Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ ректорэу Къуижъ Саидэ.

Хабзэ зэрэхъугъэу, профессорскэ-кIэлэегъэджэ купым щыщхэу къызыхъугъэ зимэфэкI мафэхэр хэзгъэунэфыкIыгъэмэ афэгушIуагъэх. Ащ ыуж, университетым хэхъоныгъэ егъэшIыгъэным, гъэсэныгъэ программэхэм ягъэкIэжьын афытегъэпсыхьэгъэ упчIэхэр зэрыт повесткэм тегущыIагъэх.

Апэрэ упчIэу повесткэм елъытыгъэу зытегущыIагъэхэр 2025-2026-рэ еджэгъу илъэсым МКъТУ-м Iоф зэришIэщтым и План ары. Апшъэрэ стратегическэ пшъэрылъэу университетым иIэр къэнэжьы, ар непэрэ гъэсэныгъэ ыкIи научнэ амалхэу интеллектуальнэ, материальнэ ыкIи информационнэ ресурсхэр зэзыпхыхэрэр, академическэ ыкIи отраслевой наукэм, джащ фэдэу бизнесым хэхъоныгъэхэр ягъэшIыгъэнхэр ары. Ащ фэдэ зэдэлэжьэныгъэ моделыр кадровэ, научнэ-техническэ, инновационнэ амалэу шъолъырым иIэм игъэпсын ыкIи лъэхъаныкIэм диштэрэ специалистхэр гъэхьазырыгъэнхэм афэIорышIэ, хэгъэгум ыкIи шъолъырым япроизводственнэ-экономическэ комплекс зырегъэушъомбгъу.

Еджэгъу илъэсыкIэм МКъТУ-р зыдэлэжьэнэу ыгъэнафэхэрэр:

– гъэсэныгъэ процессыр зэхэщэгъэныр ыкIи гъэкIэжьыгъэныр;

– научнэ-ушэтэкIо ыкIи инновационнэ IофшIэным хэгъэхъогъэныр;

– кадровэ ыкIи студенческэ амал дэгъухэр гъэпсыгъэнхэр;

– университетым имылъку комплекс гъэкIэжьыгъэныр;

– гъэсэныгъэ фэIо-фашIэхэмкIэ финансовэ зыпкъитныгъэ ыкIи нэкъокъоныгъэ къэгъэлъэгъогъэныр;

– информационнэ-коммуникационнэ IофшIэным ылъэныкъокIэ хэхъоныгъэхэр шIыгъэнхэр;

– дунэе зэдэлэжьэныгъэр гъэпытэгъэныр;

– гъэIорышIэн системэр гъэлъэшыгъэныр.

МКъТУ-м ишIэныгъэлэжьхэм ясовет зэрилъытэрэмкIэ, пшъэрылъэу агъэуцугъэхэр агъэцакIэхэмэ, университетым иамалхэр нахь гъэлъэшыгъэ хъущтых, непэрэ гъэсэныгъэ ыкIи научнэ гупчэр агъэпытэщт, шъолъырым специалист IэпэIасэхэр фагъэхьазырыщтых.

Ащ къыкIэлъыкIоу упчIэу  «Лечебное дело» зыфиIорэ сэнэхьатым феджэхэрэмэ практикэр афызэхэщэгъэныр» зыфиIорэмкIэ къэгущыIагъ МКъТУ-м и Медицинскэ институтым илечебнэ факультет идеканэу Беслъангъур Заремэ. Ащ къызэриIуагъэмкIэ, сэнэхьатэу «Лечебное дело» зыфиIорэм студент нэбгырэ 1188-рэ щеджэ, ахэмэ IэкIыбым къикIыгъэхэу 130-рэ, зипсауныгъэкIэ амал макIэ зиIэхэу 43-рэ ащыщых. Студент 326-рэ целевой зэзэгъыныгъэхэмкIэ еджэх. Врач сэнэхьатыр зэзгъэгъотыщтхэм практикэр зыщакIущт чIыпIэ 1406-рэ къафыхахыгъ, ахэр лечебнэ-профилактическэ учреждение пэрытхэу республикэм итхэр ары зыдэкIощтхэр, зэзэгъыныгъэхэр мы 2024-2025-рэ еджэгъу илъэсымкIэ зыдашIыгъэхэр, анахь шъхьаIэу ахэтхэр:

·        ГБУЗ РА «Адыгэ республикэ клиническэ сымэджэщыр»;

·        ГБУЗ РА «Мыекъопэ къэлэ клиническэ сымэджэщыр»;

·        ГБУЗ РА «Мыекъопэ къэлэ  IэзапIэр»;

·        ГБУЗ РА «Адыгэ республикэ клиническэ онкологическэ диспансерыр»;

·        ГБУЗ РА «Адыгэ республикэ клиническэ психоневрологическэ диспансерыр»;

·        ГБУЗ РА «Адыгэ республикэ клиническэ инфекционнэ сымэджэщыр»;

·        ООО «Псауныгъэм игупч»;

·        ООО Медицинскэ гупчэу «Мой доктор».

Практикэхэр тишъолъыр ит IэзэпIэ закъохэр арэп зыщакIухэрэр, ахэр Москва ыкIи хэгъэгум инэмыкI чIыпIэхэм ащахьых. МКъТУ-рэ гражданскэ авиацием и Гупчэ клиническэ сымэджэщымрэ зэдашIыгъэ зэзэгъыныгъэм елъытыгъэу студент 30-мэ стажировкэ арегъахьы профессорэу, медицинэ шIэныгъэхэмкIэ докторэу ПщыхьакIэ Ахьмэд. Ащ фэшъхьафэу зэзэгъыныгъэхэр адашIыгъэх докторэу Рошалым и Клиникэ, фтизиопульмонологиемкIэ ыкIи инфекционнэ узхэмкIэ Лъэпкъ ушэтэкIо гупчэм, ахэмэ яспециалист шъхьаIэхэр япащэхэу тистудентмэ практикэхэр акIух. Мы илъэсым ишышъхьэIу мазэ тистудентитIу докторэу Рошалым и Клиникэ практикэр щакIугъ, медицинэ шIэныгъэхэмкIэ докторэу, кIэлэцIыкIу хирургием ыкIи травмотологием и НИИ ыкIи псауныгъэр къэухъумэгъэнымкIэ Москва и Департамент штатым хэмыт инейрохирургэу Жанна Семёновам практикэр зыхьырэмэ ынаIэ атыригъэтыгъ. Практикэхэм язэхэщэнкIэ лъэшэу яшIуагъэ къакIо базовэ кафедрэхэу клиническэ учреждениехэм ахэтхэм. Гъэсэныгъэ процессымрэ профессиональнэ IофшIэнымрэ ащ зэрещалIэх. ЗызэхэгущыIэжьхэм ыуж практикэ IофшIэныр дэгъоу зэхащагъэу шIэныгъэлэжьхэм ясовет ылъытагъ. Ау базэхэм зарагъэушъомбгъунэу, пэрыт  федеральнэ медицинэ гупчэхэм нахь чанэу адэлэжьэнхэу унашъо афашIыгъ.

Ректоратым дэжь щыIэ упчIэжьэгъоу Сергей Чефрановым ФГБОУ ВО «МГТУ» зыфиIорэм хэхъоныгъэ егъэшIыгъэнымкIэ и Программэ зэхъокIыныгъэу фэхъугъэхэм къатегущыIагъ. Программэу 2023-2032-рэ илъэсыхэм ателъытагъэр УФ-м апшъэрэ гъэсэныгъэмрэ наукэмрэкIэ и Министерствэ 2023-рэ илъэсым ыгъэнэфэгъагъ. Ау лъэпкъ проектхэр зэрагъэкIэжьыгъэхэм ыкIи стратегическэ планированием исистемэ зэрэзэблахъугъэм къахэкIэу программэхэм ахэплъэжьынхэ фаеу хъугъэ. ДокументыкIэм «стратегическэ технологическэ проектхэр» къыщыдэлъытэгъэнхэ фае, экономикэм хэхъоным пае научнэ ушэтыныкIэхэр нахь псынкIэу щыгъэцэкIэгъэнхэр зы пшъэрылъ. МКъТУ-м ишIэныгъэлэжьхэм ясовет хэтхэр докладым едэIугъэх ыкIи 2025-рэ илъэсым ыкIэ нэс университетым истратегическэ пшъэрылъхэм ясистемэ агъэнэфэнэу унашъо ашIыгъ.

УпчIэу «О перераспределении вакантных мест, имеющихся в образовательной организации и финансируемых за счёт бюджетных ассигнований федерального бюджета» зыфиIорэмкIэ къэгущыIагъ МКъТУ-м иректорэу Къуижъ Саидэ. Ащ къыхьыгъэ предложением елъытыгъэу вакантнэ бюджетнэ чIыпIэхэр зэгъэгъэзэфэжьыгъэнхэм иIоф  шIэныгъэлэжьхэм ясовет хэхьэрэ егъэджэн комиссиер фэгъэзэгъэщт.

Зэхэсыгъом икIэухым ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Муратэ университетым щеджэрэ студентмэ яеджэныпкIэ къегъэIыхыгъэным фэгъэхьыгъэ упчIэр къыIэтыгъ.

Зэхэсыгъом къыщаIэтыгъэ упчIэхэу зымакъэ зыфатыгъэхэм адырагъэштагъ. ГукъэкIэу ыкIи унашъоу аштагъэхэр зэкIэ университетым хэхъоныгъэ егъэшIыгъэным, игъэсэныгъэ процесс нахьышIу шIыгъэным фэгъэхьыгъэх.