Мыекъопэ къэралыгъо технологическэ университетым истудентэу Сергей Шередько дронхэм язэпэчъэнкIэ Урысые студенческэ лигэм и Гран-при ятIонэрэ чIыпIэр къыщыдихыгъ, ар лъэныкъоу «Техническэ симуляторыр» ары зыхэлэжьагъэр.

Гран-при зэнэкъокъум анахь пилот дэгъухэу 40 хэлэжьагъ, тихэгъэгу иапшъэрэ еджапIэ 20-мэ ахэр ащеджэх, Лигэм иапэрэ едзыгъо зыкIугъахэхэр ары. МэфитIум къыкIоцI лъэныкъуитIумкIэ зэнэкъокъугъэх: «Техническэ симуляторыр» ыкIи «Классэу 75-рэ», гъэIорышIэным иIэпэIэсэныгъэ къагъэлъэгъуагъ.

Зэнэкъокъум изэфэхьысыжьхэмкIэ Сергей Шередько ятIонэрэ хъугъэ, ыпэ ишъыгъэр Московскэ авиационнэ институтым илIыкIо закъу. ШIухьафтыныр къезытыжьыгъэр Фондэу «Спортым» и Президентэу, ГК «Ростехым»  игенеральнэ пащэ иупчIэжьэгъоу Виктор Галаевыр ары. Ащ къыхигъэщыгъ хэлэжьагъэмэ зэкIэмэ IэпэIэсэныгъэ ин къызэрагъэлъэгъуагъэр.

Сергей зэкIэлъыкIоу гъэхъагъэхэм ахегъахъо: мы илъэсым ар Урысые студенческэ лигэм ишъолъыр едзыгъо щытекIогъагъ, Адыгеим и Кубок дронхэм язэпэгъэчъэнымкIэ къыхьыгъагъ. Джы FPV-пилотированием ылъэныкъокIэ хэхъоныгъэхэр ешIых. Ащ гъэхъагъэу ышIыгъэр — тэ тиуниверситетэу техническэ творчествэм ыкIи инженернэ компетенциехэм алъэныкъохэм адэлажьэрэмкIэ мэхьанэ зиIэ Iофыгъу.

Финальнэ Iофтхьабзэхэр рагъэжьэнхэм ыпэкIэ МИРЭ-м Iэнэ хъурае щыкIуагъ, ащ шъолъыр 16-мэ ялIыкIохэр хэлэжьагъэх. Студенческэ дрономотоспортым ыкIи пилотмэ зызыщагъэсэрэ гупчэхэм язытетхэм атегущыIагъэх. МКъТУ-м ыцIэкIэ Iэнэ хъураем иIофшIэн хэлэжьагъ Дзэ егъэджэн гупчэм икIэлэегъаджэу, майорэу Андрей Ершовыр.

Дронхэм язэпэчъэнкIэ Урысые студенческэ лигэр  — ар Урысыем дронхэм язэпэчъэнкIэ и Федерацие ипроект ин. Хэгъэгум иапшъэрэ еджапIэмэ ащеджэрэ студенти 130-мэ заявкэхэр къатыгъагъэх. Ахэмэ университет  анахь дэгъу 20-р ащыщ, МКъТУ-ри зэрахэтэу ыпкIэ хэмылъэу   трассэхэр, къагъэчъэрэ дронхэр ыкIи лицензиехэр къаратыгъэх.

Тыгу къыддеIэу Сергея Шередько тыфэгушIо дэгъу дэдэу Гран-при зэнэкъокъум зэрэхэлэжьагъэм фэшI! Джыри лъэгэпIэ инхэм анэсынэу, текIоныгъакIэхэр къыдихынхэу тыфэлъаIо!