МКъТУ-м и Пресс-къулыкъу ипащэ ипшъэрылъхэр зыгъэцакIэрэ Аминат Абубакаровар ыкIи университетым и НыбжьыкIэ медиагупчэ чанэу щылажьэрэ Кирилл Емельяновыр шъолъыр гъэсэныгъэ семинарэу «ШУМ.Регионы» зыфиIорэм хэлэжьагъэх, Iофтхьабзэр къалэу Краснодар щыкIуагъ.

Семинарым ипрограммэ гъэлъэшыгъэ шIыкIэм тетэу кейсхэу заказчикмэ къатыгъэмэ Iоф адэшIэгъэныр къыдилъытэщтыгъэ — организациехэу зиIофшIэнхэр наукэм, инклюзием, гъэсэныгъэм ыкIи социальнэ хэхъоныгъэхэм япхыгъэхэр. Семинарым хэлэжьагъэмэ медиапроектхэр агъэпсыгъэх, ахэмэ ямышIыкIэ креативнэ екIолIакIэхэр къащыдалъытагъэх, непэрэ зэдэлэжьэныгъэр ыкIи команднэ зэфыщытыкIэхэр.

Практическэ Iахьым фэшъхьафэу ащ хэлэжьагъэхэр лекциемэ ядэIугъэх, ахэр медиатехнологиехэм, дизайным, сторителлингым ыкIи видеопроизводствэм афэгъэхьыгъагъэх, ахэмэ яшIуагъэкIэ профессиональнэ амалхэр агъэлъэшыгъэх, медиа шъолъырым ущылэжьэнымкIэ IэпыIэгъушIу хъугъэх.

Программэм изэфэхьысыжьэу организацие-заказчикмэ ялIыкIохэм апашъхьэкIэ проектхэр къаухъумагъэх. Командэу Кирилл Емельяновыр зыхэтыгъэр лъэныкъоу «ДизайнымкIэ» анахь дэгъухэм ахалъытагъ.

— Гукъыдэчъ тфэхъоу ар шIагъоу щытыгъ. ЗещакIохэр практическэ инструментхэмкIэ къыддэгуащэщтыгъэх, ащ лъыпытэу ахэр IофшIэным щыбгъэфедэнхэ плъэкIыщтых. Командэм тызэрэщылэжьагъэм ишIуагъэкIэ МКъТУ-р дэгъу дэдэу семинарым къыщыдгъэлъэгъуагъ, — къыддэгощагъ семинарым хэлэжьэгъэ Кирилл Емельяновыр.

Мыщ хэлэжьагъэмэ «ШУМ» зыцIэ Гупчэм  ифирменнэ сувенирхэр ыкIи шIухьафтынхэр аратыгъэх.

МКъТУ-р афэгушIо медиа-командэм илIыкIохэм дэгъу дэдэу семинарым зэрэхэлэжьагъэхэм афэшI ыкIи тапэкIэ джыри гъэхъагъэхэр ашIынхэу тафэлъаIо!