Апэрэхэм я Движениеу Адыгэ Республикэм щыIэмрэ Мыекъопэ къэралыгъо технологическэ университетымрэ зэгъусэхэу Форумэу «НыбжьыкIэхэр ыкIи кIэлэцIыкIухэр» зыфиIорэр рагъэкIокIы. Программэр шIэныгъэмэ язегъэушъомбгъун, IофыгъуакIэхэр зэгъэшIэгъэнхэм афэгъэхьыгъ.

Апэрэ мафэм ихъугъэ-шIэгъэ шъхьаIэу щытыгъэр зэдэгущыIэгъоу гъэсэныгъэмрэ шIэныгъэмрэкIэ АР-м иминистрэ игуадзэу Артем Журавель дашIыгъэр ары. Республикэм икIэлэеджакIомэ упчIэ гъэшIэгъонхэр министрэ гуадзэм ратыгъэх:

— гузэжъогъу чIыпIэ ифагъэм сыдэущтэу рэхьатыныгъэ къызхигъэфэн ылъэкIыщт;

— неущрэ сэнэхьатыр къыхэпхыным къин теолъагъомэ, сыда пшIэн фаер;

— командэмкIэ анахь шъхьаIэр сыда — узэдэIужьыныр ара, хьаумэ цыхьэ зэфэпшIыныр ара;

— илъэсипшIыкIэ узэкIэIэбэжьмэ сыд фэдэ джэнджэш министрэм зэритыжьыщтыгъэ.

КIэлэеджэкIо ныбжьыкIэмэ бэ ашIогъэшIэгъоныгъэр, яупчIэмэ шъыпкъагъэ ахэлъыгъ, щыIэныгъэм къыхэхыгъагъэх. Нэбгырэ пэпчъ джэуап игъэкIотыгъэ ритыжьыгъ. ЗэдэгущыIэгъур гъэшIэгъонэу кIуагъэ.

Форумым изэхэщакIоу, апэрэхэм я Движение ишъолъыр къутамэу АР-м щыIэм иотдел ипащэу Тхьагъушъ Джанетэ къыхигъэщыгъ кIэлакIэмэ ягоIакIэ, шIоигъоныгъэшхо яIэу Iофтхьабзэм зэрэхэлажьэхэрэр пстэуми зэрэ нахь шъхьаIэр.

—  Непэ къэлъагъо гуетныгъэшхо яIэу ныбжьыкIэхэр форумым зэрэхэлажьэхэрэр. Ахэр нэутхэх, упчIэхэр атыным тещыныхьэхэрэп, зыкъагъэлъэгъошъу. Тэ типшъэрылъыр — ягукъэкIхэр нэфапIэ ашIынхэмкIэ амалхэр яттынхэр ары, — къыкIигъэтхъыгъ Джанетэ.

Ащ къыкIэлъыкIоу форумым хэлажьэхэрэмэ яIофшIэн тематическэ площадкэхэм ыкIи мастер-классхэм мыщ фэдэ лъэныкъохэмкIэ падзэжьыгъ:

• цифрэ сэнэхьатхэр;

• медиа ыкIи блогингыр;

• графическэ дизайныр;

• психологиер;

• видеосъемкэр.

Площадкэмэ ащыжъотыгъ: зэгорэм блогер ролыр къышIыгъ, нэмыкIым профессиональнэ программэу  дизайным фытегъэпсыхьагъэр зэригъэшIагъ, камерэр зиIэубытыпIэу итарихъ кадрэхэмкIэ къэзыIуатэхэрэри ахэтыгъэх. Атмосферэр — псынкIэ, гушхуагъэ зэкIэми яI, мэгушIох.

Форумым иIофшIэн неущ падзэжьыщт: практикэм хэхьащтых, Iэмэ-псымакIэхэр аратыщтых, яунэе проектхэр зэхарагъэуцощтых, етIанэ ахэр къаухъумэжьыщтых.

Шъолъыр форумэу «НыбжьыкIэхэр ыкIи кIэлэцIыкIухэр» — ар амалыкIэхэм ячIыпI, нэIосакIэхэр зыщашIыхэрэ, апэрэ профессиональнэ лъэубэкъухэр зыщадзыхэрэ пчэгу. ГукъэкIхэр Адыгеим иныбжьыкIэхэм нэфапIэ мыщ щашIыжьы.