Мыекъопэ къэралыгъо технологическэ университетым федеральнэ проектэу «Производительность труда» зыфиIорэм изычэзыу едзыгъо щагъэцакIэ. IофшIэнымкIэ гъусэгъоу яIэр компетенциехэмкIэ Отраслевой гупчэу ФГАНУ «Социоцентр» зыцIэм епхыгъэр ары, ащ иIэшъхьэтетыр Руслан Долженко.

Проектыр  университетым игъэIорышIэн нахьышIу шIыгъэным, сакъыныгъэм ылъэныкъокIэ зэхъокIыныгъэшIухэр шIыгъэнхэм афытегъэпсыхьагъ. МКъТУ-р апшъэрэ еджэпIитфхэу лъэпкъ проектэу «Эффективная и конкурентоспособная экономика» зыфиIорэм ипрактикэ анахь дэгъухэр зыщагъэцакIэрэмэ ахэфагъ.

Мы мафэхэм рабочэ зэхэсыгъоу щыIагъэр Iофтхьабзэу агъэнэфагъэхэм яплан, ащ  игъэцэкIэн зэрэкIорэм, джащ фэдэу изэфэхьысыжьхэм афэгъэхьыгъагъ. ШIуагъэ къэзытырэ лъэныкъоу къыхагъэщыгъэхэр, анахьэу Iоф зыдашIэн фаехэр ащ къыщыдалъытагъэх. Гупчэм илIыкIомэ университетым идеканатхэр ыкIи иструктурнэ подразделениехэр къакIухьагъэх, ар зыкIашIыгъэр зэхъокIныгъэхэр зэрагъэлъэгъунхэм ыкIи Iофтхьабзэмэ уасэ афэшIыгъэным афэшI.

Рабочэ купмэ язэIукIэхэмкIэ Iофтхьабзэр лъагъэкIотагъ. АуплъэкIугъэ процессхэмрэ студентмэ яеджакIэрэ атегущыIагъэх, джащ фэдэу Iофтхьабзэ хьылъэхэр гъэцэкIэгъэнхэм пае ресурсхэр агъэнэфагъэх. Анахьэу гъэIорышIэн процессхэр оцифровкэ шIыгъэнхэм анаIэ тырадзагъ. ОЦК-м илIыкIомэ МКъТУ-м и  ИТ-подразделениехэр зэрагъэлъэгъугъэх, ащ зыщыщагъэгъозагъ цифрэ шIыкIэхэр зэращагъэфедэрэм, студентмэ афэгъэхьыгъэ документхэр автоматизацие шапхъэм зэрэтырагъэхьагъэхэр.

Зэфэхьысыжь зэIукIэм Iофэу ашIагъэм ыкIи пшъэрылъэу агъэнафэхэрэм ащытегущыIагъэх. КIэухым планым кIэтхагъэх, агъэцэкIагъэхэри ащ къыщыдалъытагъэх.

Зичэзыу едзыгъоу «Внедрение» зыфиIорэм иIофшIэн МКъТУ-м сакъыныгъэ гъэIорышIэным исистемэ фэгъэхьыгъэ проектышхоу щагъэцакIэрэм лъыпыдзагъэу хъугъэ. «Урысыем иапэрэ сакъыныгъэ апшъэрэ еджапI» зыфиIорэ статусыр зиIэ университетым къегъэлъагъо гъэсэныгъэ, научнэ ыкIи административнэ процессхэмкIэ гъэхъагъэхэр зэришIыхэрэр.