— ТэркIэ ащ мэхьанэшхо иIагъ, — джарэущтэу МКъТУ-м иIэкIыб студентмэ агу къэкIыжьы я IV-рэ Дунэе форумэу «Кавказыр-Каспий-КъокIыпIэ Благъэр» зыфиIоу Ставрополь щыкIуагъэр.

Хэгъэгу 20-мэ къарыкIыгъэ ныбжьыкIэ пэрытмэ мыгъэ форумыр яплощадкэ хъугъэ — Китаим ыкIи Индием къащегъэжьагъэу Марокко, Палестинэм ыкIи Колумбием анэсыжьэу. Хэлэжьагъэхэр зэкIэ зэзыпхыгъэхэр урысыбзэмрэ кульурэмрэ зэрякIасэр ары, джащ фэдэу социальнэ мэхьанэ зиIэ гукъэкIхэр яхэгъэгухэм ащагъэцэкIэнымкIэ гухэлъэу яIэхэр.

Мыекъопэ къэралыгъо технологическэ университетыр форумым къыщызгъэлъэгъуагъэхэр лечебнэ факультетым истуденткэу Сесилия Кизито ыкIи инженернэ факультетым истудентэу Эдгар Кахана. НыбжьыкIэмэ Iофтхьабзэм гъэсэныгъэ ыкIи культурнэ опыт дэгъу къыхахыгъ.

— Форумым ипрограммэ гъэшIэгъон дэдагъ. Материалыр непэрэ уахътэм диштэу къатыщтыгъэ — джэгукIэхэмкIэ ыкIи интерактивнэ шапхъэхэмкIэ, аудиториери къыхагъэлажьэзэ. ТэркIэ ащ осэшхо иIагъ, урысыбзэр тэ тиныдэлъфыбзэпышъ ары, — къеIуатэ Сесилия.

Форумым къыдыхэлъытагъэу социальнэ ыкIи грантовэ IэпыIэгъум анахьэу анаIэ тырадзагъ, пэрытныгъэ шэнэу ахэлъхэм ахагъэхъоным, культурнэ лъэныкъор нахь къябэкIэу студенческэ зэхэтхэм Iоф ащашIэным, зэчIыгогъу-зэлъэпкъэгъухэр зэхэщэгъэнхэм адэлэжьэнхэм зэдяусагъэх.

— Хэгъэгу зэфэшъхьафхэм къарыкIыгъэ студентхэм тазэрэдэгущыIагъэм шIэныгъакIэхэр ыкIи опытыкIэхэр къытитыгъэх, студенческэ гукъэкIхэр щыIэныгъэм пхырытщынхэмкIэ а зэкIэри IэпыIэгъушIу тфэхъущт,— къыддэгощагъ иеплъыкIэхэмкIэ Эдгар.
«Тэ интерактивнэ лекциеу искусственнэ интеллектыр социальнэ проектхэм зэращагъэфедэхэрэм афэгъэхьыгъэм тедэIугъ, креативнэ гупшысэнымкIэ мастер-классхэр ткIугъэх, жабзэ IэпэIэсэныгъэр зэдгъэшIагъ, ИИ-р тикIэщакIоу лъэтегъэуцохэр тшIыгъэх, джащ фэдэу творческэ сессиер тревел-видеор гъэпсыгъэнымкIэ ткIугъэ».

Дунэе зэпхыныгъэхэр гъэпытэгъэнхэмкIэ форумыр гукъыдэчъ шъыпкъэ хъугъэ. Хэгъэгум иапшъэрэ еджапIэмэ ащеджэрэ студентмэ шIэныгъакIэхэмрэ гукъэкIыжь фабэхэмрэ зыдахьыжьыгъэх.