Муниципальнэ къулыкъушIэхэм якомпетенцие хэхъоныгъэ егъэшIыгъэным фытегъэпсыхьэгъэ семинар Мыекъопэ къэралыгъо технологическэ университетым щыкIуагъ.

Мы зэIукIэгъум зэрищэлIагъэх опытэу аIэкIэлъымкIэ нэмыкIхэм адэгощэнхэм, гъэхъэгъакIэхэм афэзыщэнхэм фэхьазырхэ  республикэм иэксперт пэрытхэр ыкIи пащэхэр.

Адыгэ Республикэм и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец къэзэрэугъоигъэхэм шIуфэс гущыIэхэмкIэ закъыфигъэзагъ, цIыфхэм уадэгущыIэным мэхьанэшхо зэриIэр, хабзэм икъулыкъухэм шIуагъэ къытэу яIофшIэн зэхащэным ыкIи цыхьэ къафашIыным ащ фэдэ екIолIакIэр алъапсэу зэрэщытыр хигъэунэфыкIыгъ. Зыкъыпфэзгъэзэгъэ цIыфхэм тэрэзэу уадэгущыIэныр, ахэр зэхэпшIыкIынхэр шъолъырым щыпсэухэрэм ящыIэкIэ-псэукIэ изытет зыфэдэщтым бэкIэ зэрепхыгъэр къыIуагъ.

Мы Iофыгъом епхыгъэу къэгущыIагъ АР-м чIыпIэ зыгъэIорышIэжьыпIэ къулыкъухэм зэпхыныгъэ адыряIэнымкIэ и Комитет итхьаматэу КIэдэкIое Руслъан.

«АР-м имуниципальнэ образованиехэм я Совет» и Ассоциацие иправление итхьаматэу Апсэламэ Руслъан къызэриIуагъэмкIэ, мыщ фэдэ Iофтхьабзэхэм яшIуагъэкIэ шIэныгъакIэхэр зэрагъэгъотых, муниципалитет зэфэшъхьафхэм ялIыкIохэм зэпхыныгъэ адашIы, опытэу аIэкIэлъымкIэ зэхъожьых.

МКъТУ-м къэралыгъо ыкIи муниципальнэ къулыкъушIэхэм якомпетенцие хэхъоныгъэ ышIынымкIэ и Гупчэ ипащэу, филологие шIэныгъэхэмкIэ кандидатэу, доцентэу Пафэ Фатимэ IофышIэхэм яегъэджэгъэн фытегъэпсыхьэгъэ екIолIакIэхэм къатегущыIагъ. 

Апэрэ сессиер темэу «Обращения граждан» зыфиIорэм фэгъэхьыгъагъ.  ООО-у «Агентство правовой информации «Грант « зыфиIорэм идепартамент ипащэу Анна Честных  интерактивнэ джэгукIэ ригъэкIокIыгъ. Мы Iофыгъом епхыгъэу къэгущыIагъэх Дукмасовскэ къоджэ псэупIэм ипащэу Василий Шикенинымрэ Краснооктябрьскэ къоджэ псэупIэм ипащэрэ.

КъыкIэлъыкIорэ сессиер темэу «Мотивация персонала: как зажечь в людях желание работать» зыфиIорэм фэгъэхьыгъагъ.

Iофтхьабзэм имодераторыр  ООО-у «Агентство правовой информации «Грант» зыфиIорэм иподразделениеу «Мыекъуапэ» зыцIэм ипащэу Пащэ Зарема.

Iофтхьабзэм икIэух МКъТУ-м къэралыгъо ыкIи муниципальнэ къулыкъушIэхэм якомпетенцие хэхъоныгъэ ышIынымкIэ и Гупчэрэ Ассоциациеу «АР-м имуниципальнэ образованиехэм я Совет» зыфиIорэмрэ зэрэзэдэлэжьэщтхэм фэгъэхьыгъэ зэзэгъыныгъэм кIэтхагъэх.