Финансовэ гъэсэныгъэм и Фестиваль Адыгеим щылъагъэкIуатэ, тхьэмафэу икIыгъэр анахьэу IофтхьабзэхэмкIэ баигъэ. Республикэм щыпсэурэмэ апае зэхахьэхэм язэхэщэкIуагъэхэр ыкIи зезыщагъэхэр финансовэ гъэсэныгъэм и Гупчэ иIофышIэхэр ары: МКъТУ-м финансхэмкIэ ыкIи кредитхэмкIэ икафедрэ идоцентэу Татьяна Паладовар, финансхэмкIэ ыкIи кредитхэмкIэ кафедрэм испециалистэу ыкIи идоцентэу Мамыекъо Людмилэ.

Чъэпыогъум и 27-м къыщегъэжьагъэу гъэсэныгъэ ыкIи егъэджэн зэхахьэхэр республикэм щэкIох. Мыекъопэ районым ит гъэсэныгъэ гупчэу №6-м щеджхэрэмэ финансовэ шIэныгъэхэр арагъэгъотыгъэх.  Финансовэ гъэсэныгъэм и Гупчэ ипащэу Татьяна Паладовам зэIухыгъэ десэу «Тарихъыр ыкIи ахъщэ лъэпкъэу щыIэхэр» зыфиIорэр ригъэкIокIыгъ. КIэлэцIыкIумэ апэрэ ахъщэхэр зыфэдагъэхэр, сомэм сомэ зыкIыраIорэр, чапычым чапычыкIэ зыкIеджэхэрэр, макIэу зылъэгъурэмэ ахъщэр зэрэзэхашIыкIырэ шIыкIэр  арагъэшIагъэх. КIэлэеджэкIо нахьыжъхэм апае Мамыекъо Людмилэ лекциеу «Личный финансовый план» зыфиIорэм къеджагъ. Финансовэ пшъэрылъхэр тэрэзэу зэрэбгъэуцущтхэр, бюджетыр зэрэбгъэнэфэщтыр, гухэлъым узэрэфэкIощт шIыкIэр кIэлэеджакIомэ  къафиIотагъ.

Анахьэу анаIэ зытырадзагъэр театрализованнэ къэгъэлъэгъонэу «Цыхьэ зышIырэ тхьакIумкIыхьэр» зыфиIорэр ары, экономикэм ыкIи гъэIорышIэнымкIэ МКъТУ-м ифакультет истудентхэм ар къагъэхьазырыгъ, Гимназиеу №5-м щеджэхэрэр рагъэплъыгъэх.  Пшысэмэ ахэт лIыхъужъхэмкIэ сабыйхэм ахъщэм имэхьанэ зэрагъэшIагъ. Студентхэри пшысэм щыщхэм афэдэу зашIыщтыгъэ, ахэмэ яупчIэхэм джэуап къязытыжьрэмэ шIухьафтынхэр аратыщтыгъэх.

Медицинскэ институтым истудентмэ апае Iофтхьабзэ шъхьаф зэхащэгъагъ. АР-м и Лъэпкъ банк иэкономическэ отдел ипащэу Ирина Воробьевар лекциеу «Непэрэ экономикэм Iоф зэришIэрэр ыкIи инфляциер бгъэIорышIэшъуным имэхьанэ» зыфиIорэм къеджагъ. Хэгъэгум иэкономикэ зэрэгъэпсыгъэр, Урысыем и Банк инфляциер зэрэзэтыриIажэрэр, нэмыкIхэри студентхэм ашIагъэх.

Финансовэ гъэсэныгъэм и Фестиваль джыри аухыгъэп. Хъарджхэмрэ федэхэмрэ зэхэшъуфынхэ шъулъэкIэу, ахъщэм игъэзекIон, бюджетыр тэрэзэу гъэнэфэгъэным зыфэжъугъасэ шъушIоигъомэ, Iофтхьабзэхэм шъуахэлажь. Программэр мыщ ижъугъотэщт: vk.cc/cQBOFg.