Университетым хъугъэ-шIэгъэ гъэшIэгъон заулэ щыкIуагъ — кинокъэгъэлъэгъоныр, зэIухыгъэ десэр ыкIи поэтическэ еджэнхэу Владимир Маяковскэм ифутуристическэ поэмэу «Быбырэ пролетариер» зитхыгъэр илъэси 100 зэрэхъугъэм фэгъэхьыгъэр, ащ авторым дунаир 2125-рэ илъэсым ехъулIэу зэрилъэгъурэр къыщыриIотыкIыгъагъ.

«Точка кипением» ихъытыу ары Акциер зигукъэкIыгъэр, ар инженерием, технологиякIэхэм, инновациехэм, гъэсэныгъэм ясферэхэм ащылажьэхэрэм афэгъэхьыгъагъ, джащ фэдэу ныбжьыкIэ техническэ творчествэм хэлажьэхэрэм ыкIи инженернэ гуфакIохэм. Мыекъопэ къэралыгъо технологическэ университетым и «Точка кипение» икоманд ары зэхэщэкIуагъэр.

МКъТУ-м хэхьэрэ Дзэ егъэджэн гупчэм икурсантхэмрэ маркетингым, сервисым ыкIи туризмэм якафедрэ идоцентэу, МКъТУ-м и «Точка кипение» ипрограммнэ пащэу Светлана Новиковамрэ зэгъусэхэу поэмэм иэкранизацие еплъыгъэх, ащ ыуж тегущыIэжьыгъэх. Лицееу № 34-м икIэлэеджакIохэмрэ икIэлэегъаджэхэу Евгения Горюновамрэ  Светлана Великовамрэ зэIухыгъэ десэм произведением итарихъ ыкIи икультурэ нэшанэхэр щызэхафыгъэх. Научнэ тхылъеджапIэм щызэхэхьэгъэ студентхэмрэ ащ инаучнэ-методическэ отдел ипащэу Ирина Константиновамрэ поэмэм амакъэ Iоу къыщеджагъэх ыкIи еплъыкIэу фыряIэхэмкIэ щызэдэгощагъэх.

ЗэIукIэм хэлажьэрэмэ къызэрэхагъэщыгъэмкIэ, неущрэ уахътэм хъун ылъэкIыщтхэу Маяковскэм къытхыгъагъэхэр непэ нэфапIэ хъужьыгъэх: дронхэр, къэугупшысыгъэ шхынхэр, аудиотхылъхэр, мобильнэ телефонхэр, акъылыгъэ зыхэлъ унэхэр, искусственнэ интеллектыр ыкIи нэмыкI технологиехэр.

Владимир Маяковскэр — я XX-рэ лIэшIэгъум ипоэт шъхьаIэхэм ащыщыгъ, урыс футуризмэм итамыгъэу щытыгъ. Ащ и «Быбырэ пролетарие» зыщыIэр илъэси 100 мэхъу (1925-2025). Акциер тыгъэгъазэм нэс Урысыем щырагъэкIокIыщт.

Шъо джащ фэдэу викторинэу «Илъэси 100-кIэ ыпэ уишъымэ» зыфиIорэр щышъукIун шъулъэкIыщт ыкIи шъуишIэныгъэхэр мыщ щышъууплъэкIунхэ шъулъэкIыщт. Проектым икъэбар нахь игъэкIотыгъэу официальнэ сайтым ит.

Акцием икъежьапIэм  гъусэгъу фэхъугъэх «Точка кипениер» ыкIи Астраханскэ, Курскэ, Архангельскэ, Самарскэ, Белгородскэ хэкухэм, Краснодарскэ, Забайкальскэ, Ставропольскэ, Приморскэ, Камчатскэ, Пермскэ крайхэм, Адыгэ Республикэм яорганизациехэр, джыри ахэм япчъагъэ хэхъо.