УФ-м наукэмкIэ ыкIи апшъэрэ гъэсэныгъэмкIэ иминистрэ игаудзэу Дмитрий Афанасьевым иIофшIэгъу дэкIыгъо Мыекъопэ къэралыгъо технологическэ университетым щыкIуагъ.

IофшIэгъу дэкIыгъоу министрэ гуадзэм иIагъэр зыфэгъэхьыгъагъэр МКъТУ-м хэхьэрэ Дзэ егъэджэн гупчэм изытет зэгъэшIэгъэныр ары. Пилот зэрымыс авиационнэ системэхэм, инфраструктурэр, мэкъу-мэщ лъэныкъор, гъомлэпхъэ промышленностыр, джащ фэдэу научнэ-гъэсэныгъэ проектхэу университетым иIэхэр зыфэдэхэм  защигъэгъозагъ.

Апэ дэдэ Дзэ егъэджэн гупчэм къыщырагъэжьагъ. МКъТУ-м иректорэу Къуижъ Саидэрэ МКъТУ-м хэхьэрэ Дзэ егъэджэн гупчэм ипащэу Нурлан Самадьяновымрэ Дмитрий Владимир ыкъом рагъэлъэгъугъ гупчэм Iоф зыдишIэрэ лъэныкъохэр, Урысые Федерацием и УIэшыгъэ КIуачIэхэм апае агъэхьазырырэ кадрэхэр. Министрэ гуадзэм непэрэ уахътэм диштэрэ Iэмэ-псымэхэмкIэ зэтегъэпсыхьэгъэ классхэм анаIэ тыридзагъ: дзэ-политическэ ыкIи тактикэ-хэушъхьафыкIыгъэ ухьызырыныгъэм афытегъэпсыхьэгъэ аудиториехэм, компьютернэ классхэу пилот зэрымыс авиационнэ системэхэр гъэIорышIэгъэнхэм апае симуляторхэр зычIэтхэм, джащ фэдэу егъэджэн-ушэтэкIо IофшIэныр зыщагъэцэкIэрэ лабораториеу «Проектированиер, БПЛА-р зыщагъэцэкIэжьырэр ыкIи зыщыфэсакъыхэрэр» зыфиIорэм, нэмыкIхэм.  Лабораторием курсантхэмрэ студентхэмрэ двигателым иконструкцие щызэрагъашIэ, моделированиер щызэрагъашIэ ыкIи   3D-печатым нэIуасэ щыфэхъух. Джащ фэдэу лъэныкъоу радиоэлектроннэ зэоным ыкIи   разведкэм зыфагъасэ.

ЕджэпIэ аудиториехэр Дмитрий Афанасьевым къызекIухьэхэм, ар курсантмэ адэгущыIагъ, упчIэхэр аритыгъэх,  еджэпIэ ужым пилот зэрымыс авиационнэ системэхэм алъэныкъокIэ къулыкъу ахьын гухэлъ яIэмэ зэригъэшIагъ. Непэ технологиеу БПЛА-м апае агъэфедэхэрэр дзэ ухьазырыныгъэм шъхьадэкIых, профессиональнэ практикэм иIахьэу мэхъух. Пилот зэрымыс авиационнэ системэхэр мэкъу-мэщым,  геодезием, промышленностым, экологием, псэолъэшIыным, шъолъырым иуплъэкIун, научнэ ушэтынхэм ащагъэфедэх. МКъТУ-м комплекснэ екIолIакIэр иIэу кIэлэеджакIохэр щырагъаджэх, экосистемэр къыдалъытэ.

Зы зэIукIэгъу Iахьыр шъхьафэу сакъыныгъэ гъэIорышIэныр МКъТУ-м зэрэщызэхэщагъэм фэгъэхьыгъагъ. Университетым ыгъэцэкIэгъэ проектхэр ыкIи аужырэ уахътэм гъэхъагъэу ышIыгъэхэр къыгъэлъэгъуагъэх: сакъыныгъэ гъэIорышIэныр апшъэрэ еджапIэм   2018-рэ илъэсым къыщыублагъэу щагъэфедэ, административнэ Iофыгъохэм шIуагъэу къатырэр къыIэтыгъ, егъэджэн процессым изэхэщэн нахьышIу хъугъэ, уахътэу атекIуадэрэр ыгъэкIэкIыгъ. ШIыкIэу къаIотагъэхэр министрэ гуадзэм шIогъэшIэгъоныгъэх, непэрэ уахътэм диштэрэ технологиехэр шъолъыр университетым зэрэрахьылIэхэрэр, сакъыныгъэ гъэIорышIэныр нэмыкIхэмкIэ зэрэщысэтехыпIэ шIагъор къыхигъэщыгъ.

Шъугу къэдгъэкIыжьын, жъоныгъокIэ мазэм 2025-рэ илъэсым МКъТУ-р ФГАНУ «Социогупч» зыфиIорэм компетенциехэмкIэ и Отраслевой гупчэ дэлажьэу ыублагъ. Илъэсныкъо зэдэлэжьэныгъэм изэфэхьысыжьэу документхэм зэдыкIэтхагъэх. «Социогупчэм» илIыкIомэ МКъТУ-м икомандэ осэшхо къыфашIыгъ: студентхэм афэгъэхьыгъэ документхэр зэрагъэзекIохэрэр анахь дэгъоу къыхагъэщыгъ, нэмыкI университетхэу хэгъэгум итхэм ащ фэдэ шIыкIэр ащагъэфедэнэу унашъо ашIыщт.

Ащ ыуж Дмитрий Афанасьевым нэIуасэ зафишIыгъ университетым щагъэхьазырыгъэ студенческэ командэмэ япроектхэм яэкспозициехэу  къагъэлъэгъуагъэхэм, ахэмэ ахэтыгъэх гъомлэпхъэ технологиехэм, фармацием, пилот зэрымыс быбырэ аппаратхэм япарк ыкIи нэмыкIхэр.

КIэухым, Дмитрий Афанасьевым къыхигъэщыгъ МКъТУ-р комплекснэ екIолIакIэ иIэу зэрэлажьэрэм мэхьанэшхо зэриIэр, анахьэу дзэ ухьазырыныгъэм, пилот зэрымыс авиационнэ системэхэм, мэкъу-мэщым алъэныкъохэмкIэ. Ащ къыкIигъэтхъыгъ тапэкIэ а стратегическэ мэхьанэ зиIэ Iофыгъохэр шъолъырми хэгъэгуми ащыгъэпытэгъэн зэрэфаер. Министрэ гуадзэм джащ фэдэу ынаIэ тыридзагъ университетым щызэхагъэуцуагъэ проектмэ якоммерциализацие лъагъэкIуатэмэ ишIуагъэ къызэрэкIощтым. Ахэмэ афэшъхьафэу Дмитрий Афанасьевым шIогъэшIэгъоныгъ Урысые форумэу «БАС: пространство для возможностей и развития» зыфиIоу МКъТУ-м мы илъэсым имэзэе мазэ зэхищэгъагъэр.