Мыекъопэ районым игъэсэныгъэ гупчэу №10-м торжественнэ Iофтхьабзэхэу еджапIэр илъэси 100 зэрэхъугъэм фэгъэхьыгъэхэр щыкIуагъэх. Мыекъопэ къэралыгъо технологическэ университетым истудентхэр — федеральнэ программэу «Къулыкъу ахьызэ егъэджэгъэнхэр» зыфиIорэм игъэцэкIэн дэлэжьэрэ гъэсакIохэр мэфэкI Iофтхьабзэм хэлэжьагъэх.

Проектэу «КIэлэеджакIохэр хэгъэгум имэшIогъэкIосэ къулыкъумкIэ Урысыем итарихъ хэщэгъэнхэмкIэ технологиехэр гъэфедэгъэнхэр» зыфиIорэм дэлажьэх (ID 459319) студентхэу сэнэхьатэу «МэшIо щынэгъончъэныр» зыцIэм щеджэхэрэ Екатерина Кореевар, Вероника Коробко ыкIи Виолетта Ширар, ахэр МЧС-м иеджапIэ икадетхэр ягъусэхэу практическэ мастер-классхэу «Апэрэ IэпыIэгъур» ыкIи «МэшIо щынэгъончъэныр» зыфиIохэрэр рагъэкIокIыгъэх.

Программэу «Къулыкъу ахьызэ егъэджэгъэнхэр» зыфиIорэм студентмэ амал къареты япрофессиональнэ ыкIи ахэмэ акIыIукIэ щыIэ профессиональнэ компетенциехэм зарагъэушъомбгъунэу, социальнэ пшъэрылъхэри агъэцэкIэшъунхэу.

Мастер-классэу «Апэрэ IэпыIэгъум» хэлэжьагъэхэмэ аныбжьхэр зэфэшъхьафых, еджапIэхэр къэзыухыгъэхэри ахэтых, ахэмэ ошIэ-дэмышIэ Iофхэм яуахътэ зэрэщызекIощтхэр зэрагъэшIагъэх:

• гу-тхьабыл реанимацие шIыгъэныр;

• жьыр икъоу къэзымыщэшъурэм апэрэ IэпыIэгъур егъэкIыгъэныр;

• жьыр къыщэу, ау мэхыгъэм узэрэдеIэщтыр;

• жьырыкIуапIэхэм уазэрэдэIэпыIэщтыр;

• IэпыIэгъу зэратырэр бгъунджэу зэрэбгъэгъолъыщтыр;

• IэпыIэгъу псынкIэм ыкIи нэмыкI къулыкъухэм укъызэряджэщтыр.

Десэу «МэшIо щынэгъончъэныр» зыфиIорэм хэлэжьэгъэ хьакIэмэ практическэ опыт агъотыгъ.

IофшIэным мэхьанэшхо зэриIэр къэзгъэлъэгъуагъэр проектым ипащэу Къыздырмыш Сулиетэ Хъалидэ ыпхъум бгъэхалъхьэ къызэрэратыгъэр ары, джащ фэдэу студентхэри къыхагъэщыгъэх.

Ащ фэдэ уасэ къазэрафашIыгъэм къегъэлъагъо командэм хэхъоныгъэ зэришIырэр, университетымрэ еджапIэмрэ язэдэлэжьэн зэрэлъыкIуатэрэр, федэ къызэрихьырэр. Ащ студентхэр щыгъэсакIох, кIэлэеджакIохэм практическэ шIэныгъэхэр арагъэгъоты. Ащ фэдэ екIолIакIэр федеральнэ программэу «Къулыкъу ахьызэ егъэджэгъэнхэр» зыфиIорэм зэрэпсаоу дештэ, гъэсэныгъэ процессымрэ социальнэ практикэмрэ зэрепхых.