Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, тхьаматагъор ащ щызэрихьагъ ректорэу Къуижъ Саидэ. Университетым ищыIэкIэ-псэукIэ, хэхъоныгъэу егъэшIыгъэн фаехэм ащ ащытегущыIагъэх.

Повесткэ шъхьаIэу зэхэсыгъом иIагъэм къыдыхэлъытагъэу физкультурнэ-зыгъэпсэфыпIэ ыкIи спортивнэ IофшIэным къатегущыIагъ МКъТУ-м иэкологическэ факультет идеканэу Галина Коноваловар, ащ идоклад университетым 2023-2025-рэ илъэсхэм зэхэубытагъэу Iоф зэришIагъэр ылъапсэу гъэпсыгъагъэ. Апшъэрэ еджапIэм зыпкъитныгъэ физкультурнэ-спортивнэ IофшIэным исистемэ щызэтегъэпсыхьагъ: Iофтхьабзэ 30-м ехъу агъэцэкIагъ, ахэмэ 2024-2025-рэ илъэсхэм рагъаджэрэ нэбгырэ 2770-рэ ахэлэжьагъ, очнэ шапхъэмкIэ еджэхэрэм япроцент 67,2-рэ ар мэхъу. Студенческэ спортым и Дунэе мафэ къыдыхэлъытагъэу 2025-рэ илъэсым Iофтхьабзи 10 зэхащагъ, ахэмэ студент нэбгырэ 803-рэ ахэлэжьагъ. Университетыр чанэу апылъ ыкIи ахегъахъо спортивнэ секциехэм япчъагъэ, Урысыем и АССК а IофымкIэ дэлажьэ, «Универлигэм» изэнэкъокъухэм МКъТУ-м икомандэмэ апэрэ чIыпIэхэр къащахьых. Галина Михаил ыпхъум игущыIэхэм къащыхигъэщыгъ, 2024-рэ илъэсым апшъэрэ еджапIэр Урысые студенческэ фестивалэу адаптивнэ физическэ культурэмкIэ зэхащэгъэ «Гъунапкъэхэр тырагъэкIызэ» зыфиIорэм зэрэхэлэжьагъэр. Фестивалым къыдыхэлъытагъэу спортивнэ зэнэкъокъухэр фиджитал-баскетболымкIэ ыкIи японскэ волейболымкIэ рагъэкIокIыгъэх, ахэмэ зипсауныгъэкIэ фыкъуагъэ зиIэхэ студент 35-рэ ащызэнэкъокъугъэх. Университет кIоцIым щырагъэкIокIырэмэ афэшъхьафэу, МКъТУ-м истуденческэ сообществэ гъэхъэгъэшхохэр зышIыгъэ спортсменхэр хэтых: спортымкIэ дунэе классыцIэ зиIэ мастерэу зы нэбгыр, спортымкIэ Урысыем имастерхэу нэбгыри 8, мастер хъунхэмкIэ кандидатхэу 5, апэрэ разряд зиIэу нэбгырэ 26-рэ. ШIэныгъэлэжьхэм ясовет хэтхэм кIагъэтхъыгъ, тапэкIэ джыри егъэджэн-тренировочнэ процессыр зэрагъэкIэжьыщтыр, фиджитал-дисциплинэр зэрэхагъэхьащтыр ыкIи нахь студентыбэ спортивнэ Iофтхьабзэхэм зэрахащэщтхэр.

Педиатрическэ факультетым 2024-2025-рэ еджэгъу илъэсым Iоф зэришIагъэм ыкIи пшъэрылъэу иIэхэм къатегущыIагъ ащ идеканэу Гъуагъо Жаннэ. Ащ къышIыгъэ зэфэхьысыжьхэм къызэрагъэлъэгъуагъэмкIэ, гъэсэныгъэ процессыр зэхащагъ федеральнэ хэбзэгъэуцугъэмрэ ФГОС-мрэ адиштэхэу: пIалъэ гъэнэфагъэмэ азыфагу аттестациемрэ зэфэхьысыжь аттестациемрэ игъом рагъэкIокIых, кадрэ Iофыгъохэри шапхъэм итых. 2024-2025-рэ еджэгъу илъэсым къычIатIупщыгъэмэ ухьазырыныгъэ дэгъу къагъэлъэгъуагъ: къэралыгъо зэфэхьысыжь аттестациер студент 62-мэ акIугъ, ахэмэ ащыщэу нэбгыри 3-мэ дэгъу дэдэкIэ къызэраухыгъэр къэзыушыхьатрэ дипломхэр къыдахыгъэх. Факультетыр гъусэгъухэм адэлажьэ, сэнэхьат къыхэхыным ипрограммэ чанэу дэлажьэ, гъэсэныгъэ процессым иметодическэ Iофыгъохэм ахегъахъо. Iофтхьабзэу зэрахьэхэрэмэ якъэбар нахьыбэрэ къыхаутызэ ашIынэу, кIэлэегъаджэхэр нахь чанэу грантхэм якъыдэхын фэбэнэнхэу, специалист ныбжьыкIэмэ якъещэлIэн дэлэжьэнхэу шIэныгъэлэжьхэм ясовет хэтхэр къяджагъэх.

Медицинскэ институтым ипэщэ IэнатIэ ихэдзынхэр зэхэсыгъом щырагъэкIокIыгъэх, зэдырагъаштэу амакъэ фатыгъ ыкIи пащэу хадзыгъ медицинэ шIэныгъэхэмкIэ кандидатэу, Шъолъыр общественнэ организациеу «Врачмэ я Хасэ» хэтэу Хъурай Аслъан.

УпчIэу «Къэралыгъо экзаменационнэ комиссием итхьаматэ зэблэхъугъэным фэгъэхьыгъэр, ыпэкIэ тетыгъэр зэрэIукIыжьрэм фэшI» зыфиIорэмкIэ псалъэ къышIыгъ экономикэ шIэныгъэхэмкIэ кандидатэу, доцентэу, Егъэджэн-методическэ гъэIорышIапIэм ипащэу Наталья Чудесовам.

Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо упчIэу къыщаIэтыгъэмэ зэкIэмэ джэуапэгъу афэхъугъэх.