Мыекъопэ къэралыгъо технологическэ университетым пчъэ зэIухыгъэхэм я Мафэ щыкIуагъ — бжыхьэ лъэхъаным анахьэу зэжагъэхэ Iофтхьабзэм хэлэжьагъэх абитуриентхэмрэ ны-тыхэмрэ, ахэр апшъэрэ еджапIэм нэIуасэ фэхъугъэх, кIэлэегъаджэхэм аIукIагъэх, лъэныкъоу зыфеджэшъущтхэр зэрагъэшIагъ.

Хабзэ зэрэхъугъэу зэхахьэр къызэIуихыгъ апшъэрэ еджапIэм фэгъэхьазырыгъэнхэмкIэ ыкIи сэнэхьат къыхэхынымкIэ Гупчэм ипащэу Олег Франко, ащ зэIукIэм ипшъэрылъ шъхьаIэ къыгъэнэфагъ — неущрэ студентхэм зэхашIыкIэу зыфеджэщтхэ сэнэхьатыр къыхахынымкIэ адэIэпыIэнхэр ары.

ШIуфэс псалъэкIэ къэзэрэугъоигъэхэм закъыфигъэзагъ МКъТУ-м иректорэу Къуижъ Саидэ, университетым гъэхъагъэу ышIыгъэхэм, джырэкIэ Iофэу агъэцакIэрэмэ ыкIи япшъэрылъмэ ар къатегущыIагъ. Апшъэрэ еджапIэмрэ кIэлэеджакIохэмрэ зэрэзэдэлажьэхэрэм мэхьанэшхо зэриIэр ащ къыкIигъэтхъыгъ.

— МКъТУ-р — ар зэдэгупшысэгъухэм ясообществ, ащ студент пэпчъ IэпыIэгъу щегъоты, ицыхьэ зытелъыжьэу, наукэм, творчествэм, спортым ыкIи общественнэ IофшIэным защиушэтын елъэкIы, — къыхигъэщыгъ ректорым.

Зэхахьэм хэлэжьагъ МКъТУ-м и Дзэ егъэджэн гупчэм ипащэу, полковникэу Нурлан Самадьяновыр, ар дзэ сэнэхьатэу гупчэм щагъотыхэрэр, ащ ущеджэным шIуагъэу къытыхэрэр зыфэдэхэр къыIотагъэх.

Приёмнэ комиссием пшъэдэкIыжь зыхьырэ исекретарэу лажьэрэ Бэрзэдж Роза лъэныкъоу апшъэрэ еджапIэм зыфеджэхэрэмрэ сэнэхьатхэмрэ ягугъу къышIыгъ. Приёмнэ кампанием Iоф зыщыишIэрэ уахътэр, документхэр зыщыптынхэ фае пIалъэхэр къыгъэнэфагъэх, джащ фэдэу стипендиальнэ программэхэм ыкIи социальнэ фэгъэкIотэнхэм къатегущыIагъ.

Зэхахьэм иофициальнэ Iахь заухым ыуж, хьакIэхэр МКъТУ-м наукэм и Фестивалэу щыкIуагъэм иинтерактивнэ къэгъэлъэгъон еплъыгъэх, ащ научнэ проектэу кIэлэегъаджэхэмрэ студентхэмрэ зэхагъэуцуагъэхэм защыщагъэгъозагъ. Наукэм ифестиваль зэрэкIуагъэр игъэкIотыгъэу мыщ ит.