Адыгэ Республикэм федеральнэ проектэу «Профессионалитетым» игъэцэкIэн къыдыхэлъытагъэу шъолъыр лъыплъэкIо советым изэхэсыгъо щырагъэкIокIыгъ. ЗэIукIэм темэ шъхьаIэу иIагъэр гъэсэныгъэ медицинскэ кластерэу «ПрофиМедым» 2025-рэ илъэсым иприемнэ кампание зэфэхьысыжьхэр фэшIыгъэнхэр ары.

Мыекъопэ къэралыгъо технологическэ университетым хэхьэрэ Политехническэ колледжым егъэджэн-зэхэщэн IофшIэнымкIэ пащэм игуадзэу СтIашъу Светланэ доклад къышIыгъ, ащ аналитическэ зэфэхьысыжьэу мы илъэсым фэхъугъэхэм ашъхьэ къырихыгъ.

2025-рэ илъэсым профессиональнэ гъэсэныгъэм исистемэ илъэс 85-рэ хъугъэ,  гъэхьазырыгъэным ипрограммэ зышIогъэшIэгъонхэр нахьыбэ зэрэхъухэрэри къэнэфагъэх.  Сэнэхьат къыхэхыным икампание игъэкIотыгъэу проектэу «ПрофиМедым» къыдыхэлъытагъэу рагъэкIокIырэм амал къытыгъ еджапIэм чIэхьащтхэм яконтрольнэ цифрэхэр рагъэкъунхэмкIэ.

Системнэ IофшIэнэу республикэм иеджапIэхэм ащызэхащагъэхэм, кIэлэеджакIохэр ыкIи ны-тыхэр къызхагъэлэжьагъэхэм ишIогъэшхо къэкIуагъ. Проектэу «Амбассадоры Профессионалитета» зыцIэм икомандэмэ сэнэхьат къыхэхыным епхыгъэ зэIукIэхэр, интерактивхэр, квестхэр, флешмобхэр яIагъэх, Урысые класснэ сыхьатэу «Пчъэ зэIухыгъэхэм я зы маф» зыфиIорэм хэлэжьагъэх.

Приемнэ кампанием елъытыгъэу СПО-м ипрограммэкIэ лъэныкъуакIэу «Профессионалитетым» заявление 6985-рэ къатыгъ, сэнэхьат 24-рэ колледжищым ыкIи зы техникумым къащыхахыным фэшI.

Зэнэкъокъумэ къагъэлъэгъуагъэр:

— МКъТУ-м и Политехническэ колледж — зы чIыпIэм нэбгырэ 15,9-рэ,

— Мыекъопэ медицинскэ колледжым — зы чIыпIэм нэбгырэ 5,7-рэ.

Анахьэу зыфэбэнагъэхэр:

— «Сестринскэ Iофыр » — нэбгырэ 26-рэ зы чIыпIэм,

— «Фармациер» — 22-рэ,

— «Щэн Iофыр» — 20-рэ,

— «Лечебное дело» — 16-м нэс,

— «Туризмэр ыкIи хьакIэегъэблэгъэныр» — 16.

Медицинскэ лъэныкъохэмкIэ нахь макIэу зыщызэнэкъокъугъэхэр «Акушерское дело» зыфиIорэр ары — нэбгыри 5-м шIокIыщтыгъэ къодый.

Докладым къызэрэщиIорэмкIэ, я 11-рэ классхэм арысхэр СПО-м ипрограммэхэм афэхьазырыгъэх. 2025-рэ илъэсым программэхэу «Профессионалитетым» епхыгъэхэмкIэ гурыт гъэсэныгъэ организациехэм нэбгырэ 166-рэ аштагъэх. Ушъхьагъоу фэхъугъэхэм ащыщхэр: СПО-м изытет зэрэдэгъур, сэнэхьатхэм япчъагъэ нахьыбэ зэрэхъугъэр, апшъэрэ еджапIэмэ язэнэкъокъухэм зыкъызэраIэтыгъэр, анахьэу медицинскэхэм.

Апэрэу зэрэхэгъэгоу документхэр порталэу «Госуслуги» зыфиIорэмкIэ атынэу амал щыIэ хъугъэ. Ар къызфагъэфедагъ абитуриентхэм япроцент 20-мэ.

ХэушъхьафыкIыгъэ дзэ операцием хэлэжьагъэхэм ыкIи ахэмэ яунагъохэм апае фэгъэкIотэнхэр приемнэ кампанием къытыгъэх. Чэзым ыпэу нэбгырэ 90 аштагъ, ахэр зычIэхьагъэхэр:

— 39 — МКъТУ-м и Политехническэ колледж,

— 35 — Мыекъопэ медицинскэ колледжым,

— 9 —МКъТУ-м икъутамэ Политехническэ колледжыр,

— 7 — АКъУ-м и МГГТК.

Приемнэ кампанием изэфэхьысыжьхэр

Приемым изэфэхьысыжьхэмкIэ 2025-рэ илъэсым аштагъэхэр:

— МКъТУ-м и Политехническэ колледж — нэбгырэ 522-рэ,

— Мыекъопэ медицинскэ колледжым — нэбгырэ 425-рэ,

— АКъУ-м и МГГТК — нэбгырэ 45-рэ,

— МКъТУ-м икъутамэ Политехническэ колледжыр — нэбгырэ 335-рэ.

2024-рэ илъэсым программэу «Профессионалитет» зыфиIорэмкIэ нэбгырэ 710-рэ къычIэхьэгъагъэмэ, 2025/2026-рэ еджэгъу илъэсым ар 1327-рэ хъугъэ, къэпIон хъумэ, фэдитIукIэ нахьыб.
 Ахэмэ ащыщ студент 802-мэ медицинскэ сэнэхьатхэр къыхахыгъ.

ЗэкIэмкIи Адыгеим «Профессионалитетым ипрограммэхэмкIэ нэбгырэ 3258-рэ щырагъаджэ, ахэмэ ащыщэу 2094-мэ медицинскэ лъэныкъор къыхахыгъ.

Зэфэхьысыжьхэр ыкIи гъэхъэгъэ шъхьаIэхэр

Проектэу «Профессионалитетым» ипрограммэхэм язегъэушъомбгъун ыкIи ягъэцэкIэн амалэу къытыгъэхэр:

— чIэхьэгъур проценти 100-кIэ гъэцэкIагъэ хъугъэ;

— сэнэхьат къыхэхынымкIэ амалэу щыIэхэр нахь кIэлэеджэкIуабэмэ ашIагъ;

— унагъохэр, еджапIэхэр, предприятиехэр–гъусэгъухэр проектым иIофтхьабзэ къыхэлажьэх;

— Приемнэ кампанием планэу ыгъэнэфагъэхэр зэкIэ къыдэхъугъэх, ар шIэныгъэмрэ гъэсэныгъэмрэкIэ Адыгэ Республикэм и Министерствэ къегъэшъыпкъэжьы.