Мыекъопэ къэралыгъо технологическэ университетым и «Точка кипение» дунэе телелъэмыджэу «О зэкIэ уиамал къыхьыщт!» зыфиIорэр щызэхащагъ, ар урысые инклюзивнэ форумэу «ЗэкIэмэ афызэIухыгъ» зыцIэм къыдыхэлъытагъ.

Дунэе ыкIи урысые зещакIомэ япсалъэхэр программэм хэхьагъэх, ахэмэ ащыщыгъэх:

·  Стивен Шор — аутизмэм ылъэныкъокIэ дунаим щызэлъашIэрэ эксперт, Университетэу Адельфи (США) ипрофессор, дунэе бестселлермэ яавтор.

·  Марко Сесса — ахондроплазиемкIэ Итальянскэ ассоциацием ипрезидент, гуIэтыпIэ псалъэ къышIыщт.

·  Эбрима Джеллоу — ныбжьыкIэ пэрыт ыкIи хэбзэухъумакIу, Гамбием щыщ, ампутантмэ азыфагукIэ футболыр ихэгъэгу къыщызыугупшысыгъэмэ ащыщ.

·  Татьяна Уржумцевар — Урысыем и Культурнэ гупчэу Пекин щыIэм ипащ, Россотрудничествэм илIыкIо пащэу Китай щыI.

·  Рустам Набиев — зэлъашIэрэ блогер-колясочник, я IV-рэ Лъэпкъ премиеу интернет-контентэу (ИРИ)  2025-рэ илъэсым щыIагъэм ихэушъхьафыкIыгъэ номинацие щытекIуагъ.

·  Модераторыр — Назарова Карина Георгий ыпхъур, псауныгъэр къэухъумэгъэнымкIэ ыкIи общественнэ псауныгъэр къэгъэгъунэгъэнымкIэ ОП ЕАЭС-м и Комитет итхьамат.

МКъТУ-м ыцIэкIэ телелъэмыджым хэлэжьагъэх зипсауныгъэ фыкъуагъэ зиIэу щеджэхэрэр, автомобильнэ транспортым икафедрэ идоцентэу, тьютормэ якомандэ ипащэу Наталья Машининар, IофшIэпIэ чIыпIэ ягъэгъотыгъэнымкIэ Гупчэм ипащэу Темзэкъо Азамат, программэу «Адыгеим и ЛIыхъужъхэр» зыфиIорэм хэлажьэхэрэр, студентхэр ыкIи университетым иIофышIэхэр.

ЗэкIэмэ апае зэIухыгъэ чIыпIэхэр гъэпсыгъэнхэм, гъэхъагъэ зышIыгъэмэ якъэбархэр, нэмыкIхэр зэIукIэм къыщаIэтыгъэх.

Iофтхьабзэм фэгъэхьыгъэ еплъыкIэу иIэр къыреIотыкIы студенткэу Полина Солодовам: «Непэ сэ къызгурыIуагъ зипсауныгъэ фыкъуагъэ зиIэ цIыфхэмкIэ мы Iофтхьабзэм мэхьанэшхо зэриIэр, ащ тэ гукIэгъум, фэшъхьаф цIыфым угу егъуным, уфэгумэкIыным тыфегъасэ, — къеIуатэ ащ. — Анахьэу сэ сыгу нэсыгъэр Африкэм щыщ футболистэу зилъакъо къычIэзынагъэм икъэбар ары. Ащ кIочIэшхо къызхигъотэжьыгъ ыкIи  игуетныгъэ ыпкъ къикIэу ихэгъэгу ампутант-футболыр щаригъэгъэпсыгъ. Ащ ищысэ къегъэлъагъо угу бгъэкIоды зэрэмыхъущтыр».

Мыекъопэ къэралыгъо технологическэ университетым и «Точка кипение» телелъэмыджым епхыгъэ зэхэщэн Iофхэр ыпшъэ дэкIыгъэх, ащ ипрограммнэ пащэр Светлана Новикова, иадминистраторыр Мария Тамахина.

Программэр АСИ ыкIи Фондэу «Росконгресс» ягукъэкIыкIэ агъэцакIэ, хэгъэгум иплощадкэ 50 фэдиз зэрепхы.