Мыекъопэ къэралыгъо технологическэ университетыр я IV-рэ Дунэе форумэу «Содружество моды» зыфиIорэм хэлажьэрэмэ ащыщ хъугъэ, ар къалэу Санкт-Петербург щыкIуагъ.

Iофтхьабзэр СНГ-м и Межпарламентскэ Ассамблеемрэ Урысые Федерацием и Федеральнэ ЗэIукIэ ФедерациемкIэ и Советрэ зэхащагъ, IэпыIэгъоу Урысыем и Минпромторг, и Минкульт, и Минэкономразвитие, Урысые экспортнэ гупчэ ыкIи СОЮЗЛЕГПРОМ-р яIагъэх.

Форумым хабзэ зэрэхъугъэу зэрепхых промышленность псынкIэр, креативнэ индустриехэр, гъэсэныгъэ организациехэр, моднэ бизнесыр ыкIи СНГ-м икъэралыгъо органхэр. Мы илъэсым ащ ипрограммэ тематическэ трекхэр экономикэмкIэ, производствэмкIэ, культурэмкIэ, кадрэхэмкIэ, дизайнымкIэ хэтыгъэх, джащ фэдэу лъэныкъуакIэхэр — моднэ туризмэр, дэхагъэр ыкIи псауныгъэр.

Университетым ыцIэкIэ  форумым къыщыгущыIагъ стандартизациемкIэ, метрологиемкIэ ыкIи товарнэ экспертизэмкIэ кафедрэм идоцентэу КIэдэкIое Нафсэт, ащ докладэу «Ранняя профориентация школьников как первая образовательная ступень: из опыта Майкопского государственного технологического университета» зыфиIорэр къышIыгъ. Ащ комплекснэ системэу сэнэхьыт къыхэхынымкIэ университетым илъэс пчъагъэхэм къакIоцI ыгъэпсыгъэм къыщытегущыIагъ. IофшIэным илъэныкъо шъхьаIэхэр докладым къыщыхигъэщыгъэх:

• Проектэу «Неущрэм ибилет».

2021-рэ илъэсым къыщыублагъэу я 6-I1-рэ классхэм ащеджэрэ кIэлэеджакIомэ профессиональнэ пробэхэр МКъТУ-м щакIух: дизайнерым зыщаушэты, технологическэ лъэныкъохэм, прикладной искусствэм, нэмыкIхэм.

• Фестивалэу«Наука 0+».

Гъэ къэс 2013-рэ илъэсым къыщыублагъэу университетым ипчъэхэр кIэлэеджакIохэмрэ ны-тыхэмрэ къафызэIуехы, сэнэхьатэу зыфеджэщтхэм щагъэгъуазэх.

• Проектэу «Сэнэхьатым екIурэ лъэубэкъу», ар макIэу зылъэгъухэрэм ыкIи зэхэзыхыхэрэм афэгъэхьыгъ.

Республиканскэ еджэпIэ-интернатым игъусэу МКъТУ-м 2017-рэ илъэсым къыщыублагъэу проектхэр егъэцэкIах, ахэр кIэлэеджакIохэм щыгъынхэр ягъэдыгъэнхэм, зэнэкъокъухэм ахэгъэлэжьэгъэнхэм, непэрэ технологиехэм нэIуасэ афэшIыгъэнхэм афэгъэхьыгъ. Зэнэкъокъухэу «Кутюрье года», «Модный дебют» ыкIи лъэпкъ чемпионатэу «Абилимпикс» зыфиIохэрэм щатекIуагъэх.

• «KStar kids» — илъэси 6-15-рэ зыныбжь кIэлэеджакIохэм апай.

МКъТУ-м ипрограммэ хэхъоныгъэхэр 2032-рэ илъэсым нэс егъэшIыгъэнхэм афэгъэхьыгъ. Сабыйхэр идэным, блэным, хабзэ хъугъэ   художественнэ хэдыкIынхэм афагъасэх, фэшъхьаф шъолъырмэ якультурэхэм нэIуасэ афэхъух. Десэхэр студентхэр ары резгъэкIокIыхэрэр, дунэе ыкIи урысые зэнэкъокъухэм дизайнымкIэ ащытекIуагъэх.

КIэдэкIое Нафсэт къыхигъэщыгъ, сэнэхьат къыхэхыныр нахьыжьэу ебгъэжьэным ишIуагъэ къакIо, кIэлэеджакIохэр творческэ практикэм хэщагъэхэ мэхъух, ахэмэ ашъхьагъ итых студентхэмрэ специалист ныбжьыкIэхэмрэ.

Форумэу «Содружество моды» зыфиIорэр дунэе площадкэу дизайнерхэр, кIэлэегъаджэхэр,  специалист ныбжьыкIэхэр ыкIи модэм ииндустрие иэкспертхэр зэзыпхэу хъугъэ. МКъТУ-р форумым зэрэхэлэжьагъэм къыгъэлъэгъуагъ сэнэхьат къыхэхыным иIоф университетым иIахьышхо зэрэхэлъыр. Экспертмэ а опыт шIагъом осэшхо къыфашIыгъ, нэмыкI еджапIэхэмкIэ, колледжхэмкIэ, апшъэрэ еджапIэхэмкIэ ыкIи IофшIэн зытыхэрэмкIэ щысэтехыпIэу зэрэщытыр къыхагъэщыгъ.