Урысые зэнэкъокъоу «Зэпыугъо ин» зыфиIорэм ияхэнэрэ едзыгъо ифиналэу Нижний Новгород щыкIуагъэр зэфашIыжьыгъ. Хэгъэгум ичIыпIабэхэм къарыкIыгъэ нэбгырэ 600 ащ хэлэжьагъ.

Финалым дэгъоу зыкъыщигъэлъэгъуагъ Мыекъопэ къэралыгъо технологическэ университетым и Политехническэ колледж щеджэрэ ЦIыкIушъэ Руслъан. Ар ятIонэрэу зэнэкъокъум ифинал нэсыгъ ыкIи иIэпэIэсэныгъэ щиушэтыгъ, я II-рэ шъуашэ зиIэ лауреат ар хъугъэ, сертификатэу сомэ 200 000 зэрылъыр къыфагъэшъошагъ!

Зэнэкъокъур зыщыкIогъэ мафэ къэс хэлажьэрэмэ десэ хьылъэхэр къашIыгъэх, ямышIыкIэ екIолIакIэхэр къыфагъотыгъэх, командэм ухэтэу улэжьэныр зыфэдэм щыгъозагъэх. Руслъанэ ушэтынхэр зэкIэ дэгъоу ыкIугъэх ыкIи ухьазырыныгъэ шIагъо зэриIэр къыгъэлъэгъуагъ.

— ДэкIыгъо зэнэкъокъоу сызхэлэжьагъэм ишIогъэшхо сэ къысэкIыгъ, кIуачIэу сиIэр зыфэдизыр щызэхэсшIагъ, фэшъхьаф еплъыкIэ бэмэ афысигъэшIыгъ. Ары, ятIонэрэ шъуашэ зиIэ лауреат сыхъугъ, сызфэягъэм кIэзгъэхьагъэп, ау къызгурэIо: чIыпIэ закъор арэп мэхьанэ зиIэр, ыпэкIэ улъыкIотэн зэрэслъэкIырэр ары сызгъэгушIорэр.  Камчаткэм къыщегъэжьагъэу  Севастополь нэс къикIыгъэ кIэлакIэхэр Iофтхьабзэм ыугъоигъэх, ахэмэ нэIуасэ сафэхъугъ, опытэу тиIэмкIэ тызэхъожьыгъ, — къыддэгощагъ игупшысэхэмкIэ Руслан.

Апэрэхэм я Движение ипроект пэрытэу «Зэпыугъо иныр» рагъэкIокIы Росмолодежыр, гъэсэныгъэмрэ шIэныгъэмрэкIэ, апшъэрэ еджапIэхэмкIэ УФ-м и Министерствэхэр яIэпыIэгъухэу. 2025-рэ илъэсым къыщыублагъэу лъэпкъ проектэу «НыбжьыкIэхэр ыкIи кIэлэцIыкIухэр» зыфиIорэм ар хэхьэ. Мыекъопэ къэралыгъо технологическэ университетым и Политехническэ колледж щеджэрэ студентхэр илъэситф хъугъэу зэнэкъокъум гъэхъагъэхэр къыщагъэлъагъох, финалми бэрэ ихьагъэх, лауреатэуи хъугъэх.

ТекIоныгъэу къыдихыгъэмкIэ Руслъан тыфэгушIо! Джыри гъэхъэгъабэхэр ышIынхэу, проектыкIэхэм ахэлэжьэнэу тыфэлъаIо!