Врач сэнэхьатыр — пшъэдэкIыжь ин зыпылъ анахь гъогу хьылъ. Ащ щэIагъэ ищыкIагъ, ренэу уеджэныр, цIыфмэ Iоф адэпшIэшъуныр. ШIэныгъэмрэ практикэмрэ зэфэдэу ахэмэ агъэфедэ, мафэ къэс пшъэрылъыкIэхэр апашъхьэ къеуцох.

А гъогур къыхэзыхыгъэ студентхэм зэу ащыщ, — Хатиб Басел Дж.Х., ар Палестинэм къикIыгъ. Урысыем къэкIуагъ пшъэрылъ хэхыгъэ иIэу — врач хъунэу. Апэрэ ушэтыпIэу фэхъугъэр урысыбзэм изэгъэшIэн: ар умышIэу уеджэни, ушэтынхэр птынхи плъэкIыщтэп, практическэ IофшIэнхэм уахэлэжьэшъущтэп. Ащ пае апэрэ илъэсыр Хатиб бзэм изэгъэшIэн фигъэшъошагъ, ар Мыекъопэ къэралыгъо технологическэ университетым идунэе факультет иублэпIэ отделение щызэшIуихыгъ.

Ушэтынхэр дэгъоу зетыхэм ыуж, ар Мединститутым илечебнэ факультет чIэхьагъ. Еджэфэ Хатиб шIэныгъэхэр икъоу зэригъэгъотынхэм, чанэу университетым иIофхэм зэрахэлэжьэщтым апылъыгъ. СыдигъокIи анахь лъэгэпIэ инхэм зэранэсыщтым ыуж итыгъ, бэ къыдэхъугъэри. Ежь къызэриIорэмкIэ, медицинэ материалым нахьи шIокъиныгъэр урысыбзэр зэрэзэригъэшIэщтыр арыгъэ. Практическэ IофшIэнхэм теориер ащигъэпытэжьын ылъэкIыщтыгъэ, сэнэхьатэу къыхихыгъэр нахь къызэрэгурыIощтым дэлэжьагъ.

Непэ Хатиб Басел Дж.Х. Московскэ хэкум псауныгъэр къэухъумэгъэнымкIэ и Къэралыгъо бюджетнэ учреждениеу «Истринскэ клиническэ сымэджэщым» щэлажьэ. Тиуниверситет къычIитIупщыгъэм тырэгушхо, джыри нахь лъэгэпIэ инхэм анэсынэу, ипшъэрылъхэр зэкIэ ыгъэцэкIэшъунхэу, Урысыем федэ къыфихьызэ Iоф ышIэнэу тыфэлъаIо!

Къыхэгъэщыгъэн фае, МКъТУ-м хэхьэрэ медицинскэ институтыр 2004-рэ илъэсым агъэпсыгъ, псауныгъэм икъэухъумэн системэ ищыкIэгъэ специалистхэр щагъэхьазырых. Хэгъэгу зэфэшъхьафхэм къарыкIыгъэ студентхэр институтым щеджэх, ахэмэ ащыщых Палестинэр, Израиль, Ливан, Сириер, Ирак, Йемен, Тыркуер, Непал, Бразилиер, Марокко ыкIи Гану.

Дунаим ихэгъэгубэмэ ащыщ студентмэ егъэджэн процессыр нахь зэмылIэужыгъоу къашIы, институтым къычIитIупщырэмэ ашIэрэм яцыхьэ пытэ телъэу япрофессиональнэ гъогу рагъажьэ.