Мыекъопэ къэралыгъо технологическэ университетым конференциеу «Противодействие деструктивным идеологиям и радикализации молодежи в образовательной среде» зыфиIорэр щыкIуагъ, ащ хабзэ органхэм, дин организациехэм ыкIи экспертнэ сообществэм ялIыкIохэр хэлэжьагъэх.

Iофтхьабзэр зэрищагъ ныбжьыкIэ политикэмкIэ ыкIи гъэсэкIо IофшIэнымкIэ МКъТУ-м ипроректорэу БрантIэ Муратэ. Конференциер къызэIуихызэ, ащ къыхигъэщыгъ университетым мыхъомышIагъэхэу терроризмэм епхыгъэхэр щымыхъунхэм пэшIорыгъэшъэу зэрэдэлажьэхэрэр, ныбжьыкIэхэм зэпыу фамышIэу Iоф адэшIэгъэным мэхьанэшхо зэриIэр.

Экстремизмэм ыкIи терроризмэм апэшIуекIогъэным афэгъэхьыгъэ пэшIорыгъэшъ Iофтхьабзэхэр Адыгэ Республикэм игъэсэныгъэ организациехэм зэращагъэцакIэрэр къыIотагъ гъэсэныгъэмрэ наукэмрэкIэ АР-м и Министерствэ информационнэ щынэгъончъэнымкIэ, кадрэхэмкIэ ыкIи правэмкIэ иотдел ипащэ игуадзэу Хьалэщтэ Казбек.

Лъэпкъ IофхэмкIэ, IэкIыбым щыIэ тилъэпкъэгъухэм зэпхыныгъэ адыряIэнымкIэ ыкIи къэбар жъугъэм иамалхэмкIэ АР-м и Комитет итхьаматэу Долэ Долэт конференцием хэлажьэрэмэ, хабзэ органхэм, дин организациехэм ыкIи экспертнэ сообществэм ялIыкIохэмэ анаIэ тыраригъэдзагъ зыкIыныгъэ екIолIакIэм мы Iофыгъом мэхьанэшхо зэриIэм, зэгъусэхэу экстремизмэм ыкIи терроризмэм апэшIуекIонхэ зэралъэкIыщтым.

Шъхьафэу дин Iофхэм атегущыIагъэх. Адыгэ Республикэм ыкIи Пшызэ шъолъырым ащыпсэурэ быслъымэнмэ ямуфтие игуадзэу, Кощхьаблэ дэт мэщтым иимамэу Хъущт Азамат къыхигъэщыгъ къэралыгъо-дин зэдэлэжьэныгъэу зэдыряIэр экстремизмэр къэмыхъуным, ныбжьыкIэхэр ащ щыухъумэгъэнхэм афытегъэпсыхьагъэу агъэцакIэрэмэ шIуагъэ къызэратырэр.

ЗэхэгущыIэжьмэ зэфэхьысыжь къафишIыгъ АР-м терроризмэм пэшIуекIорэ комиссиеу иIэм иаппарат ипащэу ЛIый Азамат, ащ анахьэу къыхигъэщыгъэр къаIэтыгъэ упчIэхэм шIокI ямыIэу атегущыIэнхэу зэрэщытыгъэхэр, ныбжьыкIэхэм азыфагу рэхьатныгъэ илъынымкIэ, щынэгъончъэу псэунхэмкIэ  ашIэрэ Iофым мэхьанэшхо зэриIэр.

Конференциер площадкэ дэгъу дэдэ хъугъэ, мыщ опытэу аIэкIэлъхэмкIэ щызэхъожьыгъэх ыкIи мы Iофыгъом МКъТУ-м иIахьышхо зэрэхэлъыр джыри зэ къыщигъэшъыпкъэжьыгъ.