Адыгэ Республикэм и ЛIыкIо IофшIапIэу Урысыем и Президент дэжь щыIэм Шъолъыр общественнэ организациеу «Врачхэм я Хасэ» илъэс къэс зэхащэрэ зэIукIэр щыкIуагъ. Iофтхьабзэм хэлэжьагъэх хэгъэгум имедицинскэ учреждение пэрытхэм ялIыкIохэр, специалистхэр ыкIи организацием игъусэгъухэр.

Мыекъопэ къэралыгъо технологическэ университетым ыцIэкIэ доклад зэхахьэм къыщишIыгъ МКъТУ-м и  Медицинскэ институт ипащэу, медицинэ шIэныгъэхэмкIэ кандидатэу Хъурэе Аслъанэ. Ащ университетымрэ «Врачмэ я Хасэрэ» кадрэхэр гъэхьазырыгъэным ылъэныкъокIэ зыщызэдэлэжьэхэрэ ыкIи зыщызэдэлэжьэщтхэ лъэныкъохэу агъэнэфагъэхэр къыIотагъэх.

Зэхахьэм хэлажьэрэмэ анахьэу анаIэ зытырадзагъэр гъэсэныгъэ, научнэ ыкIи гъэсэкIо IофшIэнэу Медицинскэ институтым зэрихьэрэм «Врачмэ я Хасэ» зэрэхэлажьэрэ шIыкIэр ары.

Шъугу къэдгъэкIыжьын, организацием иапэрэ зэхэсыгъо МКъТУ-м 2022-рэ илъэсым ичъэпыогъу мазэ щыкIогъагъ, ащ АР-м и ЛIышъхьэу КъумпIыл Муратэ хэлэжьэгъагъ. Ащ къыщыублагъэу гукъэкIэу бэ рахъухьагъэр ыкIи зэшIуахыгъэр, ахэмэ ащыщых: научнэ-практическэ конференциехэр ыкIи гъэсэныгъэ семинархэр зэхэщэгъэнхэр; студентмэ апае лекциехэр ыкIи мастер-классхэр регъэк1ок1ыгъэнхэр; гъэ къэс «Врачмэ я Хасэ» хэтхэм зэIукIэгъоу адашIыхэрэр; программэу «Врач ныбжьыкIэм иеджапI. Сэнэхьатым хэщэгъэныр»; Урысые конференциеу «ЛIэуж псаухэр» зыфиIорэм «Врачмэ я Хасэ» иэкспертхэр хэлажьэх. А Iофтхьабзэхэр зэкIэ зыфытегъэпсыхьагъэхэр агъэхьазырырэ специалистмэ яухьазырыныгъэ нахьышIу шIыгъэныр, апшъэрэ еджапIэмрэ псауныгъэм икъэухъумэн епхыгъэ практическэ лъэныкъомрэ зэпхыгъэнхэм апай. ЗэIукIэм къыщыхагъэщыгъ, Медицинскэ институтым игъэсэн ыкIи инаучнэ IофшIэн нахьыбэу специалист пэрытхэр — «Врачмэ я Хасэ» хэтхэр хагъэлажьэхэ зэрэхъугъэр. Ахэмэ ащыщых:

· Хъурэе Аслъан — МКъТУ-м хэхьэрэ Медицинскэ институтым ипащ, медицинэ шIэныгъэхэмкIэ кандидат;

· Жанна Семеновар — медицинэ шIэныгъэхэмкIэ доктор, кIэлэцIыкIу хирургиемкIэ ыкIи травматологиемкIэ НИИ-м икIэлэцIыкIу нейрохирургие испециалист шъхьаI;

· ПщыхьакIэ Ахьмэдхъан — медицинэ шIэныгъэхэмкIэ доктор, НОЦ МГУ иуролог-онколог ыкIи гражданскэ авиациемкIэ ЦКБ-м инаучнэ IофышIэ шъхьаI;

· Хьашъыкъое Асият — медицинэ шIэныгъэхэмкIэ доктор, Н.И. Пироговым ыцIэ зыхьырэ РНИМУ-м мамыку ыкIи гинекологиемкIэ икафедрэ ипрофессор;

· Юлия Сидневар — медицинэ шIэныгъэхэмкIэ кандидат, кIэлэцIыкIу хирургиемкIэ ыкIи травматологиемкIэ НИИ-м икIэлэцIыкIу нейрохирургие иврач психиатр-нейропсихиатр;

· Мадина Чундоковар — медицинэ шIэныгъэхэмкIэ доктор, Н.И. Пироговым ыцIэ зыхьырэ РНИМУ-м кIэлэцIыкIу хирургиемкIэ икафедрэ ипрофессор;

· Фатимат Хановар — медицинэ шIэныгъэхэмкIэ кандидат, Университетскэ клиническэ сымэджэщэу №4 Сеченовскэ университетым иаллерголог-иммунолог;

· Фатима Абазовар — медицинэ шIэныгъэхэмкIэ кандидат, компаниеу Pfizer имедицинскэ упчIэжьэгъухэм якуп ипащ.

«Врачмэ я Хасэ» хэт специалистмэ яIахьышхо халъхьэ гъэсэныгъэ программэхэм, студентхэм яшIэныгъэхэм ахэгъэхъогъэнхэм, институтым иушэтэкIо IофшIэн зиушъомбгъуным дэлажьэх.

МКъТУ-рэ «Врачмэ я Хасэрэ» зэзэгъыныгъэу зэдашIыгъэм елъытыгъэу хэгъэгум имедицинскэ учреждениехэм адэлажьэх. КIэлэцIыкIу хирургиемкIэ ыкIи травматологиемкIэ НИИ-м (Клиникэу докторэу Рошаль иер, къ. Москва) зэпхыныгъэ дэгъу дашIыгъах, джащ фэдэу ФГБУ Лъэпкъ медицинскэ ушэтэкIо гупчэу фтизиопульмонологие ыкIи инфекционнэ узхэм зыщяIазэхэрэр, Урысыем и Минздрав хэхьэ ыкIи гражданскэ авиациемкIэ Гупчэ клиническэ сымэджэщым чанэу адэлажьэх. ТапэкIэ — федеральнэ гупчэхэу «Врачмэ я Хасэ» хэтхэр зыщылажьэхэрэр ахэмэ къахэхъощтых. 2026-рэ илъэсым научнэ-практическэ конференциеу «Актуальные вопросы офтальмологии» зыфиIорэр ыкIи гъэсэныгъэм епхыгъэ гукъэкIхэм ягъэцэкIэн дэлэжьэнхэу агъэнафэх. Очнэ ыкIи пэIудзыгъэ шIыкIэм тетэу Адыгэ Республикэм иврачмэ яIэпэIэсэныгъэ хэгъэхъогъэнымкIэ Iофтхьабзэхэр зэхащэщтых.

Мыекъопэ къэралыгъо технологическэ университетым IэпэIэсэныгъэшхо зыхэлъ медицинскэ кадрэхэр щыгъэхьазырыгъэнхэмкIэ зишIуагъэ къэзгъэкIуагъэхэм рэзэныгъэ тхылъхэр кIэухым аратыжьыгъэх.

МКъТУ-рэ Шъолъыр общественнэ организациеу «Врачмэ я Хасэрэ» зэрэзэдэлажьэхэрэм шIуагъэ къызэритырэр нафэ хъугъэ. Зэхэт проектхэм ягъэцэкIэн ыпкъ къикIыкIэ медицинэ сферэм щылэжьэрэ кадрэхэм якъэухъумэн ыкIи яхэгъэхъон Iофхэр лъэкIуатэх, студентхэмрэ специалист ныбжьыкIэхэмрэ зыгъэхьазырын амалэу яIэхэр нахьыбэ хъугъэх.