Къэралыгъо ыкIи муниципальнэ къулыкъушIэхэм яшIэныгъэхэр зыщыхагъахъорэ Гупчэу Мыекъопэ къэралыгъо технологическэ университетым щыIэм экспертнэ зэIукIэ щыкIуагъ, ар пыдзафэхэм зэрадэзекIохэрэм япхыгъэ гумэкIыгъохэм афэгъэхьыгъагъ.

Къэралыгъо органхэм якъулыкъушIэхэр ыкIи яспециалист пэрытхэр Iофтхьабзэм хэлэжьагъэх.
 — Пыдзафэхэм уазэрэдэзекIощтыр — ар шъолъырым иIофыгъо шъхьаIэхэм ащыщ, экологием изытет ыкIи экономическэ амалхэм ар япхыгъэу щыт, — къыхигъэщыгъ Краснодар краимкIэ ТЭК-м ыкIи ЖКХ-м иминистрэ игуадзэу Мария Краснощековам. — Системнэ екIолIакIэр ары тэ къыхэтхырэр: шIэгъахэхэр къыдэтэлъытэх, къиныгъохэм тягупшысэ ыкIи хэкIыпIэхэм талъэхъу.  

Ащ ыуж, ООО «Профисервисым» зэзэгъыныгъэ отделэу иIэм ипащэу Наталья Бошкович Шъачэ пыдзафэхэр зэрэщаугъоихэрэ ыкIи зэращагъэкIодыхэрэ шIыкIэмкIэ проектэу щыIэр зыфэдэр къыIотагъ. Ащ щысэхэмкIэ къыгъэлъэгъуагъ непэрэ технологиехэм амалышхохэу къатыхэрэр, къалэмэ яэкологие къызэтегъэнэжьыгъэнымкIэ хэкIыпIэхэр зэрэщыIэхэр.

ООО «Экомониторингым» ипащэу Виталий Гумеровым къэзэрэугъоигъэхэм анаIэ тыраригъэдзагъ пыдзафэхэм гумэкIыгъоу къахэкIыхэрэмэ.

— Пшъэрылъ шъхьаIэр — тыкъэзыуцухьэрэ дунаим тиягъэ етымыгъэкIыныр ары, ащ пае научнэ екIолIакIэр ыкIи непэрэ уахътэм къытырэ технологиехэр дгъэфедэнхэ фае,, — къыIуагъ экспертым.

Тыкъэзыуцухьэрэ дунаир къэухъумэгъэнымкIэ апэрэ категорие зиIэ инженерэу Елена Петановам, ООО «Газпром трансгаз Краснодар» зыфиIорэм икъутамэу Мыекъуапэ щыIэм щылажьэрэм идоклад бэмэ ашIогъэшIэгъоныгъ. Пыдзафэ мыщынэгъончъэмэ Iоф адэшIэгъэнымкIэ УФ-м къыгъэнэфэгъэ хэбзэгъэуцугъэу щыIэр амыукъоу зэрэлажьэхэрэр, практикэу зыщыгъуазэхэр ащ къыIотагъэх. 

Джащ фэдэу зэхэгущыIэжьым хэлэжьагъэх: Марина Крупицкаяр, Мария Козыревар, Ирина Гумеровар ыкIи Татьяна Паладько, ахэр опытэу аIэкIэлъхэмкIэ зэдэгощагъэх, отраслыр нахьышIу шIыгъэнымкIэ предложениехэр къахьыгъэх.

ЗэIукIэм къыгъэлъэгъуагъ: пыдзафэхэм Iоф адэшIэгъэным непэрэ технологиехэр епхьылIэнхэу щыт, экологием изытет ренэу лъыплъэгъэныр, къэралыгъом, бизнесым, наукэм апашъхьэкIэ пшъэдэкIыжь зэрахьырэр зэхэшIэгъэныр апшъэрэ пшъэрылъхэм ащыщын фае.