Студенческэ щыIакIэр нахь гъэшIэгъон ыкIи нахь нэфынэ сыда зышIырэр? Сыдэущтэу плъыр-стырыгъэм упэшIуекIощта, IэпыIэгъур тыдэ къипхыщта? МКъТУ-м психологием и Тхьамафэу щыкIуагъэм джэуапхэр къыщыдгъотыгъэх.

— Бэрэ тыпшъыгъэу, тыгу пыоу къыхэкIы, ау IэпыIэгъу къытфэхъущтыр дгъотырэп, тызэупчIыщтыр тшIэрэп. Тэ типшъэрылъыр — IэпыIэгъур чыжьэу зэрэщымыIэр къэдгъэлъэгъоныр, IофшIакIохэри студентхэри зыфэсакъыжьынхэм фэдгъэсэнхэр ары, — къыхегъэщы МКъТУ-м ипсихологическэ къулыкъу ипащэу Людмила Красновам. Джа гукъэкIыр ары тхьамафэм ипрограммэ лъапсэу иIагъэр.

Университетым тренингхэр, иммерсивнэ екIолIакIэхэр, интеллектуальнэ джэгукIэхэр щырекIокIыгъэх, ахэмэ коммуникациер агъэпсы, зыпкъитыныгъэм фащэх, нахь зэхашIэ яIэу мэхъу, шIэныгъэу агъотыхэрэр яIэпыIэгъух. 

— Тэ тыфай нэбгырэ пэпчъ къыгурыIонэу: узфэсакъыжьыныр — ар хэхъоныгъэ пшIыным ылъапс, гъэхъагъэхэм уафэкIоным, псэ рэхьатыныгъэ бгъотыным.. Ащ дэжьым зэдэгущыIэгъу уафэхъунымкIэ хъоур бгъэпсын фае, угу илъыр гупсэфэу къипIотыкIышъоу, узэдеIэжьышъоу зыбгъэсэн фае, — къыкIагъэтхъы философием, социологием ыкIи педагогикэм якафедрэ идоцентхэу ЛэупакIэ Фатимэрэ Пафифэ Бэлэрэ.

МКъТУ-м хэхьэрэ Политехническэ колледжым ипрограммэ нахь цIыкIугъэп.   Студентхэр тренингхэм, зэдэгущыIэгъухэм, акциехэу «Тэр-тэрэу тигъэхъагъэхэм тафэкIо ыкIи «Тыгу изытетыгъо ышъу» зыфиIохэрэмэ ахэлэжьагъэх, джащ фэдэу джэгукIэу «Ксенобиологиер, е фантастическэкIэ тлъытэрэмэ я ЩыIакI» зыцIэмкIэ джэгугъэх.

Мыекъопэ къэралыгъо технологическэ университетым психологием и Тхьамафэу щыкIуагъэм къыгъэлъэгъуагъ: цIыфым хэхъоныгъэхэр ышIынхэр ыкIи ыгу ирэхьатныгъэ ылъэныкъокIэ псауныгъэм фэсакъыгъэныр, ахэмэ еджэныр ягъусэхэу гъэхъэгъакIэхэм афэкIох.