Мыекъопэ къэралыгъо технологическэ университетым Iэнэ хъураеу «Финансовэ гъэсэныгъэм къикIэу финансовэ культурэм екIоу» зыфиIорэр щыкIуагъ, ар Адыгэ Республикэм финансовэ гъэсэныгъэм и Фестивалэу щызэхащэрэм къыдыхэлъытэгъагъ.

Iофтхьабзэм изэхэщэкIуагъэх университетыр ыкIи Адыгэ Республикэм ифинансовэ гъэсэныгъэ и Шъолъыр гупчэ, финансхэмкIэ АР-м и Министерствэ яIэпыIэгъугъ.

Финансовэ структурэхэр, гъэсэныгъэ организациехэр ыкIи студентхэр Iофтхьабзэм зэрипхыгъэх, ахъщэм фыщытыкIэу фыуиIэн фаер, пшъэдэкIыжьэу епхьылIэшъущтым атегущыIагъэх.

ШIуфэс псалъэкIэ къэзэрэугъоигъэхэм закъыфагъэзагъ: Урысые Федерацием ибанк Гупчэ и Къыблэ гъэIорышIапIэ хэхьэрэ Адыгэ Республикэм и Отделение-Лъэпкъ банкым ипащэу Сергей Самойленкэр; финансхэмкIэ АР-м и Министрэ игаудзэу,  межведомственнэ рабочэ купым ятхьаматэгъоу Хьэпэе Мариет; МКъТУ-м экономикэмкIэ ыкIи гъэIорышIэнымкIэ ифакультет идеканэу, экономикэ шIэныгъэхэмкIэ кандидатэу, доцентэу Ешыгоо Светланэ.

Докладэу Iофтхьабзэм къыщашIыгъэхэр:

— финансхэмкIэ АР-м и Министерствэ методологиемкIэ ыкIи къэралыгъо мониторингымкIэ иотдел иупчIэжьэгъу пэрытэу Эвелина Ананниковам идокладэу «Практика развития инициативного бюджетирования в субъектах Российской Федерации» зыфиIорэр;

— ПАО Сбербанкым и Адыгэ къутамэ идэкIыгъо сервисым именеджерэу Ксения Сафроновам идокладэу «Программа долгосрочных сбережений» зыфиIорэр.

ЗэIукIэм хэлэжьагъэмэ финансовэ культурэм зыкъегъэIэтыгъэным фэгъэхьыгъэ зэдэгущыIэгъухэр ашIыгъэх, темэхэмкIэ яшIошIхэр къаIуагъэх, зэхъожьыгъэх, джащ фэдэу финансовэ гъэсэныгъэм хэхъоныгъэ егъэшIыгъэным и Стратегиеу 2030-м нэс агъэцэкIэнэу щытым тегущыIагъэх.

Финансовэ структурэхэм, гъэсэныгъэ организациехэм ыкIи студентхэм конструктивнэ зэдэгущыIэгъу зэдашIынымкIэ Iэнэ хъураер амалышIу хъугъэ, цIыфхэм яфинансовэ гъэсэныгъэ ыкIи якультурэ якъегъэIэтын фытегъэпсыхьэгъагъ.