МКъТУ-м хьакIэегъэблэгъэным ыкIи туризмэм афэгъэхьыгъэ гъэсэныгъэ гукъэкIхэм ащыдэлажьэх. Университетыр еджапIэмэ Iоф зэрадишIэрэм зырегъэушъомбгъу, джащ фэдэу научнэ IэшIагъэхэр федеральнэ площадкэмэ къащегъэлъагъо.

Маркетингым, сервисым ыкIи туризмэм якафедрэ икIэлэегъаджэмэ Iофтхьабзэхэр профильнэ классмэ ащырагъэкIокIых, кIэлэеджакIохэр сэнэхьатэу зэрагъэгъотыщтхэм нэIуасэ фашIых. Станицэу Пшехскэм игурыт еджапIэу № 26-м икIэлэеджакIохэр зыгъэпсэфыпIэу «Лэгъо-Накъэм» ащэгъагъэх. Предприятием итарихъ, Iофэу зыфэгъэзагъэр, проектнэ IофшIэнэу ыгъэцакIэрэр кIалэмэ зэрагъэшIагъ, шъолъырыр къаплъыхьагъ ыкIи мастер-классмэ ачIэсыгъэх. Iофтхьабзэр щае ешъонымкIэ аухыгъ, авторскэ конфетмэ лъэтегъэуцо афашIыгъ.  

Мыекъопэ районым ит гъэсэныгъэ гупчэу  №5-м лъэныкъоу «ХьакIэегъэблэгъэныр ыкIи туризмэр» зыфиIорэмкIэ егъэжьэпIэ десэ щырагъэкIокIыгъагъ. Кафедрэм идоцентэу Хьанэхъукъо Заремэ  интерактивнэ десэу къытыгъэм кIэлэеджакIохэр нэIуасэ щыфэхъугъэх кафедрэм къыгъэхьазырырэ сэнэхьатхэр зыфэдэхэм, джащ фэдэу экономикэмрэ гъэIорышIэнымрэ яфакультет изытети щызэрагъэшIагъ. НыбжьыкIэхэр джэгукIэу «Туристскэ штурм» зыфиIорэм хэлэжьагъэх, сурэтхэр къыщашIэжьыгъэх, бзэ зэфэшъхьафхэр ыкIи хэгъэгухэр къызэрэраIотыкIырэмкIэ. Шъугу къэдгъэкIыжьын, Iофтхьабзэхэр Мыекъопэ къэралыгъо технологическэ университетымрэ гъэсэныгъэ организациехэмрэ язэдэлэжьэныгъэ зэзэгъыныгъэм елъытыгъэу зэрэрагъэкIокIыхэрэр.  

Мы IофшIэным дакIоу кафедрэм иIофышIэхэр джыри научнэ Iофтхьабзэмэ ахэлажьэх. Маркетингым, сервисым ыкIи туризмэм якафедрэ идоцентэу Хьанэхъукъо Заремэ я XIX-рэ Дунэе научнэ-практическэ конференцием МКъТУ-р къыщигъэлъэгъуагъ, ар спортымрэ туризмэрэмкIэ Московскэ къэралыгъо университетым щыкIуагъ.  

Докладэу «Адыгэ Республикэм туризмэмрэ хьэкIэегъэблэгъэнымрэ хэхъоныгъэ ащегъэшIыгъэнымкIэ гугъапIэу непэ иIэхэр» зыфиIорэм анахь шъхьаIэхэр къыщыхигъэщыгъэх: чаныгъэр, гастрономическэр, хъугъэ-шIагъэкIэ гъэпсыгъэр ыкIи этнотуризмэр. Шъхьафэу пшъэдэкIыжь зыпылъ туризмэм игъэпсын къыхэгъэщыгъ, шъолъырхэм азыфагукIэ гъогухэр, «туризмэ Iушыр» хэгъэхьэгъэныр, непэрэ уахътэм диштэрэ инфраструктурэр шIыгъэныр ыкIи  туристскэ-рекреационнэ кластерэу «Лэгъо-Накъэр» гъэцэкIэгъэныр.

Докладыр бэмэ ашIогъэшIэгъоныгъ. Зэхахьэм хэлэжьагъэмэ упчIабэхэр къатыгъэх шъолъырым итуризмэ фэгъэхьыгъэхэу, студентмэ Адыгеим ичIыпIэ дахэхэр ашIогъэшIэгъоныгъэх. Тилъэпкъ гъомлапхъэ иIэшIугъэ зыфэдэр ашIэным пае Хьанэхъукъо Заремэ адыгэ къуаем студентхэр хигъэIагъэх.