Форумэу «НыбжьыкIэхэр ыкIи кIэлэцIыкIухэр» зыфиIорэр кIэм фэкIуагъ — шIэныгъакIэмэ, зэIукIэ гъэшIэгъонмэ ямэфитIу шIагъоу ар щытыгъ. Адыгеим икIэлэеджакIомэ лъэныкъо зэфэшъхьафхэмкIэ заушэтыгъ ыкIи къагурыIуагъ: еджэнымрэ гукъэкIхэр зиIэхэмрэ неущрэ мафэр аIэ илъыщт.

— Форумым хэлажьэхэрэр копирайтингым ыкIи SMM-м ылъапсэхэр зэхафыгъэх, кейс шъыпкъэхэр зэхаугуфыкIыгъэх, джащ фэдэу   SMM-агентствэм истратегие зэхагъэуцуагъ. ЗэкIэ кIалэхэр Iушых, псынкIэу материалыр къаубыты, яшIэ шIэгъошIу, нэужым зэкIэхэми унэе проектхэр къадэхъугъэх,— къыIотагъ площадкэу «Цифрэ сэнэхьатхэр» зыфиIорэм изещакIоу Лариса Шевелевам.

Адрэ лъэныкъохэр сыд фэдагъэха?

·        «Медиа ыкIи блоггингыр»: гукъэкIхэм якъэугупшысын ыкIи аудиторием Iоф дэшIэгъэным кIэлакIэхэр дэлэжьагъэх, контентэу ашIыгъэм уезэщырэп, зэпырыбгъазэ зэпытынэу уфаеу мэхъу.

·        «Графическэ дизайныр»: композициехэр зэхафыгъэх, шъохэр, трендхэр ыкIи стильнэ макетыкIэхэр апэрэу ашIыгъэх.

·        «Психологиер»: зэдэгущыIэгъу чIыпIэхэр зэхэфыгъэнхэмкIэ кIэлакIэмэ адэIэпыIагъэх, команднэ IофшIэныр зэрэгъэпсыгъэм, зэмызэгъыныгъэхэр къыхэмыкIынхэм пае зэрэпсэущтхэм атегущыIагъэх.

·        «Видеосъемкэр»: камерэм идунае кIэлэеджакIохэр хэхьагъэх: кадрэр тэрэзэу агъэпсыныр зэрагъэшIагъ, остыгъэм Iоф дашIагъ, роликхэр тырахыгъэх.

Финальнэ штрихыр — проектхэм якъэухъумэн, командэ пэпчъ иер къыгъэлъэгъуагъ, кIэлэеджакIохэм ягупшысэхэр зэрэчъэпхъыгъэхэр ащ къыгъэнэфагъ.

Шъугу къэдгъэкIыжьын, форумэу «НыбжьыкIэхэр ыкIи кIэлэцIыкIухэр» зыфиIорэр Апэрэхэм я Движениеу Адыгэ Республикэм щыIэмрэ Мыекъопэ къэралыгъо технологическэ университетымрэ зэгъусэхэу зэхащагъ.