Мыекъопэ къэралыгъо технологическэ университетыр форумэу «Студтуризм-2025-рэ» зыфиIорэм хэлэжьагъ, ар Къыблэ федеральнэ университетым щыкIуагъ. Къыблэ ыкIи Темыр-Кавказскэ федеральнэ шъолъырхэм арыт апшъэрэ еджапIэхэр форумым зэрипхыгъэх, анахьэу студенческэ, ныбжьыкIэ ыкIи туризмэм фэгъэзагъэхэр ары.

Маркетингым, сервисым ыкIи туризмэм якафедрэ икомандэ МКъТУ-р форумым къыщигъэлъэгъуагъ: кIэлэегъаджэхэу Светлана Калашниковар, Хьанэхъукъо Зарем, Наталья Галинскаяр ыкIи Ирина Авдиенкэр, джащ фэдэу «ХьакIэщ Iофым» феджэрэ студентхэр — Екатерина Тороповар ыкIи Валерия Вассалакиевар. Апшъэрэ еджапIэм илIыкIохэр трекитIумэ ахэлэжьагъэх — «Студенческэ ыкIи ныбжьыкIэ туризмэр»,  «Туризмэ гъэлъэшыгъэр».

Акселерационнэ программэм ишапхъэ илъэу форумыр рагъэкIокIыгъ, ащ хэтыгъэх зэдэгущыIэгъухэр, мастер-классхэр ыкIи проектнэ сессиехэр.

Наукэмрэ апшъэрэ гъэсэныгъэмрэкIэ УФ-м и Министрэ игуадзэу Ольга Петровам форумыр къызэIуихыгъ, ащ къыкIигъэтхъыгъ студенческэ туризмэр зекIо къодыеу зэрэщымытыр, ащ ишIуагъэкIэ культурэ зэфэшъхьафхэр зэрэзэдэлажьэхэрэр, цIыфым хахъо зэрэригъэшIырэр.

Пленарнэ дискуссием къыдыхэлъытагъэу экспертмэ студентмэ апае агъэхьазырыгъэ туристическэ гъогухэм атегущыIагъэх, университетскэ турклубхэм IэпыIэгъоу арагъэкIыщтхэм, джащ фэдэу ныбжьыкIэ туризмэр профессиональнэ гъэсэныгъэм зэрэхагъэхьащтым.

Форумым хэлэжьагъэхэр зэхэт гъэсэныгъэ программэхэм  атегущыIагъэх, студентмэ апае практикэхэр ыкIи стажировкэхэр зэрахьыщтхэр зэхафыгъэх.

Форумэу «Студтуризм-2025-р» профессиональнэ площадкэ хъугъэ къодыеп, ар университетым итуристическэ хэхъоныгъэкIэ гукъэкIыкIэхэм якъэкIуапIэу щыт. МКъТУ-м икомандэ опытэу къыIэкIэхьагъэм ишIуагъэкIэ студенческэ гукъэкIхэр агъэцэкIэшъущтых, зэпхыныгъэхэр агъэпытэщтых, федеральнэ программэу «Студтуризмэм» нахь чанэу  хэлэжьэшъущтых.