Творческэ индустриехэм я Академиеу «Меганом» зыфиIоу арт-кластерэу «Тавридэм» гъэсэныгъэ программэу «Гастроэкспедициер: Къырым» зыфиIорэр щызэхащагъ, ар Къыблэ Урысыем щагъэхьазырырэ шхыныгъохэм языкIныгъэ гъэпсыгъэным фэгъэхьыгъагъ.

Iофтхьабзэу арт-кластерэу «Тавридэр» федеральнэ проектэу «Урысыем иныбжьыкIэхэр» зыфиIорэм ыкIи лъэпкъ  проектэу «Гъэсэныгъэм» елъытыгъэу 2015-рэ илъэсым къыщыублагъэу зэхащэ. Ар сэнаущыгъэ зыхэлъ ныбжьыкIэхэмкIэ IофыгъошIу, яIэпэIэсэныгъэ хагъэхъонымкIэ, творческэ гукъэкIхэр агъэцэкIэнхэмкIэ IэпыIэгъу дэгъоу щыт.

Лъэныкъоу «Технология продукции и организация общественного питания» зыфиIорэм имагистранткэу Сарине Карапетян зэнэкъокъум пхырыкIыгъ ыкIи программэм хэлэжьэнэу фитныгъэ къыдихыгъ.

Экспедицием хэлэжьагъэмэ амал яIагъ Республикэу Къырым игастрономическэ культурэ нэIуасэ фэхъунхэу: чIыпIэ фермэхэр, санэшIхэр, бэдзэрхэр ыкIи ресторанхэр къакIухьагъэх, къуаехэм ыкIи къэкIырэ Iэзэгъу лъэпкъхэм нэIуасэ афэхъугъэх, шхыныгъохэм ягъэхьазырынхэм япхыгъэ шъэфхэм защагъэгъозагъ.

Программэм изэфэхьысыжь къызэригъэлъэгъуагъэмкIэ Сарине Карапетян финалым ихьэгъэ нэбгырищмэ ахэфагъ, аужырэ едзыгъом хэлэжьагъ — рестораным къэкIуагъэхэм афэпщэрыхьагъ. Ежь иавторскэ десерт афишIыгъ, ар кулинарнэ ыкIи кондитерскэ Урысые зэнэкъокъоу 2023-м (ФГБОУ ВО «РОСБИОТЕХ», Москва) щыIагъэм къыщыхагъэщыгъагъ. Десертэу Адыгэ Республикэм икультурнэ ыкIи игастрономическэ нэшанэхэр къызхэщыхэрэм осэшхо Iофтхьабзэм ихьакIэмэ къыфашIыгъ.

Экспедицием икIэухым Республикэу Къырым щыпсэурэ лъэпкъхэм яшхыныгъохэм ярецептхэр зыдэтхагъэ зэфэхьысыжь тхылъыр агъэхьазырыгъ, ар  Сарине Карапетян иушэтэкIо IофшIэн щыщэу хъущт.

Сарине тыфэгушIо текIоныгъэ къызэрэдихыгъэм пае, тапэкIэ джыри гъэхъагъэхэр ышIынхэу тыфэлъаIо!