ШэкIогъу мазэм къыкIоцI Мыекъопэ къэралыгъо технологическэ университетым десэ зэкIэлъыкIохэр щыкIуагъэх, ахэр зыфэгъэхьыгъагъэхэр когнитивнэ амалхэм ахэгъэхъогъэныр, къэбарым, шIэжьым ыкIи логическэ гупшысэным адэлэжьэгъэныр ары.

МКъТУ-м ипсихологическэ къулыкъу ипащэу, психологическэ шIэныгъэхэмкIэ кандидатэу Людмила Красновар ары Iофтхьабзэр зэхэзыщагъэр.

— Гупшысэным и Клуб десэхэр дэгъу дэдэу щыкIуагъэх. КIалэмэ ашIогъэшIэгъоныгъ когнитивнэ амалэу щыIэхэр, техникакIэр зэрагъэшIагъ. процессым зэрэхилъэсагъэхэр нэрылъэгъугъ, шIэжьыри, гупшысэныри, къэбарым дэлэжьэгъэныри нахь къадэхъу зэрэхъугъэр зэхэтшIагъ,  — къеIуатэ Людмила Вячеслав ыпхъум. — Ащ фэдэу ахэр Iофым зэрэфэщагъэхэм сегъэгушIо, студентмэ яшIэныгъэхэри мыщ къыщызэIуахыгъэх.  

Мы шэкIогъу мазэм изэIукIэм кIэу Клубым иIофшIэн къыхэхьагъэхэм ащыщыр, студентмэ язакъоп, джы кIэлэегъаджэхэри ахэмэ ахэлэжьагъэх. Ащ фэдэ шапхъэм ныбжь зэфэшъхьаф зиIэ лIэужхэр зэрипхыгъэх, зы шIэныгъэ хъоум щызэдэгущыIагъэх, опытымкIэ щызэхъожьыгъэх, хэхъоныгъэхэм зэдяусагъэх.

Iофтхьабзэм хэлажьэрэмэ непэрэ уахътэм диштэрэ методикэхэу интеллектым рахьылIэхэрэр зэрагъэшIагъэх, псынкIэ еджэным пылъ техникэм зыщагъэгъозагъ, когнитивнэ амалхэм ахагъэхъонымкIэ упражнениехэр къашIыгъэх. Десэ пэпчъ теориер ыкIи практикэр къыдилъытэщтыгъ — шIэныгъэу агъотыгъэхэр ащ лъыпытэу интерактивнэ упражнениехэм ахагъахьэщтыгъэх.

Студенткэу программэм хэлэжьэгъэ Ангелина Васильевар иеплъыкIэхэмкIэ къыддэгощагъ: Гупшысэным и Клуб сыхэлэжьэныр лъэшэу сыгу рихьыгъ. Людмила Вячеслав ыпхъум десэ гъэшIэгъонхэр ригъэкIокIыгъэх, ары пэпчъ джэгукIэхэр тигъэшIыщтыгъэх, ахэмэ шъхьэкуцIым нахь Iоф рагъашIэщтыгъэ. Ребусхэр зэрэтищыкIагъэхэр, ямэхьанэ къызгурыIуагъ, шъхьэр зыфызыхэрэр, кроссвордхэр — ахэр къыддэIэпыIэх нахь псынкIэу тыгупшысэнымкIэ, нейроннэ зэпхыгъакIэхэр къагъэпсы. Анахьэу сшIогъэшIэгъоныгъэр схемэу къэбарыр пщымыгъупшэным пае агъэфедэрэр ары, студентхэмкIи нахьыжъыIохэмкIи IэпыIэгъушIоу щыт».

Гупшысэным и Клуб щыкIорэ десэмэ къагъэлъэгъуагъ IофшIэнэу агъэцакIэрэм ишIуагъэ къызэрэкIорэр, когнитивнэ амалмэ зэрахахъорэр, гупшысэным мэхьанэ езытырэр зэкIэ зэрэзэрипхырэр.