Мыекъопэ къэралыгъо технологическэ университетымрэ мэкъумэщымкIэ Адыгэ Республикэм и Министерствэрэ, джащ фэдэу гъэсэныгъэмрэ шIэныгъэмрэкIэ АР-м и Министерствэрэ зэгъусэхэу агротехнологическэ классхэр шъолъырым къыщызэIуахыгъэнхэмкIэ IофшIэнышхо агъэцэкIагъ.

Мы IофшIэныр зыфэгъэхьыгъэр зэпымыоу кадрэхэр Адыгэ Республикэм иагропромышленнэ комплекс пае гъэхьазырыгъэнхэр ары, ахэр еджапIэхэм, апшъэрэ еджапIэхэм, колледжхэм ыкIи IофшIэн къязытыхэрэм язэдэлэжьэныгъэ къыпкъырыкIынхэу щытых. Ащ фэдэ шIыкIэм къегъэпсы  предпрофессиональнэ гъэсэныгъэ лъэныкъор, джащ фэдэу  мэкъу-мэщыр къыхахынымкIэ гъэсэныгъэ ыкIи профессиональнэ екIолIакIэр  гъэфедагъэ мэхъу, ныбжьыкIэхэм сэнэхьатыр зэхашIыкIэу мэхъу.

Торжественнэ тIупщыгъом агротехнологическэ классхэм ащеджэхэрэ нэбгырэ 200-м ехъу хэлэжьагъ, ахэр республикэм иеджэпIэ 15-мэ къарыкIыгъэх. КIэлакIэхэр нэIуасэ афэхъугъэх университетым ыгъэцэкIэрэ гъэсэныгъэ программэхэм, кIэлэегъаджэхэм адэгущыIагъэх, университетым иегъэджэн лабораториехэр зэрагъэлъэгъугъэх. Ахэмэ апае практическэ мастер-классхэр зэхащэгъагъэх, непэрэ технологиехэр, Iэмэпсымэхэу мэкъу-мэщым рахьылIэхэрэр зыфэдэхэр ашIагъэх. ЗэкIэмкIи площадки 10-мэ Iоф ашIагъ:

·      Гъомлэпхъэ продуктмэ ябиотехнологиехэр ыкIи амалхэр

·        Гъомлэпхъэ продуктмэ ядэгъугъэ къэзгъэлъэгъорэ  сенсорхэр

·       АПК-м щагъэфедэрэ пилот зэрымыс быбырэ аппаратхэм ясистемэ программирование ыкIи проектирование шIыгъэныр

·        Флористическэ мастерскоир

·        КъэкIырэмэ ахашIыкIырэ гъомлапхъэхэр

·        Гъомлэпхъэ индустриемкIэ стол кIыIу джэгукI

·        Агрофармэр

·        КъэкIырэмэ яхырыхыхь

·        чIыгур фокусым

·        Бжьэмэ ядунай

Уиверситетым иплощадкэ къыщагъэлъэгъуагъэх агротехнологическэ классхэм, МКьТУ-м хэхьэрэ Политехническэ колледжым, Дондуковскэ мэкъу-мэщ техникумым ыкIи Красногвардейскэ аграрнэ-промышленнэ техникумым ястендхэр.

ШIуфэс псалъэ къэзышIыгъэхэр: МКъТУ-м егъэджэн IофшIэнымкIэ ипроректорэу Людмила Задорожнаяр; мэкъумэщымкIэ Адыгэ Республикэм и Министрэ игуадзэу Шъэожъ Абрек; гъэсэныгъэмрэ шIэныгъэмрэкIэ АР-м и Министрэ игуадзэу Артём Журавель. Ащ ыуж мэкъу-мэщ технологиехэм ядеканэу Шъхьапэцэ Аслъан  МКъТУ-рэ  агротехнологическэ классхэмрэ зэрэзэдэлэжьэщтхэ прораммэм нэIуасэ фишIыгъэх. Социальнэ гъусэгъухэм алъэныкъокIэ къэгущыIагъ ООО «Зелёный Дом» зыфиIорэм илIыкIоу, генеральнэ пащэм игуадзэу Виталий Сапоныр.

Лъэпкъ проектэу «АПК-м пае кадрэхэр» зыфиIорэм къыдыхэлъытагъэ агротехнологическэ классхэм яторжественнэ къызэIухын хахьэу Адыгеим икIэлэеджакIохэм зарэдэлажьэхэрэм елъытыгъэу зэхэгущыIэжь площадкэмэ Iоф ащашIагъ, ащ темэу иIагъэр: «Интерес молодежи к аграрным специальностям: ключевые факторы, стратегия привлечения».

Ар зезыщагъэр кафедрэм ипащэу Мамсыр Нурбый. ЗэхэгущыIэжьым хэлэжьагъэх: гъэсэныгъэмрэ шIэныгъэмрэкIэ АР-м и Министрэ игуадзэу Артём Журавель, мэкъумэщымкIэ Адыгэ Республикэм иминистерствэ  испециалист шъхьаIэу Къэлэшъэо Адам, факультетмэ ядеканхэр, еджапIэмэ япащэхэр, агротехнологическэ классмэ якIэлэегъаджэхэр, индустриальнэ гъусэгъухэр ыкIи мэкъу-мэщ производствэм илIыкIохэр.

КIэлэеджакIомэ сэнэхьатэу къыхахырэмкIэ анахь къашъхьэпэщт лъэныкъохэр къэгущыIагъэмэ къыхагъэщыгъэх. Зэпстэуми апэ рагъэшъырэр гъэсэныгъэ Iахьэу щыIэм зэхъокIыныгъэхэр фэшIыгъэнхэр, ащ  инновационнэ методхэр къешIэкIыгъэхэу егъэджэнхэр зэхэщэгъэнхэр, практикэхэр ыкIи стажировкэхэр мэкъумэщышIэ хъызмэтшIапIэмэ ащырегъэкIокIыгъэнхэр арых. КъэгущыIагъэмэ джащ фэдэу къыкIагъэтхъыгъ гъэсэныгъэ непэрэ технологиехэмрэ интерактивнэ екIолIакIэхэмрэ мэкъумэщышIэхэм ясэнэхьат имэхьанэ къызэраIэтырэр, кIэлэеджакIоу ар зышIогъэшIэгъонхэр нахьыбэ зэрэхъухэрэр.

Ащ фэшъхьафэу анаIэ тырадзагъ социальнэ-экономическэ инфраструктурэу къоджэ шъолъырхэм яIэм. Къэралыгъо структурэмэ ялIыкIохэмрэ мэкъумэщ хъызмэтхэм япащэхэмрэ зэдырагъэштагъ къэлэ Iэрыфэгъу щыIакIэмрэ къоджэ псэукIэу нахьышIу хъурэмрэ яшIуагъэкIэ ныбжьыкIэ кадрэхэр Iофым къещэлIэгъэнхэр къызэрагъэпсынкIэрэр. Зэтегъэпсыхьэгъэ унэ псэупIэхэр, непэрэ уахътэм диштэрэ медицинскэ фэIо-фашIэхэр ыкIи  культурнэ учреждениехэр нахьыбэ зэрэхъугъэхэм сэнэхьатым икъыхэхынкIэ гугъапIэу щыIэр нахь лъагэ къашIы.

Мэкъу-мэщ сэнэхьатым рылажьэрэмэ ягъэхъагъэхэр, ахэмэ ящыIэкIэ-псэукIэ зыфэдэр икъоу цIыфмэ зэрамышIэрэм, икъоу ахэмэ афэгъэхьыгъэ къэбархэр зэралъымыIэсхэрэм иягъэ къызэрэкIорэри къыхагъэщыгъ. Форумым хэлэжьагъэмэ яшIошIыкIэ, информационнэ-гъэсэныгъэ кампаниехэм зягъэушъомбгъугъэным, мэкъу-мэщ университетхэм къычIатIупщыгъэмэ ягъэхъагъэхэр къэгъэлъэгъогъэнхэм шIогъэшхо къатыщт.

ЕзыгъэжьэгъэкIэ предпринимательхэм ыкIи студентхэм къэралыгъо IэпыIэгъу ягъэкIыгъэным фэгъэхьыгъэ упчIэм шъхьафэу хэплъагъэх. Нэужым, мэкъумэщымкIэ Адыгэ Республикэм иминистерствэ  испециалист шъхьаIэу Къэлэшъэо Адам къызэгущыIэм къыхигъэщыгъ, къэралыгъо программэхэмкIэ научнэ-ушэтэкIо IофшIагъэхэм, анахьэу шIэныгъэлэжь ныбжьыкIэхэм ыкIи специалистхэм ахъщэ афэтIупщыгъэным мэхьанэшхо зэриIэр.  ЗэкIэхэми зэдырагъэштагъ грантовэ IэпыIэгъухэу а лъэныкъомкIэ агъэфедэшъущтхэми яшIуагъэ къызэрэкIощтым.

Сэнэхьатэу къыхахынымк1э зыщыгугъухэрэм, мэкъу-мэщым фэгъэзагъэхэм,  непэ щылажьэрэмэ ялэжьапкIэ мэхьанэ зэриIэри къэгущыIагъэхэм къыхагъэщыгъ. НыбжьыкIэхэр Iофым къещэлIэгъэнхэм пае, ахэмэ алъэгъунэу щыт IофшIакIомэ ялэжьапкIэ зэрэдэгъур ыкIи социальнэу зэрэухъумагъэхэри.

Зэхэсыгъом икIэухым зэфэхьысыжьхэр ашIыгъэх, ныбжьыкIэхэр мэкъу-мэщ отраслым хэщэгъэнхэм пае ашIэн фае Iофыгъохэр агъэнэфагъэх: гъэсэныгъэ процессыр гъэкIэжьыгъэныр, къуаджэхэм уащыпсэуныр Iэрыфэгъоу шIыгъэныр, мэкъу-мэщым щылажьэхэу гъэхъагъэхэр зиIэхэм, ахэмэ ящыIэкIэ дэгъу ягъэшIэгъэныр, шIэныгъэлэжь ныбжьыкIэмэ ыкIи фермермэ япроектхэм ахъщэ IэпыIэгъу ятыгъэныр.

ЗэкIэхэри къызфэкIуагъэхэр зы: ныбжьыкIэхэр мэкъу-мэщ сэнэхьатхэм къящэлIэгъэнхэм ипшъэрылъ едзыгъо-едзыгъоу гъэцэкIэгъэн фае, лъэныкъуабэхэр щызэдэлэжьэнхэ фае: къэралыгъо хабзэр, IофшIэныр къязытыхэрэр, апшъэрэ гъэсэныгъэм иинститутхэр.