Мы мафэхэм Мыекъопэ къэралыгъо технологическэ университетым шIэныгъэлэжьхэм ясоветэу щыкIуагъэм наукэмрэ гъэсэныгъэмрэ зиIахьышхо хэзылъхьэгъэ кIэлэегъаджэхэр къыщыхагъэщыгъэх.

ЩытхъуцIэ къэзылэжьыгъэмэ дипломхэр аратыжьыгъэх:

— ПрофессорыцIэр фагъэшъошагъ Алексей Малышевым — МКъТУ-м офтальмологиемкIэ икафедрэ ипащэм, медицинэ шIэныгъэхэмкIэ докторым, псауныгъэр къэухъумэгъэнымкIэ Краснодар краим и Министерствэ иофтальмолог шъхьаIэм, ККБ №1-м (къ. Краснодар) и НИИ офтальмологиемкIэ иотделение ипащэм, диссертационнэ советым ФМБА (къ. Москва) хэтым.

— ДоцентыцIэр сэнэхьатэу «Акушерствэр ыкIи гинекологиер» зыфиIорэмкIэ къыфагъэшъошагъ Беслъангъур Заремэ — МКъТУ-м и Медицинскэ институт илечебнэ факультет идеканым, врачэу акушер-гинекологым.

Ащ фэшъхьафэу, МКъТУ-м ипрофессорскэ-кIэлэегъэджэ куп хэтхэм апшъэрэ гъэсэныгъэмрэ наукэмрэкIэ УФ-м и Министерствэ ищытхъу тхылъхэр къафагъэшъошагъэх, гъэсэныгъэ ыкIи научнэ IофшIэным яIахьышхо зэрахалъхьагъэм афэшI.

Щытхъу тхылъхэр зэратыгъэхэр:

·  мэкъу-мэщ продукцием икъыдэгъэкIын технологиехэм якафедрэ ипащэу, мэкъу-мэщ шIэныгъэхэмкIэ доктору, доцентэу Мамсыр Нурбий;

· экологием ыкIи тыкъэзыуцухьэрэ дунаим икъэухъумэнкIэ кафедрэм идоцентэу Любовь Вавиловар;

·  административнэ ыкIи уголовнэ правэм икафедрэ ипащэу, юридическэ шIэныгъэхэмкIэ кандидатэу Елена Курбановар;

· стандартизациемкIэ, метрологиемкIэ ыкIи товарнэ экспертизэмкIэ кафедрэм ипащэу, техническэ шIэныгъэхэмкIэ кандидатэу, доцентэу Тазэ Зарет;

· егъэджэн-методическэ гъэIорышIапIэм ипащэ игуадзэу ХъокIон Саидэ.

Мыекъопэ къэралыгъо технологическэ университетыр IофшIэгъухэм афэгушIо! Шъо шъуигъэхъагъэхэр — илъэс пчъагъэхэм къакIоцI Iофэу шъушIагъэхэм къакIэкIуагъэх, шъуинаучнэ лъыхъонхэм, шъуиIоф шIулъэгъоу фышъуиIэм. Джыри бэрэ тиуниверситет щыжъугъэкIорэ уахътэм гукъыдэчъхэр къышъуфихьынхэу, гъэхъагъэу шъуиIэхэм ахэжъугъэхъонхэу тышъуфэлъаIо!