Федеральнэ казначействэм и ГъэIорышIапIэу Адыгэ Республикэм щыIэм пчъэ зэIухыгъэхэм я Мафэ щыкIуагъ — мэхьанэшхо зиIэ хъугъэ-шIагъ, Мыекъопэ къэралыгъо технологическэ университетым истудентхэм сэнэхьатэу къыхэхыщтымкIэ программэм щыщ Iахь. НыбжьыкIэхэр къэралыгъо къулыкъум ыкIи финансовэ-бюджетнэ сферэм щылэжьэнхэм къещэлIэгъэнхэр ары Iофтхьабзэм ипшъэрылъыгъэр.

ЗэIукIэм студентхэмрэ кIэлэегъаджэхэмрэ хэлэжьагъэх, ахэмэ язэхэщэкIуагъэр МКъТУ-м къычIитIупщырэмэ IофшIэпIэ чIыпIэ ягъэгъотыгъэным фэгъэзэгъэ Гупчэр ары, ащ ипащэу Темзэкъо Азамат.
 ШIуфэс псалъэкIэ ныбжьыкIэмэ закъыфигъэзагъ Федеральнэ казначействэм и ГъэIорышIапIэу Адыгэ Республикэм щыIэм ипащэу Жанэ Муратэ. Ащ къыхигъэщыгъ гъэсэныгъэ организациехэмрэ къэралыгъо учреждениехэмрэ зэрэзэдэлажьэрэмэ шIуагъэ къызэратыщтыр, ныбжьыкIэмэ сэнэхьатэу къыхахыщтымкIэ IэпыIэгъушIоу зэрафэхъущтыр.

IофшIэным ипрактическэ лъэныкъохэм ведомствэм испециалистхэр къатегущыIагъэх. Докладэу «Хъарджэу ашIыхэрэр лъэныкъо шъхьаIэу зыфэгъэзагъэхэр ыкIи IофыгъуакIэу ащ къыхэхьагъэхэр» зыфиIорэр къышIыгъ хъарджхэм яотдел ипащэу Джымэ Саидэ. Бюджетнэ процессхэм япхыгъэ щысэхэр ащ къыхьыгъэх.

ЛъыплъэкIо-ревизионнэ отделым ипащэу Шънахъо Татьянэ финансовэ лъыплъэным епхыгъэ упчIэхэр къыIэтыгъэх, бюджетыр зэрагъэцакIэрэр, ар зэрауплъэкIурэр, къэралыгъо ахъщэр зыдагъакIорэм гъунэ икъоу зэрэлъафырэр къыIуагъэх.

Къэралыгъо гражданскэ къулыкъум ыкIи кадрэхэм яотдел испециалист-эксперт шъхьаIэу, УФК РА-м и НыбжьыкIэ совет итхьаматэу Мамрыкъо Каринэ студентмэ кадровэ политикэм, IофшIэнымкIэ амалэу ныбжьыкIэ специалистхэм яIэхэр студентмэ къафиIотагъ, стажировкэ  Федеральнэ казначействэм щакIунэу къыригъэблэгъагъэх.

Iофтхьабзэм икIэухым Федеральнэ казначействэм и ГъэIорышIапIэу Адыгэ Республикэм щыIэм имузей зарагъэлъэгъугъ, ащ ведомствэм итарихъ, ихъарзынэщ документхэм нэIуасэ ащыфэхъугъэх.

МКъТУ-рэ Федеральнэ казначействэм и ГъэIорышIапIэрэ зэдэлэжьэныгъэу зэдыряIэм ишIуагъэкIэ студентмэ  профессиональнэ хэхъоныгъэхэр ашIынхэ алъэкIы.