МКъТУ-м гъомлэпхъэ технологиехэмкIэ ыкIи шхыныгъохэм ягъэхьазырынкIэ икафедрэ имагистранткэу Сарине Карапетян джыри зэ иIэпэIэсэныгъэшхо къыгъэшъыпкъэжьыгъ.

Ар кулинарнэ ыкIи кондитерскэ IэпэIэсэныгъэмкIэ Урысые зэнэкъокъум хэлэжьагъ, научнэ IофшIагъэу «Безглютеновые мучные кондитерские изделия с использованием жмыха моркови функционального назначения» зыфиIорэр осэшIмэ апашъхьэ рилъхьагъ. Проектым инаучнэ пащэр — кафедрэм идоцентэу Светлана Некрасовар ары.

Урысыем ихьалыгъугъажъэхэм я Кубок хэгъэгум иушэтэкIо ныбжьыкIэхэр фэбэнагъэх. Студентмэ IофшIагъэхэр агъэхьазырыгъэх: ушэтынхэу нэкIубгъо 20-25-рэ хъухэрэр ыкIи нэкIубгъуих хъурэ статья шъхьафхэр, ахэмэ ежьхэм атхыгъэ шъыпкъэр процент 65-м къыщыкIэнэу щытыгъэп. IофшIагъэмэ ятемэхэр зэфэшъхьафыгъэх — хабзэ хъужьыгъэ рецептурэхэм къащыублагъэу непэрэ технологиехэм анэсыжьхэу, функциональнэ ыкIи диетическэ шхыныгъохэм афэгъэхьыгъэхэр, пхъэшъхьэ-мышъхьэ Iэлхэм ахэшIыкIыгъэхэр ыкIи дунаим тет лъэпкъмэ ятарихъ рецептхэр агъэфедагъэх.

Iофэу ышIагъэмкIэ Сарине я III-рэ чIыпIэр къыдихыгъ ыкIи дипломыр къылэжьыгъ. Ащи, иIэшъхьэтети тафэгушIо, джыри текIоныгъабэхэр къыдахынхэу тафэлъаIо!

Зэнэкъокъум изэхэщакIохэр: Московскэ хэкум ихьалыгъугъажъэхэмрэ икондитерхэмрэ я Гильдие, биотехнологиехэмкIэ ыкIи гъомлэпхъэ щынэгъончъэнымкIэ В.И. Вернадскэм ыцIэ зыхьырэ РГУ-м икафедрэ. ЯIэпыIэгъугъэхэр: наукэмрэ гъэсэныгъэмрэкIэ УФ-м и Министерствэ, мэкъу-мэщымкIэ УФ-м и Министерствэ, кулинархэм я Московскэ ассоциацие.

Шъугу къэдгъэкIыжьын, блэкIыгъэ мазэм Сарине гъэсэныгъэ программэу «Гастроэкспедиция: Крым» зыфиIоу творческэ  индустриехэм я «Меганом» и арт-кластерэу «Тавридэм» и Академие зэхищагъэм ифинал ихьэгъагъ, ащ ар Къырым игастрономическэ культурэ нэIуасэ щыфэхъугъагъ, Адыгеим икулинарнэ хабзэхэр къэзгъэлъэгъорэ авторскэ десертыр щишIыгъагъ.