— Непэ тыкъызэрэугъоигъэх тищыIэныгъэ идэгъугъэ зэлъытыгъэмэ ащыщым тытегущыIэнэу — автомобильнэ транспортым, — къыригъэжьагъ МКъТУ-м автомобильнэ транспортымкIэ икафедрэ идоцентэу, экономикэ шIэныгъэхэмкIэ кандидатэу Инна Ахуновам. «Ащ къалэхэр зэрепхы, экономикэм хэхъоныгъэ регъэшIы, зекIоныр Iэрыфэгъоу ыкIи щынэгъончъэу ешIы. Тэ тиIэнэ хъурае — ушэтэкIо ныбжьыкIэхэмкIэ, шIэныгъэлэжьхэмкIэ ыкIи практикхэмкIэ амалышIу, 2025-рэ илъэсым иIофыгъо шъхьаIэхэм татегущыIэщт. Мыщ нэбгырэ пэпчъ къыщихьырэ предложениемэ, хэкIыпIэу отраслымкIэ къагъотырэмэ мэхьанэ яI.

Мыекъопэ къэралыгъо технологическэ университетым истудентхэмрэ икIэлэегъаджэхэмрэ,  автомобильнэ транспортымкIэ Донецкэ академием, Университетэу Синергия (Омскэ икъутамэ), Омскэ къэралыгъо университетым ялIыкIохэр, джащ фэдэу Адыгэ Республикэм иавтотранспортнэ предприятиехэм яспециалистхэр ыкIи япащэхэр, хабзэ органхэм якъулыкъушIэхэр Iэнэ хъураем иIофшIэн хэлэжьагъэх.

Автомобильнэ отраслыр непэрэ мафэм зэолIэрэ лъэныкъохэм афэгъэхьыгъэ докладхэр къашIыгъэх, ахэмэ ащыщыгъэх технологиякIэхэр гъэфедэгъэнхэм, общественнэ транспортым  ицифровизацие, водителым IэпыIэгъу фэхъухэрэ интеллектуальнэ системэхэм, гъэстыныпхъэ зэфэшъхьафхэм, щынэгъончъэным, специалистхэм ягъэхьазырын къызщатегущыIагъэхэр.

Къалэ ыкIи шъолъыр транспортнэ инфраструктурэм япхыгъэ гумэкIыгъохэм ядэгъэзыжьыни къэзэрэугъоигъэхэр атегущыIагъэх.

Къырагъэблэгъэгъэ хьакIэхэм ащыщхэу Iэнэ хъураем хэлэжьагъэхэр:

·        Мыекъуапэ и Администрацие къэлэ инфраструктурэмкIэ иотдел ипащэу Марат Хамидулиныр;

·        Къэралыгъо автоинспекциеу АР-м щыIэм игъэIорышIапIэ иотдел ипащэ игуадзэу, полицием имайорэу Александр Лабутиныр;

·        «Автоспецтехникэм» ипащэу Александр Василевскэр;

·        ООО «Адыгеягазавтосервисым» гъогу зекIонымкIэ испециалистэу СихъуАнзаур;

·        ООО «Гиагинское АТП» зыфиIорэм ипащэ игуадзэу Дмитрий Стацюковыр;

·        къалэу Мыекъуапэ дэт МУП «Мыекъопэ троллейбуснэ гъэIорышIапIэм» ипащэу Хьао Анзор;

·       къалэу Мыекъуапэ дэт МУП «Мыекъопэ троллейбуснэ гъэIорышIапIэм» иэкономист шъхьаIэу Елена Дрижаковар.

— Тэ къыдгурыIонэу тыфай неущрэ транспортым технологиехэу етхьылIэнхэ фаехэр, ар нахь Iэрыфэгъоу ыкIи щынэгъончъэу тшIыным пае. Наукэр, бизнесыр ыкIи хабзэр зэгъусэхэу зэдэлажьэхэмэ, Iофыгъуабэ мыщ щызэшIотхын тлъэкIыщт. Сицыхьэ телъ, непэрэ зэхэгущыIэжьым ишIуагъэ къызэрэкIощтым, проектыкIэхэм чIыпIэ зэрэщаубытыщтым, — къыкIигъэтхъыгъ Инна Ахуновам.