэрэзэхъокIырэм афэгъэхьыгъэхэр, инженернэ шIыкIэу щыIэхэр, тарихъ-техническэ лъэныкъохэр ыкIи нэмыкIхэр.

Секциеу «Волонтерские инициативы в сфере строительства и инженерной поддержки» зыфиIорэм изэхэсыгъо социальнэ мэхьанэ зиIэ проектхэу практико-ориентированнэ шапхъэм илъхэм атегущыIагъэх, ахэр студентмэ ягъэхьазырын программэ къыдыхэлъытагъэх. Анахьэу анаIэ зытырадзагъэр гуфэкIо  движениер, ныбжьыкIэмэ яполитическэ ыкIи гражданскэ пIуныгъэр ары. Секцием иIофшIэн къыгъэлъэгъуагъ гуфэкIо Iофхэм мэхьанэшхо зэряIэр, псэолъэшIын Iофхэми нэфэшъхьафхэми чанэу зэрахэлажьэхэрэр.

Экологическэ факультетым ландшафтнэ архитектурэм ыкIи мэз Iофым икафедрэу хахьэрэм секциеу «Современные проблемы ландшафтной архитектуры в урбанизированный среде» зыцIэ зэхэсыгъо зэхищагъ. Объектхэм апэIулъ шъолъырхэм язэтегъэпсыхьан, ландшафтнэ проектированием ыкIи чъыгхатэ-парковэ псэолъэшIыным афэгъэхьыгъэ упчIэхэр къыщаIэтыгъэх. Адыгэ Республикэм ыкIи ащ икъэлэ шъхьаIэ гъэкIэрэкIэгъэнхэмкIэ ландшафтнэ архитектурэм ылъэныкъокIэ арахьылIэхэрэм ямэхьанэ, проект шIагъохэр зэрэпхыращыхэрэр къыраIотыкIыгъэх.

Экологием ыкIи тыкъэзыуцухьэрэ дунаим якъэухъумэн якафедрэ секциеу «Обеспечение пожарной безопасности в техносфере» зыфиIорэм фэгъэхьыгъэ зэхэсыгъор щыкIуагъ, ащ иIэшъхьэтетыгъэр доцентхэу Къыздырмыш Сулиетрэ Елена Кучинскамрэ. Iофыгъуабэ зэхэсыгъом щызэхафыгъ: информационнэ ыкIи цифрэ технологиехэр мэшIогъэкIосэн системэм зэрэщагъэфедэхэрэр, егъэджэнымкIэ непэрэ уахътэм диштэрэ екIолIакIэу къыхахыгъэхэр, псыр къызэрэращалIэрэ системэхэм ягъэкIэжьын, унэхэр къэухъумэгъэнхэр ыкIи нэмыкIыбэхэр.

Инженернэ факультетым иIофышIэхэри чанэу а I-рэ Дунэе научнэ-практическэ конференциеу «ГЪЭСЭНЫГЪЭР – НАУКЭР – ТЕХНОЛОГИЕХЭР» зыфиIорэм хэлэжьагъэх. 

Автомобильнэ транспортым икафедрэ ащытегущыIагъэх автомобильнэ транспортым цифрэ шIыкIэхэмрэ непэрэ уахътэм диштэрэ технологиехэмрэ зэрэщагъэфедэхэрэм. Секциемэ япащагъэх доцентхэу Инна Ахуновар ыкIи Валентина Артамоновар.

Кафедрэм ипащэу Татьяна Дёминар яIэшъхьэтетэу хьисапым, физикэм ыкIи системнэ анализым якафедрэ икIэлэегъаджэмэ хьисапымрэ физикэмрэ апшъэрэ еджапIэхэм ягъэсэныгъэ программэмэ чIыпIэу ащаубытырэм игугъу ашIыгъ. 

Инженернэ факультетым идеканэу, чIыдэгъэ Iофым ыкIи энергетикэм якафедрэ ипащэу Мэрэтыкъо Муратэ зэхэсыгъоу зэрищагъэм пилот зэрымыс быбырэ аппаратхэр газотранспортнэ системэхэм яуплъэкIункIэ агъэфедэн зэралъэкIыщт шIыкIэхэм щатегущыIагъэх, нэмыкI Iофыгъохэми.

Экономикэм ыкIи гъэIорышIэным яфакультет зэфэшъхьаф ушэтын Iофыгъохэм афэгъэхьыгъэхэ секционнэ зэхэсыгъохэр ыкIи научнэ семинархэр щыкIуагъэх.

Финансхэмрэ кредитымрэ якафедрэ зэхэсыгъохэр секциитIумэ ащызэхащагъэх: «Тенденции развития региональных и отраслевых рынков в условиях современных вызовов: экономический аспект» зыфиIорэр (пащэр — факультетым идеканэу Ешыгоо Светлан) ыкIи «Экономика, финансы, инновации: актуальные вопросы теории и практики» зыфиIорэр (пащэр — доцентэу Хьамырзэ Саида). Урысыем иэкономикэ пэрыохъу къыфэхъурэ лъэныкъохэм, структурнэ зэхъокIыныгъэхэу шъолъырхэм ащыхъухэрэм, финансовэ системэм изыпкъитыныгъэ ыкIи нэмыкIыбэхэм ягугъу зэхэсыгъохэм ащашIыгъ.

Маркетингым, сервисым ыкIи туризмэм якафедрэ секционнэ зэхэсыгъоу «Инновационные подходы и устойчивое развитие в сфере гостеприимства и туризма: вызовы и перспективы» зыфиIорэр щырагъэкIокIыгъ (пащэр — доцентэу КъумпIыл Анжелика) ыкIи «Современный туризм и научно-популярный подход как ключевой тренд отрасли» зыфиIорэр (пащэр — доцентэу Светлана Калашниковар). Зэхэсыгъомэ ахэлэжьагъэхэм туристическэ индустрием  экономикэм шIуагъэу къыфихьырэм, ар шъолъырым исоциальнэ-культурнэ хэхъоныгъэ зэрэхэлажьэрэр, Адыгэ Республикэм итуристическэ отраслыр пштэмэ, ащ экологие зыпкъитыныгъэм иIахьэу хилъхьэрэм. хьэкIэегъэблэгъэным афэгъэхьыгъэхэм ыкIи нэмыкIхэм ягугъу къашIыгъ.

Секциеу «Проблемы и перспективы социально-экономического развития региона» зыфиIорэр менеджментым ыкIи шъолъыр экономикэм якафедрэ щыкIуагъ. Гъэсэныгъэ организациехэм, шъолъыр экономикэм ягъэIорышIэнымкIэ шIыкIэу щыIэхэм афэгъэхьыгъэ докладхэр къашIыгъэх. Джащ фэдэу апшъэрэ еджапIэм игъэIорышIэн,  Адыгеим иагропромышленнэ комплекс икластернэ хэхъоныгъэ, социальнэ лъэныкъом проектнэ екIолIакIэу иIэр, цифровизациер ыкIи сакъыныгъэ производствэр, инновациехэу медиам щагъэфедэхэрэр, организациемэ якадровэ амалхэр, кризисым пэшIуекIорэ гъэIорышIэныр, маркетинговэ коммуникациехэм ахэщэгъэнхэр, нэмыкIхэр зытегущыIагъэхэмэ ащыщых.

Философием, социологием ыкIи педагогикэм якафедрэ секцием изэхэсыгъоу «Актуальные вопросы современного социогуманитарного знания» зыфиIорэр щыкIуагъ. Секцием иIофшIэн хэлэжьэнхэу МКъТУ-м икIэлэегъаджэмэ ыкIи иаспирантмэ заявкэ 20-м ехъу къатыгъагъ. ТхакIоу МэщбэшIэ Исхьакъ итхылъэу «Сто первый перевал» зыфиIорэм ищысэкIэ адыгэ литературэм икультурнэ кодмэ атегущыIагъэх, Къыблэ Урысыем иконцертнэ ыкIи кинопрокатнэ организациехэм шъолъыр ыкIи лъэпкъ зыкIыныгъэр гъэпытэгъэным яIахьэу халъхьэрэр къыраIотыкIыгъ, джащ фэдэу дунэе политикэм русофобиер IэубытыпIэ зэрэщашIырэм фэгъэхьыгъэ щысэхэр къахьыгъэх.

Конституционнэ псэолъэшIыным, къэралыгъо ыкIи муниципальнэ гъэIорышIэным якафедрэ секцием изэхэсыгъохэу «Актуальные вопросы государственного управления и местного самоуправления» зыфиIорэр (пащэр— доцентэу Болэкъо Мариэтта) ыкIи «Проблемы и направления социально-экономического развития территории» зыфиIорэр (пащэр — доцентэу Надежда Продиблох) зэхищагъэх. Анахьэу анаIэ зытырадзагъэхэр: социальнэ-экономическэ хэхъоныгъэу шъолъырмэ ашIырэр, къэралыгъо гъэIорышIэным епхыгъэ упчIэхэр ыкIи чIыпIэ зыгъэIорышIэжьыныр, инновационнэ кластерхэр Адыгэ Республикэм зэрэщыпыхращыхэрэр, нэмыкIыбэхэр.

Тарихъым ыкIи правэм якафедрэ Iэнэ хъураем  изэхэсыгъоу «Северо- Западный Кавказ в историческом времени и пространстве» зыфиIорэр ригъэкIокIыгъ. Темыр-КъохьэпIэ Кавказым я XIX-XXI-рэ лIэшIэгъухэм ащыпсэурэ адыгэмэ ятарихъ епхыгъэ гумэкIыгъо шъхьаIэхэм атегущыIагъэх. Тарихъ шIэныгъэхэмкIэ докторэу, профессорэу, тарихъым ыкIи правэм якафедрэ ипащэу Кудаикъо Светланэ къышIыгъэ псалъэу «Генезис адыгской (черкесской) диаспоры: геополитический и этнологический анализ (ХIX в.)» зыфиIорэм игъэкIотыгъэу тегущыIагъэх. Iэнэ хъураем иIофшIэн хэлэжьагъэхэм ащыщ тарихъ шIэныгъэхэмкIэ докторэу, доцентэу, Гуманитар ушэтынхэмкIэ АР-м иушэтэкIо институтэу КIэрэщэ Тембот ыцIэ зыхьырэм  тарихъымкIэ иотдел инаучнэ IофышIэу Пэнэшъу Аскэр Дзэпщ ыкъор. Зыпкъитыныгъэ IэкIыб политикэр регъэкIокIыгъэнымкIэ практическэ мэхьанэ зиIэ Iофыгъохэр Iэнэ хъураем къыщаIэтыгъэх.

Фармацевтическэ факультетым научнэ-практическэ конференцием къыдыхэлъытагъэу секциищмэ язэхэсыгъохэр зэхащагъэх: «Химия в медицине и фармации» (пащэр — фармацевтическэ шIэныгъэхэмкIэ докторэу, профессорэу Ифрат Зилфикаров); «Фармацевтическое образование» (пащэр — биологическэ шIэныгъэхэмкIэ кандидатэу, доцентэу Ирина Дьяковар); «Общие вопросы фармации» (пащэр — медицинэ шIэныгъэхэмкIэ кандидатэу, доцентэу Артур Арутюновыр). Секциемэ яIофшIэн ахэлэжьагъэх фармацием, медицинскэ ыкIи фармацевтическэ химием якафедрэмэ якIэлэегъаджэхэр, ахэмэ докладхэр  химиер  медицинэм зэрэщагъэфедэрэм ехьылIагъэу къашIыгъэх. Анахьэу анаIэ зытырадзагъэр шIэныгъэу агъотырэр уплъэкIужьыгъэныр, дисциплинэхэу «Химиер», «Биотехнологиер» ыкIи «Фармацевтическэ IофшIэным изэхэщэн» зыфиIохэрэмкIэ зэрэрагъаджэхэрэр, аккредитациер провизорхэм 2025-рэ илъэсым зэракIурэр, нэмыкIхэр.

Секциеу IэкIыбыбзэхэм афэгъэхьыгъагъэм егъэджэным ипрофессиональнэ-ориентированнэ упчIэхэм яхьылIэгъагъ, аутентичнэ материалхэр зэрагъэфедэхэрэм, межкультурнэ екIолIакIэхэм, IэкIыбыбзэхэм язэгъэшIэнкIэ цифрэ технологиехэр зэрагъэфедэхэрэм атегущыIагъэх.

IэкIыбыбзэхэм якафедрэ секциеу «Организация профессионально-ориентированного обучения иностранному языку в неязыковом вузе» зыфиIорэ зэхэсыгъор щыкIуагъ. IэкIыбыбзэхэмкIэ егъэджэгъэнхэм епхыгъэ гумэкIыгъохэр ащ къыщаIэтыгъэх: егъэджэн-методическэ пособиемэ ямэхьанэ; аутентичнэ материалхэр зэрагъэфедэхэрэр; IэкIыбыбзэхэм язэгъэшIэнкIэ цифрэ технологиехм шIуагъэу къатырэр, нэмыкIхэр. Кафедрэм идоцентмэ егъэджэн IофшIэным зэфэхьысыжьхэр фашIыгъэх, пратикэмрэ теоретическэ материалхэмрэ IэубытыпIэ ашIыгъэх, профессиональнэ контентым анаIэ тырадзагъ.

А I-рэ Дунэе научнэ-практическэ конференциеу «ГЪЭСЭНЫГЪЭР – НАУКЭР – ТЕХНОЛОГИЕХЭР» зыфиIорэр хъугъэ-шIэгъэ ин дэдэу щытыгъ, шIэныгъэлэжьхэр, кIэлэегъаджэхэр, аспирантхэр, студентхэр, IэкIыб университетмэ ялIыкIохэр зэрипхыгъэх. Мэфищым къыкIоцI МКъТУ-р научнэ зэхэгущыIэжьыным, практикэхэмкIэ, научнэ ушэтынхэмкIэ зэхъожьынхэмкIэ площадкэ шIагъоу щытыгъ. Гъэсэныгъэ программэхэм ягъэкIэжьынкIэ ыкIи дунэе зэдэлэжьэныгъэм алъэныкъокIэ Iофтхьабзэр IофыгъуошIоу хъугъэ.